કોરોના મહામારીને લઇ સમગ્ર દેશમાં લોકડાઉન જાહેર કરાયું છે. લોકડાઉનનો કડક અમલ કરાવવા માટે પોલીસકર્મીઓ રાત દિવસ ખડેપગે રહેતા હોય છે. ત્યારે પોલીસકર્મીઓના સ્વાસ્થ્ય અને ક્વોરેન્ટાઇમાંથી ભાગી જતા લોકો પર નજર રાખવા એક એપ્લિકેશન તૈયાર કરાઇ છે.
કોરોના સામે ટેક્નોલોજીનો સહારો
પોલીસકર્મીઓ માટે સુરક્ષા માટે બનાવાઇ એક એપ
ક્વોરેન્ટાઇન લોકો પર પણ રાખશે બાજ નજર
કોરોના વાયરસના કહેર વચ્ચે પોલીસકર્મીઓના સ્વાસ્થ્યની ચિંતાને લઇને ખાસ આ એપ્લિકેશન તૈયાર કરવામાં આવી છે. ઉલ્લેખનીય છે કે, આ એપનું નામ કોવીડ 19 હેલ્થ ટ્રેકર આપવામાં આવ્યું છે.
પોલીસકર્મીના સ્વાસ્થ્યને લઇને તૈયાર કરાઇ ખાસ એપ
કોવીડ 19 હેલ્થ ટ્રેકર નામની આ એપ્લિકેશન સતત પોલીસ અધિકારીઓ પર વોચ રાખશે અને દરેક પોલીસકર્મીના આરોગ્યની તપાસ કરશે. તો બીજી તરફ ક્વોરેન્ટાઇ થયા બાદ ભાગી જતા લોકો માટે AMC અને પોલીસે એક એપ્લિકેશન બનાવી છે. જેમાં ક્વોરેન્ટાઈન લોકોએ ત્રણ ટાઇમ હાજરી આપવાની રહેશે.
આરોગ્ય સેતુ નામની એપ પણ કેન્દ્ર સરકાર દ્વારા કરાઇ છે તૈયાર
કોરોના વાઈરસ મહામારી સામે લડવા માટે ભારત સરકારના આરોગ્ય મંત્રાલયે હાલમાં જ આરોગ્ય સેતુ નામની એપ લોન્ચ કરી છે. આ એપ માત્ર ચાર દિવસમાં એક કરોડથી વધુ વખત ડાઉનલોડ કરી લેવાઇ છે. તેને વધુમાં વધુ લોકો ડાઉનલોડ કરે તે માટેનો પ્રયાસ કરવામાં આવી રહ્યો છે.
કેવી રીતે કામ કરે છે આરોગ્ય સેતુ એપ
આ એપ કોરોનાથી તમને કેટલું જોખમ છે તેનુ સ્તર જણાવશે. તે સેલ્ફ એસેસમેન્ટ ટેસ્ટમાં અપાયેલાં લક્ષણો, બીમારીઓ જેવી જાણકારીઓ અને તમારાં લોકેશનના આધારે જણાવે છે કે તમને કોરોનાનું કેટલું જોખમ છે. તે જણાવે છે કે તમારે ટેસ્ટની અને ડોક્ટરને બતાવવાની કેટલી જરૂર છે.આ એપ ડાઉનલોડ કરતી વખતે તમે જે જાણકારીઓ આપશો તેના આધારે એપ જણાવશે કે તમને કોરોનાનું જોખમ કેટલું છે. જો છે તો શું પરીક્ષણની જરૂર છે કે ક્વોરેન્ટાઇનથી કામ ચાલી જશે. જો પરીક્ષણની જરૂર હોય તો તમે તે ક્યાં કરાવી શકો. તમારે બેકગ્રાઉન્ડમાં એપ હંમેશાં ચાલુ રાખવી પડશે.એ સાથે બ્લુટુથનું લોકેશન પણ ઓન રાખવું પડશે.