સુરત શહેરના કોર્પોરેટરો લાંચ લેવામાં સૌથી આગળ હોવાનું સામે આવ્યું હતું. એક અહેવાલ મુજબ શહેરની કોર્પોરેશનના ચાલુ ટર્મના 5 કોર્પોરેટરો લાંચ લેતા ઝડપાયા હતા. જેને લઇને આંજણા વોર્ડના મહિલા કોર્પોરેટરના ઘરે ACBની તપાસ કરવામાં આવી છે.
સુરતમાં મહિલા કોર્પોરેટર દ્વારા લાંચ મામલો
આંજણા વોર્ડના મહિલા કોર્પોરેટરના ઘરે ACBની તપાસ
50 હજારની લાંચ લેતા ઝડપાયા હતા કોંગ્રેસી કોર્પોરેટર
સુરતમાં મહિલા કોર્પોરેટર વિરુદ્વ લાંચ માગવાની ફરિયાદ થઈ હતી. બાંધકામ મુદ્દે 50 હજારની લાંચ માંગવામાં આવી હોવાની ફરિયાદ કરાઈ હતી. શહેરના આંજણા વોર્ડના મહિલા કોંગ્રેસી કોર્પોરેટર કપિલા પટેલ 50 હજારની લાંચ લેતા ઝડપાયા હતા.જેને લઈને ACBએ તેમના ઘરે તપાસ હાથ ધરી હતી.
આ દરમિયાન ACBએ કપિલા પટેલના ઘરેથી 8 મિલકતના દસ્તાવેજ કબ્જે કર્યા હતા. તેમના ઘરમાંથી 10 લાખનો સામાન હોવાનું પણ તપાસમાં નોંધવામાં આવ્યું છે. અપ્રમાણસર સંપત્તિ મુદ્દે ACBએ તપાસ શરૂ કરી હતી.
સુરત કોર્પોરેશનમાં ચાલુ ટર્મમાં 5 કોર્પોરેટરો લાંચ લેતા ઝડપાયા હતા. જેમાં ભાજપના 3 અને કોંગ્રેસના 2 કોર્પોરેટરો સામેલ છે. ભાજપના નેન્સી સુમરાએ વર્ષ 2018માં 75 હજારની લાંચ લીધી છે. જ્યારે ભાજપના મીના રાઠોડે વર્ષ 2018માં 5 લાખ લીધા હતા.
ભાજપના જયંતિ ભંડેરીએ વર્ષ 2019માં 50 હજાર લીધા હતા. જ્યારે કોગ્રેસના લીલા સોનવણે વર્ષ 2019માં 15 હજારની લાંચ લીધી. કોંગ્રેસના કપિલા પટેલે 50 હજારની લાંચ લીધી હતી. જેને લઇ કોંગ્રેસના બંને કોર્પોરેટરને લાંચ કેસમાં સસ્પેન્ડ કરી દેવાયા છે. જો કે ભાજપ દ્વારા લાંચિયા કોર્પોરેટર સામે કોઇ એક્શન લેવામાં આવી નથી.