ધરપકડ / કોર્પોરેટર સલીમ મેમણે બંદૂકના નાળચે ખંડણી માંગી, વ્યાજખોરી અને અપહરણ મામલે પણ નોંધાઇ ફરિયાદ

કલ્પેશ પોપટે સલીમ પાસેથી 5 લાખ રૂપિયા વ્યાજે લીધા હતા. પરંતુ બે મહિનામાં વ્યાજ સાથે 5 લાખ 80 હજાર રૂપિયા પરત કર્યા હતા. તેમ છતાં સલીમ મેમણ અને તેના સાગરીતો કલ્પેશ પોપટની દુકાને ગયા હતા. બંદૂક તેમજ ચપ્પા જેવા હથિયાર બતાવી કલ્પેશ પોપટ પાસેથી 60 હજાર રૂપિયા લઇ ફરાર થઇ ગયા હતા. જેને લઈને કલ્પેશ પોપટે સલીમ મેમણ વિરુદ્ધ ફરિયાદ નોંધાવી હતી.

એલસીબી અને એસઓજી પોલીસે દમણ નગરપાલિકાના કોર્પોરેટર સલીમ મેમણની ધરપકડ કરી હતી. વાપી પોલીસે આરોપી પાસેથી ગુન્હામાં વપરાયેલ મોંઘીદાટ બે કાર પણ જપ્ત કરી છે. હાલ આરોપી કોર્પોરેટર સલીમ મેમણ ચાર દિવસના રિમાન્ડ પર છે. 

ત્યારે આરોપી સલીમ મેમણના રિમાન્ડ દરમિયાન વધુ ગુનાઓ ઉકેલાય તેવી શક્યતાઓ સેવાઈ રહી છે. જો કે, ખંડણી, વ્યાજખોરી અને અપહરણ જેવા ગંભીર આક્ષેપો બદલ દમણ નગરપાલિકાના કોર્પોરેટરની ધરપકડ થતાં ચકચાર મચી ગઈ છે.

મળતી માહિતી મુજબ સલીમ મેમણ વિરુદ્ધ નોંધાયેલ પ્રથમ ગુન્હામાં ફરિયાદી ઉપેન્દ્ર રાય છે. જેમણે સલીમ મેમણ પાસેથી 2 કરોડ 30 લાખ વ્યાજે લીધા હતા. જેનું 10 ટકા વ્યાજ દર મહિને સલીમને આપવાનું નક્કી થયુ હતું. પરંતુ સલીમે ઉપેન્દ્ર રાય પાસેથી અચાનક જ અઠવાડિયે 10 ટકા લેખે ચક્રવૃદ્ધિ વ્યાજ લેવાનું કરવાનું શરૂ કર્યુ હતું. આ ઉપરાંત સલીમ મેમણે બંદૂક બતાવી ફરિયાદીના પરિવારને બાનમાં લઇ કરોડોની સંપત્તિ પણ હડપ કરી લીધી હતી.