રાજ્યના વાતાવરણમાં અચાનક પલટો ક્યાંક વરસાદી ઝાપટાં તો ક્યાંક પડ્યા કરા

રાજકોટ: ગોંડલ પંથકમાં હવામાનમાં ઓચિંતો પલટો જોવા મળ્યો હતો. વાદળછાયા વાતાવરણ વચ્ચે વરસાદી છાંટા પડયા હતાં. આંબરડી ગામ સહિતના વિસ્તારમાં કરા સાથે કમૌસમી વરસાદ થયો હતો. જો કે ગુજરાતના વાતાવરણમાં અતિશય ગરમીનો માહોલ જામી પડ્યો છે ત્યારે આજરોજ મોડી સાંજે અચાનક વાતાવરણમાં પલટો જોવા મળ્યો હતો. અને અતિશય ગરમી વચ્ચે ગુજરાતના કેટલાક સ્થળો પર વરસાદી ઝાપટાં તો ક્યાંક વળી કરા સાથે વરસાદ જોવો મળ્યો હતો.

હાલના ગુજરાતના કેટલાક પ્રદેશોનું તાપમાન 40 ડિગ્રીને પાર કરી ગયું છે અને લોકો આ ગરમીમાં બહાર નીકળવાનું પણ ટાળી રહ્યા છે ત્યારે સૌરાષ્ટ્રના રાજકોટ નજીક આવેલ ગોંડલમાં વરસાદી માહોલ જામતા ગ્રામજનોએ રાહતનો અનુભવ કર્યો હતો. અને અતિશય ગરમી વચ્ચે થોડીવાર ઠંડક પ્રસરી જતા લોકોને આનંદ થયો હતો. તો આંબરડી ગામે બરફના કરા પડતા બાળકો સહિત મોટેરાઓ ગેલમાં આવી ગયા હતા. અને મજા માણી હતી.

ઉલ્લેખનીય છે કે રાજ્યનો સુરેન્દ્રનગર જિલ્લો હાલ અતિશય ગરમીનો અનુભવ કરી રહ્યો છે ત્યારે ગતરોજ જિલ્લાનું તાપમાન 43 ડીગ્રી નોંધાયું હતું ત્યારે રાજ્યના ગોંડલ સહિત અન્ય સ્થળોએ વરસાદ પડતા સ્થાનિકોએ રાહત અનુભવી હતી.