ડરામણું / અમદાવાદીઓ સાવધાન થઈ જજો: કોરોનાનો આ રેકોર્ડ સારો નથી, વાંચો વિગતો

• અમદાવાદ શહેરમાં કોરોનાના કેસોમાં રેકોર્ડ બ્રેક વધારો 
• એક જ દિવસમાં શહેરમાં 2,631 કોરોનાના કેસો નોંધાયા 
• નવા 35 વિસ્તારનો માઈક્રો કન્ટેનમેન્ટમાં થયો સમાવેશ

કોરોનાએ અમદાવાદ શહેરને બાનમાં લીધુ છે. દરરોજ કોરોનાના  રેકોર્ડ બ્રેક કેસો નોંધાઈ રહ્યા છે. એક જ દિવસમાં શહેરમાં 2,631 જેટલા કોરોનાના કેસો નોંધાયા હતા તથા નવા 35 વિસ્તારનો માઈક્રો કન્ટેનમેન્ટમાં સમાવેશ થતા શહેરમાં માઈક્રો કન્ટેનમેન્ટ વિસ્તારનો આંક 430એ પહોંચ્યો હતો. 

નવા વિસ્તારોમાં બોડકદેવના ગોયેલ કોમ્પ્લેક્સ, કલગી એપાર્ટમેન્ટના મકાનો તથા બોડકદેવ વિસ્તારમાં 92 મકાનો તદઉપરાંત સાઉથ બોપલના ઓર્ચિડ પેરેડાઇઝના 48 જેટલા મકાનો માઇક્રો કન્ટેનમેન્ટમાં આવરી લેવામાં આવ્યા છે

રાજ્ય સરકાર દ્વારા જાહેર કરવામાં આવેલ આંકડા પ્રમાણે રાજ્યમાં ગત 24 કલાકમાં કોરોનાના 8,152 કેસ નોંધાયા છે તો 81 લોકોની મોત છેલ્લા 24 કલાકમાં નોંધાઈ છે. અને 3,023 દર્દીઓ સાજા થયાં છે. આ સાથે જ અત્યાર સુધીમાં 32,6394 દર્દીઓ કોરોના મુક્ત થયાં છે. 

છેલ્લા 24 કલાકમાં 73 દર્દીઓના મોતથી ખળભળાટ

ઉલ્લેખનીય છે કે, છેલ્લા 24 કલાકમાં રાજ્યમાં 81 લોકોના સારવાર દરમિયાન મોત થયાં છે.આમ ગુજરાતમાં અત્યાર સુધીમાં 5076 લોકોના મોત કોરોનાને કારણે થયાં છે. ગઇકાલ કરતા આજે કોરોનાના કેસમાં ચિંતાજનક ઉછાળો નોંધાયો છે તો સાથોસાથ મૃત્યુનો આંકડો પણ દિવસેને દિવસે વધી રહ્યો છે. રાજ્યમાં હાલ 267 લોકો વેન્ટિલેટર પર છે. એક્ટિવ કેસનો આંકડો 44,298 પર પહોંચ્યો છે.

સુરત અને અમદાવાદમાં કોરોના બેકાબૂ 

ગુજરાતમાં રસીકરણની કામગીરી ચાલુ હોવા છતાં બીજી તરફ પરિસ્થિતિ બેફામ છે. કોરોનાના કેસમાં સતત વધારો થતા ચિંતા વધી છે. અમદાવાદ શહેરમાં રાજ્યના સૌથી વધુ 2631 કેસ તો અમદાવાદ ગ્રામ્યમાં 41 કેસ નોંધાયા છે. જ્યારે સુરત શહેરમાં 1551 નવા કેસ, જ્યારે સુરત ગ્રામ્યમાં 313 કેસ નોંધાયા છે. વડોદરા શહેરમાં 348 કેસ, જ્યારે ગ્રામ્યમાં 138 કેસ નોંધાયા. રાજકોટ શહેરમાં 698 કેસ અને ગ્રામ્યમાં 64 કેસ નોંધાયા છે.