મહેન્દ્ર સિંહ ધોની એક એવુ નામ છે જેને કોઇ પણ પ્રકારના ઇન્ટ્રોડક્શનની જરૂર નથી. ક્રિકેટમાંથી નિવૃત્તિ લીધા બાદ માહી તેનો તમામ સમય ખેતી અને ગાય ભેંસ પાછળ વ્યતિત કરશે.
હાલમાં ધોની તેના ફાર્મ હાઉસમાં છે અને તે ખેતી કરવા માટે પણ ઉત્સુક છે. ધોનીનુ ફાર્મ હાઉસ અનેક સુવિધાઓથી ભરપૂર છે, જાણીને તમને પણ એવુ લાગશે કે આટલી સુવિધા તો ક્યાંય ન મળે.
ક્યાં છે ફાર્મહાઉસ
મહેન્દ્ર સિંહ ધોનીનું ફાર્મ હાઉસ રાંચીના સામ્બોમાં છે. ધોનીના ફાર્મહાઉસને લોકો આઇજાહ તરીકે પણ ઓળખે છે. ધોની 43 એકર જમીનમાં ફળ અને શાકભાજીની ખેતી કરે છે. ફાર્મ હાઉસમાં ડેરી પણ છે અને તે હવે તેમાં મરઘીઓ પણ ઉછેરશે.
ધોની તેના ફાર્મહાઉસમાં સ્ટ્રોબેરી, પપૈયા અને જામફળની ખેતી કરે છે. દેશી અને વિદેશી બીજ દ્વારા ધોની અદ્યતન ખેતી કરી રહ્યો છે. ફળો સિવાય કોબી, બટાટા, અને ટામેટા જેવા અન્ય શાકભાજીની ખેતી કરે છે.
ધોનીની પત્ની સાક્ષી અને દીકરી ઝીવા વારંવાર ફાર્મહાઉસમાં જાય છે અને તસવીરો પણ અપલોડ કરે છે. ધોનીને હવે મરઘા ઉછેરમાં રસ જાગ્યો છે. તેમણે 2000થી વધુ મરઘીના બચ્ચા મંગાવ્યા છે.