સુનાવણી / કરોડો રૂપિયાના બીટકોઇન કૌભાંડના આરોપી નલિન કોટડિયાને હાઇકોર્ટની મોટી રાહત

બિટકોઈન તોડકાંડ મામલાના આરોપી નલિન કોટડિયાએ ગુજરાત હાઈકોર્ટમાં કાયમી જામીન માટે અરજી કરી હતી. જેના પર સુનાવણી હાથ ધરવામાં આવી હતી. ત્યારે કરોડો રૂપિયાના બીટકોઇન કૌભાંડ મામલે હાઇકોર્ટે પૂર્વ ધારાસભ્ય નલિન કોટડિયાને કાયમી જામીન આપ્યા છે. એક વર્ષ માટે અમરેલીમાં પ્રવેશ નહીં કરવાની શરતે જામીન આપવામાં આવ્યા છે. તેઓ બીટકોઇન પર કોઇ દાવો પણ નહીં કરી શકે. 

તમને જણાવી દઈએ નલિન કોટડિયા ભાજપના પૂર્વ ધારાસભ્ય છે. અમરેલી પોલીસના કેટલાક અધિકારીઓ સાથે મળી તેણે સુરતના બિલ્ડર શૈલેષ ભટ્ટનું અપહરણ કરાવ્યું હતું. તેની પાસેથી કરોડો રૂપિયાના બિટકોઈન પડાવી લીધા હતા. 

જોકે ત્યાર બાદ શૈલેષ ભટ્ટે મીડિયા સમક્ષ આવી સમગ્ર અપહરણ કાંડ અને બિટકોઈન કાંડનો ભાંડો ફોડતા મામલો ગરમાયો હતો. તપાસમાં અમરેલીના PI અનંત પટેલ, SP જગદીશ પટેલ અને નલિન કોટડિયાનું નામ ખુલ્યું હતું. જોકે ત્યાર બાદ અનેક દિવસો સુધી કોટડિયા ભૂગર્ભમાં ઉતરી ગયા હતા. પરંતુ આખરે પોલીસને તેને પકડવામાં સફળતા મળી હતી.