દેશમાં યુવાનોની સતત ઘટતી જતી સંખ્યાથી ચિંતામાં આવેલી ચીની સરકારે લોકોને હવે બે ને બદલે ત્રણ બાળકો પેદા કરવાની મંજૂરી આપી છે.
સતત ઘરડી થતી વસતીની ચીન પરેશાન
હવે ત્રણ બાળકો પેદા કરવાની આપી મંજૂરી
અત્યાર સુધી ફક્ત બે જ બાળકો પેદા કરી શકાતા હતા
રાષ્ટ્રપતિ જિનપિંગની અધ્યક્ષતામાં થયેલી બેઠકમાં નિર્ણય લેવાયો
ચીનની સરકારી સમાચાર એજન્સી શિન્હુઆએ જણાવ્યું કે દેશની ઘરડી થઈ રહેલી વસતીને ધ્યાનમાં લઈને બાળકો પેદા કરવાના નિયમમાં છૂટ આપવામાં આવી છે. સમાચાર સંસ્થાએ જણાવ્યું કે રાષ્ટ્રપતિ શી જિનપિંગની અધ્યક્ષતામાં થયેલી એક બેઠકમાં આ નિર્ણય લેવાયો હતો.
હકીકતમાં ચીનની વસતી 2019 ની તુલનામાં 0.53 ટકા વધીને 1.41178 અબજ થઈ ગઈ છે. 2019 માં ચીનની વસતી 1.4 અબજ હતી. ચીનની સરકાર દ્વારા જારી કરવામાં આવેલી સાતમી રાષ્ટ્રીય જનસંખ્યા અનુસાર 31 પ્રાંત, સ્વાયત્ત વિસ્તારો તથા નગરપાલિકાની વસતી 1.41178 અબજ હતી.
દેશમાં 89.4 કરોડ લોકોની ઉંમર 15 થી 59 વર્ષ
રાષ્ટ્રીય સાંખ્યિકી બ્યૂરોના જણાવ્યાનુસાર, નવી વસતીના આંકડાથી જાણકારી મળે છે ચીન એક મોટા સંકટનો સામનો કરી રહ્યો છે અને ભવિષ્યમાં તે વિકરાળ બને તેવી સંભાવના છે. કારણ કે દેશમાં 60 વર્ષથી વધારે લોકોની સંખ્યા વધીને 26.4 કરોડ થઈ ગઈ છે. દેશમાં 89.4 કરોડ લોકોની ઉંમર 15 થી 59 વર્ષની વચ્ચે છે જે 2010 ની તુલનામાં 6.79 ટકાથી ઓછી છે.
દેશમાં કામકાજી લોકોની સંખ્યા ઘટતા ચીનને આ નિર્ણય લેવો પડ્યો
ચીન સરકારે 1980 ની સાલમાં વસતી વધારો રોકવા માટે જન્મ સંબંધી નિયમો લાગુ પાડ્યાં હતા. પરંતુ હવે દેશમાં કામકાજી લોકોની સંખ્યા ઘટી રહી હોવાથી ચીનને ચિંતા થવા લાગી છે. તેથી આ નિર્ણય લેવાયો છે. ચીન સરકારે જન્મ સંબંધી સીમાઓમાં છૂટ આપી છે પરંતુ દંપતિ મોંઘવારી, નાના આવાસ તથા માતાઓ સાથે નોકરીમાં ભેદભાવને કારણે બાળકોને જન્મ આપતા અચકાતી હોય છે.