સમગ્ર દેશ અને રાજ્યમાં કોરોનાનો કહેર ચાલી રહ્યો છે ત્યારે આ કોરોનાની ઝપેટમાં નેતાઓ અને નેતાઓના પરિવારજનો પણ આવી રહ્યા છે. ગુજરાત ભાજપ, કોંગ્રેસ અને અપક્ષના ધારાસભ્યો, કોર્પોરેટર સહિત અનેક નેતાઓ કોરોના પોઝિટિવ આવી ચૂક્યા છે. જેમાંથી વધુ પડતા નેતાઓએ કોરોનાને હરાવ્યો છે. તેવામાં હવે સૌરાષ્ટ્રના પાટીદાર ધારાસભ્ય લલિત કગથરાનો પરિવાર કોરોનાની ઝપેટમાં આવ્યો છે.
ટંકારા પડધરી વિસ્તારના કોંગ્રેસના ધારાસભ્ય લલિત કગથરાના પરિવારના 22 સભ્યોને કોરોના પોઝિટિવ આવ્યો છે. જોકે લલિત કગથરા અને તેમના પત્નીનો રિપોર્ટ નેગેટિવ આવ્યો છે. કગથરા ચૂંટણીની તૈયારીઓને લઇને 8 દિવસથી ઘરથી દૂર હતા. જોકે કગથરાના દીકરા, દીકરાના પત્ની અને ભાઇ સહિતના સભ્યોને કોરોના પોઝિટિવ આવ્યો છે.
અગાઉ કેતન ઇનામદાર સહિત તેમને પરિવાર પણ કોરોનાની ઝપેટમાં આવ્યો હતો
અગાઉ સાવલીના ભાજપના ધારાસભ્ય કેતન ઇનામદારને કોરોના પોઝિટિવ આવ્યા પછી તેમના પત્નીને પણ કોરોનાનો રિપોર્ટ પોઝિટિવ આવ્યો હતો. અગાઉ કેતન ઇનામદારના પુત્ર, ભાઈના પુત્ર અને ભાઈના પત્ની અને ભાણીયો તેમજ કેતન ઇનામદારના ડ્રાઇવરને પણ કોરોના પોઝિટિવ આવ્યો હતો.