સંગઠનની ચૂંટણીમાં સમગ્ર પ્રક્રિયા સાથે અધ્યક્ષ બનશે રાહુલ
દેશમાં હાલમાં જ ઉત્તર પ્રદેશ સહિતના પાંચ રાજ્યોની ચૂંટણી સમાપ્ત થઈ છે જેમાં કોંગ્રેસ પાર્ટીનો રકાશ નીકળી ગયો હતો, હવે આગામી સમયમાં ગુજરાત અને હિમાચલ પ્રદેશની ચૂંટણી આવી રહી છે ત્યાર કોંગ્રેસ પાર્ટીમાં છેલ્લા લાંબા સમયથી કોઈ સ્થાઈ રાષ્ટ્રીય અધ્યક્ષ નથી. એવામાં હવે કોંગ્રેસની અંદરથી સમાચાર આવી રહ્યા છે કે રાહુલ ગાંધી પોતે પણ આ મુદ્દે ગંભીરતાથી વિચાર કરી રહ્યા છે.
રાહુલ ગાંધી ફરી અધ્યક્ષ બનવા રાજી!
નોંધનીય છે કે કોંગ્રેસમાં સંગઠનની ચૂંટણીની પ્રક્રિયા ચાલી રહી હોવાનું સૂત્રો કહે છે ત્યારે રાહુલ ગાંધી સમગ્ર પ્રક્રિયા સાથે પદ પર પાછા ફરવા માંગે છે.
સૂત્રો અનુસાર પાંચ રાજ્યોના ચૂંટણી પરિણામો બાદ માર્ચમાં મળેલી કોંગ્રેસ વર્કિંગ કમિટીની બેઠકમાં અધીર રંજન ચૌધરીએ રાહુલ ગાંધીને અધ્યક્ષ બનાવવા માટે વિનંતી કરી હતી, જેના જવાબમાં રાહુલ ગાંધીએ કહ્યું હતું કે, તેઓ અધ્યક્ષ બનવા માટે વિચાર કરશે અને ગંભીરતાથી નિર્ણય લેશે.
ચૂંટણીની પ્રક્રિયાથી અધ્યક્ષ બનવા માંગે છે રાહુલ
કોંગ્રેસમાં સંગઠનની ચૂંટણીની નિયત પ્રક્રિયા હેઠળ નવા પક્ષ પ્રમુખની ચૂંટણી ઓગસ્ટ-સપ્ટેમ્બરમાં થવાની છે. સંકેત મળી રહ્યા છે કે ચૂંટણી પ્રક્રિયા દ્વારા રાહુલ ગાંધી ફરી કોંગ્રેસ અધ્યક્ષ બની શકે છે. જો કે રાહુલ ગાંધીની સામે કોઈ ઉમેદવાર ઊભો રહે છે કે નહીં તે જોવું રસપ્રદ રહેશે.
રાહુલનું રાજીનામું, પોલિટિકલ ડ્રામા અને સોનિયા ગાંધીને સોંપાઈ કમાન
2017ના અંતમાં કોંગ્રેસ અધ્યક્ષ બનેલા રાહુલ ગાંધીએ 2019ની લોકસભા ચૂંટણીમાં કોંગ્રેસની બીજી કારમી હાર બાદ રાજીનામું આપી દીધું હતું. જે બાદ કોંગ્રેસ નેતાઓ રાહુલ ગાંધીને મનાવવા માટે અનેક પ્રયાસો કરી રહ્યા છે, કોંગ્રેસને રાહુલ ગાંધી સિવાય કોઈ નેતા નથી મળી રહ્યો. રાજીનામું આપતી વખતે રાહુલ ગાંધીએ કહ્યું હતું કે ગાંધી પરિવારની બહારના નેતાને પાર્ટી અધ્યક્ષ બનાવવો જોઈએ. જો કે કોંગ્રેસના નેતાઓનો મત તેનાથી વિપરીત છે. આ કારણોસર રાહુલની જગ્યાએ ફરી એકવાર સોનિયા ગાંધીને કમાન સોંપવામાં આવી હતી, જેઓ હજુ પણ કાર્યકારી અધ્યક્ષ તરીકે જવાબદારી સંભાળી રહ્યા છે.
જોકે બીજી તરફ કોંગ્રેસનો એક પક્ષ માને છે કે સોનિયા ગાંધીએ 2024ની લોકસભા ચૂંટણી સુધી પાર્ટીનું નેતૃત્વ ચાલુ રાખવું જોઈએ, જ્યારે એક વર્ગ પ્રિયંકા ગાંધીને અધ્યક્ષ તરીકે જોવા માંગે છે. એકંદરે કોંગ્રેસ અધ્યક્ષની ખુરશી પર ગાંધી પરિવાર બેસશે તેવા સંકેતો મળી રહ્યા છે.