સુરતના સીમાડે અને નેશનલ હાઈવે પર આવેલું બલેશ્વર ગામ આવેલું છે. અહીં રહેવું નર્કથી પણ ભૂંડું છે. રૂડુ અને રૂપાડું આ ગામ કેન્સર દર્દીઓથી ઉભરાય છે. અહીં કેન્સરે એવો વિનાશ વેર્યો છે કે ન પૂછો વાત. આ નાનકડા ગામમાં છેલ્લા 2 વર્ષમાં 30થી વધુ વ્યક્તિઓનો કેન્સર ભરખી ગયું છે અને હાલ 100 જેટલા દર્દીઓ કેન્સરની સારવાર લઈ રહ્યા છે. વીટીવીની ટીમે બલેશ્વરમાં પહોંચી સ્થિતિનો સાચો તાગ મેળવવાનો પ્રયાસ કર્યો. ગામમાં એક પરિવારની દર્દીભરી વેદના સાંભળી અમે આગળ વધ્યા.
સ્થાનિકોની વેદના પર તંત્રના આંખ આડા કાન
સુરતના બલેશ્વરમાં ઘરે-ઘરે કેન્સરના દર્દીઓ
અત્યાર સુધીમાં અનેક લોકો કેન્સરનો બન્યા છે ભોગ
વીટીવીની ટીમ બલેશ્વરમાં જેમ જેમ આગળ વધી રહી હતી ત્યાં ત્યાં નવા નવા કેસ સામે આવી રહ્યા હતા. દરેક કેસમાં એક જ સામ્યતા હતી. ગામના અનેક પરિવારે કેન્સરથી પોતાના સ્વજનને ગુમાવ્યો હતો. ગામમાં આગળ વધી રહ્યા હતા ત્યાં વધુ એક દર્દીભરી દાસ્તાન સાંભળવા મળી.
કેન્સરે લીધા અનેક લોકોના ભોગ
વીટીવી ટીમ બલેશ્વરમાં એક પછી એક પરિવારને મળી રહી હતી ત્યાં નવા નવા ખુલાસા થઈ રહ્યા હતા. દરેક નોંધારા પરિવારને પોતાના સ્વજનને ગુમાવવાનું ભારોભાર દુઃખ હતું. અમે આગળ વધ્યા ત્યાં ચીમનભાઈ પટેલનો પરિવાર અમને મળ્યો. આ પરિવારના શબ્દોમાં ઘણું દુ:ખ હતું.
ગ્રામજનોને થઇ રહી છે કેન્સર જેવી બીમારી
આપને જણાવી દઇએ કે, બલેશ્વરમાં પ્રદૂષણે એવો ભરડો લીધો છે કે પરિવારના પરિવારો ઉજળી રહ્યા છે. પરંતુ સરકાર મુકપ્રેક્ષક બનીને આ બધો તમાશો જોઈ રહી છે. બલેશ્વરમાં પ્રદૂષણને કારણે માત્ર લોકોને કેન્સર થાય છે તેવું જ નથી. અન્ય પણ ગંભીર બીમારીઓનો ભોગ આ ગામના લોકો બન્યા છે.
બલેશ્વરમાં પ્રદૂષણે મુકી છે માઝા
બલેશ્વરમાં પ્રદૂષણે એવી માઝા મુકી છે કે ગામ લોકોનું આરોગ્ય દિવસેને દિવસે બગડી રહ્યું છે. વીટીવીની ટીમને વધુ એક ગ્રામજન મળ્યા. જેમણે પ્રદૂષણને કારણે પોતાના શરીરના વાલ બદલવા પડ્યા છે. બલેશ્વરમાં જેના કારણે લોકોની જિંદગી નર્ક બની રહી છે.
VTV એ કર્યું કંપનીનું રીયાલીટી ચેક
બલેશ્વરમાં પ્રદૂષણને કારણે લોકોનું જીવન નર્ક બની ગયું છે. આ પ્રદૂષણ કેવી રીતે ફેલાય છે અને કોણ છે તેના માટે જવાબદાર તેનું અમે રીયાલીટી ચેક કર્યું. બલેશ્વરની આસપાસના એકમોએ પ્રદૂષણ ફેલાવવા કંઈ જ બાકી રાખ્યું નથી. જે વીટીવીને તેના રીયાલીટી ચેકમાં ખબર પડી. અનેક પરિવારને નોંધારા બનાવનાર એકમો અને ફેક્ટરીઓનું વધુ રિયાલીટી ચેક કરવા અમે આગળ વધ્યા. પ્રદૂષણ ફેલાવતી કંપનીઓનું રિયાલીટી ચેક કરતા કરતા અમે આગળ વધ્યા.