રાહત / હવે આ વસ્તુ પણ બનશે કર્ફ્યૂ પાસ, સ્ટેશનથી રોકટોક વિના ઘરે જઈ શકશે રેલ્વે મુસાફરો

• આજથી નવી દિલ્હીથી ચાલશે 15 ટ્રેન
• સ્ટેશન પર કરાશે યાત્રીઓનું સ્ક્રીનિંગ
• ટ્રેન ટિકિટ બનશે કર્ફ્યૂ પાસ, માસ્ક અને સોશ્યિલ ડિસ્ટન્સિંગનું પાલન ફરજિયાત

કોરોના વાયરસ અને લોકડાઉનને કારણે લાંબા સમયથી બંધ રહેલી ટ્રેનોની કામગીરી આજથી શરૂ થઈ રહી છે. આ સંદર્ભે ગૃહમંત્રાલયે સોમવારે કહ્યું હતું કે જે રેલ્વે મુસાફરો પાસે રેલ્વેની કન્ફર્મ ટિકિટ છે તેમને કર્ફ્યુ પાસ બનાવવાની જરૂર રહેશે નહીં.

આ નિયમનું કરવું પડશે પાલન

ગૃહ મંત્રાલયે રેલ્વેમાં મુસાફરી કરતા મુસાફરોની અવરજવર અંગે માર્ગદર્શિકા જાહેર કરી છે, જે મુજબ ફક્ત કન્ફર્મ  થયેલી ઇ-ટિકિટવાળા મુસાફરો જ રેલ્વે સ્ટેશનમાં પ્રવેશ કરી શકશે. તેઓને ત્યાં તપાસવામાં આવશે, જેમાં કોઈ લક્ષણો નથી, ફક્ત તે જ મુસાફરો મુસાફરી કરી શકશે. આ સિવાય સામાજિક અંતર અને માસ્કિંગ ફરજિયાત રહેશે. 

પરપ્રાંતિય મજૂરો રેલવે ટ્રેકનો ઉપયોગ ન કરેઃ કેન્દ્ર સરકાર

હાલમાં જ રેલ્વે ટ્રેક ઉપર અકસ્માત થયા પછી આવી દુર્ઘટના ફરી ન સર્જાય, આ માટે ગૃહ મંત્રાલયે અને કેન્દ્ર સરકારે રાજ્યોને સુનિશ્ચિત કરવા જણાવ્યું છે કે, પરપ્રાંતિય મજૂરો રેલ્વે ટ્રેકનો ઉપયોગ ન કરે. તેમના માટે રેલ્વે અથવા બસોની વ્યવસ્થા ન થાય ત્યાં સુધી તેમના માટે આહાર, આશ્રય માટેની વ્યવસ્થા કરો.

100થી વધુ મજૂર વિશેષ ટ્રેનોની કરાઈ છે વ્યવસ્થા

ગૃહ મંત્રાલયે જણાવ્યું હતું કે, પરપ્રાંતિય કામદારોને ઝડપથી અવરજવર શક્ય બનાવવા  ગૃહ મંત્રાલય અને રેલ્વે મંત્રાલયે આજે રાજ્યના નોડલ અધિકારીઓ સાથેની એક વીડિયો કોન્ફરન્સમાં શ્રમિક સ્પેશિયલ ટ્રેનની કામગીરીની સમીક્ષા કરી હતી. 100 થી વધુ મજૂર વિશેષ ટ્રેનો આવતા કેટલાક અઠવાડિયા માટે દૈનિક દોડશે.