અમદાવાદ,ભાવનગર અને રાજકોટ ડ્રાફ્ટ TP અને પાટણમાં પ્રિલીમીનરી TP સ્કીમને ગુજરાત સરકારની મ્હોર વાગી ચૂકી છે.
CM ભૂપેન્દ્ર પટેલે TP સ્કીમને આપી મંજૂરી
અમદાવાદ,ભાવનગર અને રાજકોટ ડ્રાફ્ટ TP સ્કીમને મંજૂરી
પાટણની એક પ્રિલિમિનરી TP સ્કીમને મંજૂરી
શહેરના વિકાસ માટે સુનિયોજિત આયોજન જરૂરી છે. ટાઉન પ્લાનિંગ દ્વારા વ્યવસ્થિત રીતે શહેરમાં વિકાસના કર્યો કરવામાં આવી રહ્યા છે ત્યારે ગુજરાત સરકારે વધુ એક મોટો નિર્ણય લઈ 4 જિલ્લાની 8 ડ્રાફ્ટ ટીપી સ્કીમોને મંજૂરી આપી દીધી છે.
કયા જિલ્લાની ડ્રાફ્ટ TP સ્કીમને અપાઈ મંજૂરી
CM ભૂપેન્દ્ર પટેલે મહત્વનું પગલું ઉઠાવતા અમદાવાદની 5 ડ્રાફ્ટ TP સ્કીમ, ભાવનગર અને રાજકોટની 1-1 ડ્રાફ્ટ TP સ્કીમ, પાટણની એક પ્રિલિમિનરી TP સ્કીમને મંજૂરી આપી દીધી છે. હવે સરકાર તરફથી લીલી ઝંડી મળતા મનપા તેમજ નગરપાલિકા ટાઉન પ્લાનિંગ સ્કીમની અમલવારી માટે આયોજન હાથ ધરશે.
કઈ કઈ TP સ્કીમને લીલી ઝંડી ?
અમદાવાદના નરોડામાં ટી.પી. સ્કીમ નં. 124-A-B-C-D
અમદાવાદ સાંતેજમાં ટી.પી. સ્કીમ નં. 153
રાજકોટની વાવડીમાં ટી.પી. સ્કીમ નં. 25
ભાવનગરના સીદસરમાં ટી.પી. સ્કીમ નં. 28
કેટલી જમીન સંપાદિત કરાશે?
અમદાવાદ, રાજકોટ તેમજ ભાવનગરની સાત ડ્રાફટ ટીપી સ્કીમો મંજૂર થવાથી કુલ 72.34 હેકટર્સ જમીન સંપાદિત થશે તો આ ઉપરાંત પાટણની 01 પ્રિલીમીનરી સ્કીમને પણ મંજુરી આપવામાં આવતા કુલ 13.97 હેકટર્સ જમીન સંપાદન થશે.
ટાઉન પ્લાનિંગ સ્કીમ શા માટે?
સુઆયોજિત વિકાસ સુનિશ્ચિત કરવા અને રસ્તા, પાણી, ડ્રેનેજ, સ્ટ્રીટ લાઇટ વગેરે જેવી પ્રાથમિક સુવિધાઓ અને શાળાઓ, રમતના મેદાનો, આરોગ્યસંભાળ કેન્દ્રો વગેરે જેવી સુવિધાઓ પૂરી પાડવા માટે. સમગ્ર શહેરી વિસ્તારને આવરી લેતી તેની વિકાસ યોજના આપણા નગરોના વિકાસ માટે ઘડી કાઢવામાં આવી છે. વિકાસ યોજનાને અમલમાં મૂકવા માટે, રસ્તાઓ અને અન્ય જાહેર સુવિધાઓ જેવી કે ઉદ્યાનો અને બગીચાઓ, આરોગ્યસંભાળ કેન્દ્રો, શાળાઓ, ટાઉન હોલ વગેરે વિકસાવવા માટે જમીન સંપાદિત કરવી મહત્વપૂર્ણ છે.
આમ, રાજ્યના કુલ ૪ શહેરોની ૮ ટાઉન પ્લાનીંગ સ્કીમ મંજૂર થવાથી સમગ્રતયા ૮૬.૩૧ હેકટર્સ જમીન સંપ્રાપ્ત થશે. અત્રે ઉલ્લેખનીય છે કે આ ૮ ટાઉન પ્લાનીંગ સ્કીમ મંજૂર થતા સંપ્રાપ્ત જમીન પર સંબંધિત સત્તામંડળ જાહેર સુવિધા અને વિકાસ કામો કરી શકશે. આ ચાર શહેરોમાં સંપ્રાપ્ત જમીન પર સામાજીક અને આર્થિક રીતે નબળા વર્ગના લોકોના રહેઠાંણ, ખૂલ્લી જગ્યા, બાગ-બગીચાનું નિર્માણ થઇ શકશે તેમજ આંતરમાળખાકીય સવલતોના ખર્ચને પહોંચી વળવા વેચાણ માટેની જમીન પણ ઉપલબ્ધ બનશે. ચાર શહેરોની કુલ ૮ ટાઉન પ્લાનીંગ સ્કીમો મંજૂર થતા રાજ્યના નગરોના સુગ્રથિત અને સુઆયોજીત ઝડપી વિકાસની નેમ સાકાર થશે.