ખળભળાટ / સ્કૂલવાનમાં બાળકોને સ્કૂલે મોકલો છો તો ચેતી જજો! અમદાવાદમાં મુન્નાએ 4 વર્ષની બાળકીને કર્યા અડપલા

• કારમાં બેસાડીને બાળકી સાથે આરોપી ગંદુ કામ કરતો હોવાના આરોપ
• આનંદનગર પોલીસ મથકમાં નોંધાઈ ફરિયાદ
• પોલીસ દ્વારા વૈજ્ઞાનિક ઢબે તપાસ

અમદાવાદમાં વાલીઓ માટે લાલબત્તી સમાન કિસ્સો સામે આવ્યો છે. જો તમે તપાસ કર્યા વગર કોઈ એવા વાન ચાલક પાસે બાળકીને સ્કૂલે મોકલો છો તો ચેતી જજો નહિ તો પસ્તાવવાનો વારો આવશે. કારણ કે અમદાવાદના એક સ્કૂલ વાન ચાલકે ચાર વર્ષની બાળકી સાથે અડપલાં કર્યા હોવાનો કિસ્સો પોલીસ ચોપડે નોંધાયો છે. જેને પગલે પોલીસે આરોપીની ધરપકડ કરી કાયદાના પાઠ ભણાવ્યા છે.
 
મુન્ના દેસાઈ નામના શખ્સને પોલીસે દબોચી લીધો
ખાનગી સ્કૂલમાં બાળકોને લાવવા મુકવાની વર્ધિ કરતો અને સરખેજ વિસ્તારમાં રહેતો મુન્ના દેસાઈ નામના શખ્સને પોલીસે દબોચી લીધો હતો.ઇકો કારમાં બાળકોને સ્કૂલે લેવા મુકવા આવનાર મુન્નાએ  બાળકી સાથે અડપલાં કર્યા હતા. આ મામલે પોલીસે બાળકીએ આનંદ નગર પોલીસ મથકમાં ફરિયાદ નોંધાવી હતી. જેને પગલે તાત્કાલિક પોલીસે બનાવની ગંભીરતા દાખવી અને આ આરોપીની ધરપકડ કરી લીધી હતી. 

ફરિયાદ બાદ પોલીસે આરોપી મુન્નાની ધરપકડ કરી 
બાળકીના માતા પિતા નોકરી કરે છે. માતા પ્રાઇવેટ કંપનીમાં બિઝનેસ એનાલિસ્ટ છે અને પિતા આઇટી કંપનીમાં નોકરી કરે છે. નોકરી કરતા માતા પિતાને દસેક દિવસ પહેલા સ્કૂલમાંથી ફોન આવ્યો હતો અને તેઓએ જણાવ્યું કે તેમની ચારેક વર્ષની દીકરી ઘણી જ ઉદાસ રહે છે. જેથી માતા પિતાએ આ બાળકીને સમજાવીને પૂછપરછ કરતા તે ધ્રુસકે ને ધ્રુસકે રડવા લાગી અને બોલી કે મારે આ વાન વાલા અંકલ સાથે નથી જવું. તે મને ગમે ત્યાં અડે છે. માથા પર ખભા પર એમ અડપલાં કરે તો ક્યારેક વાનમાં આગળ તો ક્યારેક પાછળ બેસાડીને ગંદુ કામ કરે છે.  હેબતાઈ ગયેલા માતા પિતાએ બીજા જ દિવસથી બાળકીની બીમારીનું બહાનું કરી આરોપીને લેવા ન આવવાનું કહ્યું હતું અને સ્કૂલમાં આ રજુઆત કરી હતી. આખરે આરોપીનો ભાંડો ફોડતા જ માતા પિતા પોલીસ મથકે પહોંચ્યા અને ફરિયાદ કરતા પોલીસે આરોપી મુન્નાની ધરપકડ કરી હતી.

પોલીસ વૈજ્ઞાનિક ઢબે તપાસ કરવામાં જોતરાઈ
આ કેસની હકીકત સુધી પહોંચવા હવે પોલીસ વૈજ્ઞાનિક ઢબે તપાસ કરવામાં જોતરાઈ છે.અન્ય કોઈ બાળકીઓ સાથે આ અશ્લીલ હરકત કરી છે કે કેમ તેની પણ તપાસ પોલીસ કરશે.જોકે આરોપીના સાથી કર્મીઓ આ વાતને નકારી રહ્યા છે જેથી હવે વૈજ્ઞાનિક ઢબે પોલીસની તપાસ દૂધનું દૂધ અને પાણીનું પાણી કરશે. તેવું જાણવા મળી રહ્યું છે.