- તમારે કાર અને બાઈક ખરીદવુ હોય તો વધુ રૂપિયા ભરવા પડશે
- તમારે ઈન્શ્યોરન્સ માટે વધુ રૂપિયા ચૂકવવા પડશે
- થર્ડ પાર્ટી મોટર ઈન્શ્યોરન્સ પ્રીમિયમમાં વધારાનો પ્રસ્તાવ આપ્યો
દરમાં વધારાનો છે આ પ્રસ્તાવ
આવી સ્થિતિમાં તમારે 1લી એપ્રિલથી કાર અને ટુ-વ્હીલર વાહનોના વીમા માટે વધારવામાં આવેલુ પ્રીમિયમ આપવુ પડશે. કોરોના મહામારીને કારણે બે વર્ષની મુદ્દત બાદ સંશોધિત ટીપી વીમા પ્રીમિયમ એક એપ્રિલથી લાગુ થશે. ઉલ્લેખનીય છે કે, વાહન દુર્ઘટનામાં થર્ડ પાર્ટીને થયેલા આર્થિક નુકસાનની ભરપાઈ માટે આ ઈન્શ્યોરન્સ લેવો ફરજીયાત હોય છે. ઑફર કરેલા દર પ્રમાણે 1000 સીસીવાળી ખાનગી કાર પર 2019-20ના 2072 રૂપિયાની તુલનામાં 2094 રૂપિયાના દર લાગુ થશે. આ રીતે 1000 સીસીથી 1500 સીસીવાળી ખાનગી કારો પર 3221 રૂપિયાની તુલનામાં 3416 રૂપિયાના દર હશે. જ્યારે 1500 સીસીની ઉપરની કારના માલિકોને 7890 રૂપિયાની જગ્યાએ 7897 રૂપિયાનું પ્રીમિયમ આપવુ પડશે. ટુ-વ્હીલરના કિસ્સામાં 150 સીસીથી 350 સીસી સુધીના વાહનો માટે 1366 રૂપિયા પ્રીમિયમ તરીકે ચૂકવવા પડશે. જ્યારે 350 સીસીથી વધુ વાહનો માટે પ્રીમિયમ 2804 રૂપિયા હશે.
આ વાહનો માટે ડિસ્કાઉન્ટની દરખાસ્ત
કેન્દ્રીય માર્ગ અને પરિવહન મંત્રાલયની દરખાસ્ત મુજબ ઈલેક્ટ્રીક ખાનગી કાર, ઈલેક્ટ્રીક ટૂ-વ્હીલર્સ અને હાઇબ્રિડ ઇલેક્ટ્રીક વાહનો માટે ડિસ્કાઉન્ટની દરખાસ્ત પણ છે. ડ્રાફ્ટ નોટિફિકેશન મુજબ ઇલેક્ટ્રીક ખાનગી કાર, ઇલેક્ટ્રીક ટુ-વ્હીલર્સ, ઇલેક્ટ્રીક કોમર્શિયલ વેહીકલ અને ઈલેક્ટ્રીક ખાનગી વાહનો પર 15 ટકાના ડિસ્કાઉન્ટનો પ્રસ્તાવ છે. હાઈબ્રિડ ઈલેક્ટ્રીક કાર માટે નોટિફિકેશનમાં 7.5 ટકાના ડિસ્કાઉન્ટની દરખાસ્ત આપવામાં આવી છે. સુચનામાં કહેવામાં આવ્યું છે કે સુચિત ડિસ્કાઉન્ટ પર્યાવરણને અનુકૂળ વાહનોના ઉપયોગને પ્રોત્સાહિત કરશે.
