દેશમાં કોરોના વાયરસનું સંક્રમણ ઝડપથી ફેલાઈ રહ્યું છે. કોરોના વાયરસના નવા કેસમાં આજે મોટો ઉછાળો જોવા મળ્યો છે. દેશમાં પહેલીવાર એક જ દિવસમાં 14 હજારથી પણ વધારે નવા કેસ સામે આવ્યા છે. સ્વાસ્થ્ય મંત્રાલયના આંકડા અનુસાર છેલ્લા 24 કલાકમાં કોરોનાના 14516 કેસ આવ્યા છે. તો 375 દર્દીના મોત થયા છે. નવા કેસ આવવાની સાથે દેશમાં કોરોનાના સંક્રમિતોની કુલ સંખ્યા 3 લાખ 95 હજાર 048 પહોંચી છે. ઉલ્લેખનીય છે કે દેશમાં 3 રાજ્યો દિલ્હી, મહારાષ્ટ્ર અને તમિલનાડુમાં 24 કલાકમાં 10000 જેટલા કેસ આવતાં સરકારની ચિંતામાં વધારો થયો છે.
દેશમાં વધી રહ્યો છે કોરોના વિસ્ફોટ
24 કલાકમાં 3 રાજ્યોમાં 10000 જેટલા નવા કેસ
3 રાજ્યોના સંક્રમણે ઉડાડી સરકારની ઊંઘ
કોરોનાના વધતા ગ્રાફ પર નજર કરીએ તો 3 રાજ્યોમાં કોરોના સંકટ ઘેરું બની રહ્યું છે. છેલ્લા 24 કલાકમાં 3 જ રાજ્યોમાં 10000 જેટલા નવા કેસ આવ્યા છે. દિલ્હી, મહારાષ્ટ્ર, તમિલનાડુમાં કોરોનાના 9079 કેસ આવ્યા છે. જ્યારે દેશના અન્ય રાજ્યો અને કેન્દ્રશાસિત પ્રદેશો મળીને કુલ 5437 કેસ આવ્યા છે. છેલ્લા 24 કલાકમાં દિલ્હીમાં 3137 નવા કેસ, મહારાષ્ટ્રમાં 3827 નવા કેસ અને તમિલનાડુમાં 2115 નવા કેસ આવ્યા છે.
મહારાષ્ટ્રમાં કેસ વધવાના કારણે ફરી આવી શકે છે લૉકડાઉન
મહારાષ્ટ્રમાં પણ કોરોના વાયરસના કેસમાં સતત વધારો થઈ રહ્યો છે. જેના કારણે મુંબઈ પોલીસે બીએમસીથી 5 જગ્યા પર સંપૂર્ણ રીતે લૉકડાઉનની માંગણી કરી છે. મુંબઈ પોલીસે કોરોનાના વધતા કેસને જોતાં બીએમસીથી સમતા નગર, કુરારના અપ્પાપાડા, કુરાર ગામ, મડ વિસ્તાર અને મલાડાના કેટલાક વિસ્તારોને સંપૂર્ણ લૉકડાઉન કરવાની માગ કરી છે. આ સમયે કોઈને પણ ઘરની બહાર નીકળવાની પરમિશન ન આપવાનો નિર્ણય લેવાશે. આ સાથે ફક્ત જરૂરી સામાનને ખોલવાની માંગ કરી છે.
ભારતમાં 18 જ દિવસમાં બમણી થઈ સંખ્યા
જો ભારતની વાત કરીએ તો અહીં 18 મેના રોજ 1 લાખ કેસ હતા. 2 જૂને તે સંખ્યા 2 લાખ પહોંચી. એટલે કે 14 દિવસમાં એક લાખ કેસનો વધારો થયો. 2થી 4 લાખ થવામાં ફક્ત 18 દિવસનો સમય લાગ્યો છે. એટલે કે કોરોનાનું સંક્રમણ ભારતમાં ઝડપથી ફેલાઈ રહ્યું છે.