ચૂંટણી / કોંગ્રેસના સ્ટાર પ્રચારક હાર્દિકને મળી હેલિકોપ્ટરની સાથે પ્લેનની પણ સગવડ

કોંગ્રેસમાં જોડાતાની સાથે જ તેનો સ્ટાર પ્રચારક બની ગયેલા હાર્દિક પટેલ માટે પાર્ટીએ હવે હેલિકોપ્ટર પછી હવે પ્લેનની પણ વ્યવસ્થા કરી આપવામાં આવી છે. અત્યાર સુધી ગાડીમાં ફરતો હાર્દિક હવે હેલિકોપ્ટરમાં ફરીને પ્રચાર કરવા લાગ્યો છે. લોકસભા ચૂંટણીના પ્રચારના હવે ગણતરીના દિવસો બાકી રહ્યા છે, ત્યારે હેલિકોપ્ટર તથા પ્લેન દ્વારા હાર્દિક ગુજરાતના ખૂણેખૂણે સફર કરીને સભા સંબોધી રહ્યો છે. 
 

હાર્દિકે આજે સવારે આઠ વાગ્યે કેશોદમાં એક સભા સંબોધી હતી. સૌરાષ્ટ્રના કેશોદથી હાર્દિક હેલિકોપ્ટર મારફત સીધો જ ઉત્તર ગુજરાતના હારીજ રવાના થયો હતો અને હારિજમાં સભા પૂરી કર્યા પછી દક્ષિણ ગુજરાતના ભરૂચમાં જવા રવાના થશે, જ્યારે બપોરે 3 વાગ્યે તેની સભા થશે. ભરૂચની સભા પૂરી થયા પછી હાર્દિક ફરી ગાંધીનગર પાસેના માણસા પહોંચશે અને ત્યાં સાંજે સાડા પાંચ વાગે ભાષણ આપીને રાત્રે 8 વાગ્યે પાટણ પહોંચશે. 

ગુજરાતમાં 23 એપ્રિલે લોકસભા ચૂંટણીનું મતદાન યોજાવાનું છે. મતદાનની તારીખના 48 કલાક પહેલા જાહેર સભા સંબોધી શકાતી નથી. આ દિવસો દરમિયાન માત્ર ડોર ટુ ડોર જ પ્રચાર થઇ શકે છે. આમ હવે ગુજરાતના પ્રચારના ખાસ દિવસો બાકી રહ્યા નથી, ત્યારે હાર્દિક વધુમાં વધુ પ્રચાર કરી શકે તેના માટે હેલિકોપ્ટર ફાળવવામાં આવ્યુ છે. 
 

ઉલ્લેખનીય છે કે, ગુજરાતમાં કોંગ્રેસ પાસે અનેક સીનિયર નેતાઓ તો છે, પરંતુ હાર્દિક જેવો રાજ્યમા જાણતો હોય તેવો ચહેરો કોંગ્રેસ પાસે નથી, તેવામાં પક્ષ પાસે રાજ્યમાં ખૂણેખૂણા ફરીને પ્રચાર કરી શકે તે માટે હાલ હાર્દિક એકમાત્ર વિકલ્પ છે. એક સમયે અલ્પેશ ઠાકરો કોંગ્રેસનો ઉત્તર ગુજરાતનો મજબૂત ચહેરો માનવામાં આવતો હતો, પરંતુ તેણે પક્ષ સાથે છેડો ફાડ્યા પછી હાર્દિકનું કોંગ્રેસમાં કદ વધી ગયુ છે.