- લાલુને મંગળવારે રિમ્સથી દિલ્હી AIIMSમાં રિફર કરવામાં આવ્યા હતાં
- AIIMSએ કહ્યું કે - 'લાલુની તબિયત ઠીક છે'
- RJDના ધારાસભ્ય ભાઈ વીરેન્દ્રએ AIIMS પર લગાવ્યો ગંભીર આક્ષેપ
વીરેન્દ્રએ કહ્યું કે, 'ભાજપના દબાણમાં બિહારના પૂર્વ મુખ્યમંત્રી અને RJD પ્રમુખ લાલુ યાદવને હોસ્પિટલમાં દાખલ કરવાની ના પાડી દીધી છે.'
એ પહેલાં ચારા કૌભાંડમાં સજા કાપી રહેલા લાલુ યાદવને મોડી સાંજે રાંચીથી એર એમ્બ્યુલન્સ દ્વારા નવી દિલ્હી લાવવામાં આવ્યા હતાં અને રાત્રે એમ્સ ઈમરજન્સીમાં દાખલ કરવામાં આવ્યાં. ત્યારે હવે એવું સામે આવી રહ્યું છે કે, AIIMSએ લાલુ યાદવને વોર્ડમાં ન મોકલ્યા અને આજે સવારે 3.30 વાગે રજા આપી દીધી. જો કે, AIIMSના સૂત્રોએ જણાવ્યું કે, તપાસમાં લાલુ યાદવ સ્વસ્થ જણાયા હતાં.
મેડિકલ બોર્ડની બેઠકમાં લાલુ પ્રસાદ યાદવને દિલ્હી મોકલવાનો નિર્ણય લેવાયો હતો
એ પહેલાં રાંચીમાં આવેલ રાજેન્દ્ર ઇન્સ્ટિટ્યૂટ ઑફ મેડિકલ સાયન્સ (RIMS) મેડિકલ બોર્ડની બેઠકમાં મંગળવારે લાલુ પ્રસાદ યાદવને દિલ્હી મોકલવાનો નિર્ણય લેવામાં આવ્યો હતો. RIMSના ડાયરેક્ટર ડૉ. કામેશ્વર પ્રસાદે કહ્યું હતું કે, લાલુ યાદવની તબિયત બગડી રહી છે અને તેમના હૃદય અને કિડનીને અસર થઈ છે. આથી, તેમને વધુ સારી સારવાર માટે એઈમ્સ દિલ્હી મોકલવામાં આવ્યાં હતાં. RIMS બોર્ડે શોધી કાઢ્યું હતું કે, લાલુ યાદવનું ક્રિએટિનિન લેવલ વધી રહ્યું છે અને તેઓ તેને નિયંત્રિત કરવામાં અસમર્થ છે.
તેમની કિડની માત્ર 15-20 ટકા ક્ષમતા સાથે કામ કરી રહી છે : ડોક્ટર વિદ્યાપતિ
ડોક્ટર વિદ્યાપતિએ જણાવ્યું હતું કે, લાલુ યાદવ બ્લડ સુગર, બ્લડ પ્રેશર, હૃદય રોગ, કિડનીની બીમારી, તણાવ, થેલેસેમિયા, પ્રોસ્ટેટ વૃદ્ધિ, યુરિક એસિડ વધવા અને મગજને લગતી બીમારીઓથી પીડિત છે. માત્ર એટલું જ નહીં, લાલુ નબળી રોગપ્રતિકારક શક્તિ, જમણા ખભાના હાડકામાં દુ:ખાવો, પગના હાડકામાં સમસ્યા અને દ્રષ્ટિની ખામીથી પણ પરેશાન છે. ડૉ. વિદ્યાપતિએ જણાવ્યું હતું કે, તેમની કિડની માત્ર 15-20 ટકા ક્ષમતા સાથે કામ કરી રહી છે.
RJD પ્રમુખ લાલુ પ્રસાદ યાદવની બગડતી તબિયતને ધ્યાનમાં રાખી RIMS મેનેજમેન્ટ દ્વારા બનાવવામાં આવેલા મેડિકલ બોર્ડે મંગળવારે ઈમરજન્સી બેઠક યોજી હતી. જેમાં લાલુના મુખ્ય ડૉક્ટર ડૉ. વિદ્યાપતિની સાથે RIMS નાં ડિરેક્ટર અને સુપરિન્ટેન્ડેન્ટ પણ હાજર હતાં. ડૉક્ટરોએ આ નિર્ણયની જાણ જેલ પ્રબંધનને કરી, જેમણે લાલુને ઉતાવળમાં દિલ્હી લઈ જવાની મંજૂરી આપી દીધી.
