અમદાવાદ / જેનું લોકાર્પણ PM મોદીએ કર્યું છે તે SVP હોસ્પિટલમાં હવે આ લોકોને મળશે મફતમાં સારવાર

• કોર્પોરેટર, મ્યુનિ. કર્મચારીઓ માટે સારા સમાચાર 
• SVPમાં પણ મળશે મફતમાં સારવાર 
• ટૂંક સમયમાં લેવાશે નિર્ણય  

લગભગ એક વર્ષથી કાર્યરત એસ.વી.પી. હોસ્પિટલમાં હજુ સુધી કોર્પોરેટરોને અન્ય મ્યુનિ. હોસ્પિટલના ધારાધોરણ મુજબ મફત સારવાર અપાતી નથી. પરંતુ હવે આ દિશામાં ચક્રો ગતિમાન થયાં હોઇ ટૂંક સમયમાં શહેરના ૧૯ર કોર્પોરેટરને એસ.વી.પી. હોસ્પિટલમાં પણ ધારાધોરણ મુજબ સારવાર ઉપલબ્ધ થશે. 

દર મહિને ૪૦૦૦ ઓપીડી પેશન્ટ નોંધાય છે 

પ્રારંભમાં એસ.વી.પી. હોસ્પિટલ લોકોમાં અન્ય મ્યુનિ. હોસ્પિટલની જેમ લોકપ્રિય બની ન હતી. કારણ કે આ હોસ્પિટલમાં તમામ સારવાર ચાર્જેબલ છે. જોકે ધીમે ધીમે દર્દીઓનો ઝોક આ હોસ્પિટલ તરફ વળ્યો છે. ખાસ કરીને એક સમયની ‌પ્રતિષ્ઠિત વી.એસ.હોસ્પિટલ મૃતપ્રાય હાલતમાં મુકાઇ ગઇ હોય દર્દીઓનો ધસારો એલ.જી. હોસ્પિટલ સાથે સાથે એસ.વી.પી. હોસ્પિટલ તરફ વળ્યો છે. એક અંદાજ મુજબ દર મહિને ૪૦૦૦ ઓપીડી પેશન્ટ નોંધાઇ રહ્યા છે. 

આ ઉપરાંત આઇસીયુની ૧૪૦ પથારી પણ મહદઅંશે દર્દીનો ભરચક હોય છે. અનેક વખત ૧૦૮ એમ્બ્યુલન્સમાં આવેલ દર્દીને પણ એસ.વી.પી. હોસ્પિટલમાં વેન્ટિલેટરની વ્યવસ્થા ન હોઇ અન્ય હોસ્પિટલ તરફ લઇ જવાની ફરજ પડાઇ રહી છે. 

વી.એસ. હોસ્પિટલમાં અપાતી હતી કેસલેસ સારવાર  

દરમ્યાન વી.એસ. હોસ્પિટલ સહિતની તમામ મ્યુનિ. હોસ્પિટલોમાં શહેરના કોર્પોરેટર તેમજ કોર્પોરેશનમાં ફરજ બજાવતા સ્ટાફ અને તેમના આશ્રિત પેન્શનર અને તેમના આશ્રિતને કેસલેસ ઓપીડી અને ઇન્ડોર સારવાર અપાતી હતી. 

ઇન્ડોર સારવાર નિશ્ચિત ધારાધોરણ મુજબ પૂરી પાડવાની દિશામાં કવાયત આરંભી

જોકે એસ.વી.પી. હોસ્પિટલમાં આ નીતિ અમલમાં મુકાઇ ન હતી. જેના કારણે છાશવારે કોર્પોરેટરો દ્વારા એસ.વી.પી. હોસ્પિટલમાં સુવિધા પૂરી પાડવાની માગણી ઊઠતી રહેતાં તંત્રએ હોસ્પિટલમાં કેસલેસ ઓપીડી અને ઇન્ડોર સારવાર નિશ્ચિત ધારાધોરણ મુજબ પૂરી પાડવાની દિશામાં કવાયત આરંભી છે.