ચેતી જજો / હવે ભૂલથી પણ નંબર પ્લેટ સાથે ચેડાં કર્યા તો ગયા સમજજો, થઈ શકે છે જેલમાં જવા સુધીની સજા

• વાહનચાલકો માટે મહત્વના સમાચાર
• નંબર પ્લેટમાં ચેડા કરવા પડશે ભારે
• થઈ શકે છે જેલ જવા સુધીની સજા

વાહનચાલકો માટે તાજેતરમાં જ સૌથી મહત્વના સમાચાર સામે આવ્યાં છે. જેમાં હવેથી ભૂલથી પણ જો કોઇ નંબર પ્લેટ વાળેલી દેખાશે તો તેઓની વિરૂદ્ધ કડક કાર્યવાહી કરાશે. કેટલાંય વાહનચાલકો ઓનલાઇન મેમોથી બચવા માટે જાતજાતના નુસખાંઓ અપનાવતા હોય છે. ત્યારે એવાં વાહનચાલકો વિરૂદ્ધ હવે કડક કાર્યવાહી થશે. પોલીસ આવાં વાહનચાલકો વિરૂદ્ધ એક્શન મોડમાં આવી ગઇ છે.

અત્રે નોંધનીય છે કે, આ બાબતને ગાંધીનગર ખાતે ઉચ્ચ અધિકારીઓની બેઠકમાં નોંધ લઇને આકરી કાર્યવાહી કરવાની સૂચના આપવામાં આવી છે. આ પ્રકારની ટ્રિક અજમાવતા લોકો સામે આકરા પગલાં ભરવા માટે તમામ પોલીસ કમિશનરો અને જીલ્લા પોલીસ વડાઓને સૂચના આપવામાં આવી છે. જેમાં દંડની જોગવાઇથી માંડીને વાહન જપ્તી સુધીની કાર્યવાહી કરવાનું કહેવામાં આવ્યું છે.

વળી ગયેલી નંબર પ્લેટના કારણે CCTVમાં તેની નંબરપ્લેટનો નંબર નથી દેખાતો

વ્હીકલનાં નંબર પ્લેટમાં ચેડા કરનાર સામે કાયદેસરની કડક કાર્યવાહી કરવામાં આવશે. તદુપરાંત નંબર પ્લેટમાં ચેડા કરવાના ગુનામાં જેલની સજા પણ થઈ શકે છે. કારણ કે ઘણી વાર જ્યારે ટ્રાફિક પોલીસ કોઇ વાહનચાલક જ્યારે ટ્રાફિકના નિયમ તોડતો હોય છે ત્યારે તેને ઓનલાઇન દંડ ફટકારવાનો હોય છે. પરંતુ વળી ગયેલી નંબર પ્લેટના કારણે CCTVમાં તેની નંબરપ્લેટનો નંબર નથી દેખાતો. જેના લીધે તે વાહનચાલક દંડમાંથી બચી જાય છે. ત્યારે આવાં વાહનચાલકોની હવે ખેર નહીં. વાહનચાલકો વિરૂદ્ધ કડક કાર્યવાહી કરાશે. તેમાં આ પ્રકારનો ગુનો કરનારને જેલની પણ સજા થઇ શકે છે.

રાજ્યમાં 6 માર્ચથી 15 માર્ચ સુધી ગુજરાત પોલીસ દ્વારા ચાલી રહી છે સ્પેશિયલ ડ્રાઇવ

અત્રે ઉલ્લેખનીય છે કે, રાજ્યમાં અવારનવાર ટ્રાફિક પોલીસ દ્વારા સ્પેશિયલ ડ્રાઇવ ચલાવવામાં આવતી હોય છે. ત્યારે રાજ્યમાં તારીખ 6 માર્ચથી 15 માર્ચ સુધી ગુજરાત પોલીસ દ્વારા સ્પેશિયલ ડ્રાઇવ શરૂ કરવામાં આવી છે. જેમાં હેલમેટ અને સીટ બેલ્ટ ન પહેરનારને મસમોટો દંડ ભરાવવામાં આવી રહ્યો છે. ત્યારે હવે વાહનચાલકો માટે વધુ એક માઠા સમાચાર સામે આવ્યાં છે. જેમાં આ ડ્રાઇવમાં જ પોલીસ નંબર પ્લેટ વિનાના વાહનચાલકો વિરૂદ્ધ કડક કાર્યવાહી કરી શકે છે. આથી, નંબર પ્લેટ ના લગાવી હોય તો જલ્દી લગાવી દેજો અથવા તો તૂટી ગઇ હોય તો તુરંત નવી લગાવી દેજો નહીં તો મસમોટો દંડ ભરવો પડશે અથવા તો અન્ય કોઇ કડક કાર્યવાહી પણ કરી શકે છે.

તમને જણાવી દઇએ કે, રાજ્યમાં 6 માર્ચથી 15 માર્ચ સુધી પોલીસ ડ્રાઇવ ચાલી રહી છે. જેમાં હેલમેટ કે સીટ બેલ્ટ વિનાના વાહનચાલકો સામે દંડાત્મક કાર્યવાહી કરવામાં આવી રહી છે. રાજ્યમાં માર્ગ અકસ્માતમાં મોત તથા ઇજાના બનાવો અટકાવવા માટે ગુજરાત પોલીસે 15 માર્ચ સુધી મેગા ડ્રાઇવનું આયોજન કર્યું છે. ત્યારે હેલમેટ કે સીટ બેલ્ટ નહીં પહેરનારા વાહનચાલકો પાસેથી ટ્રાફિક નિયમ ભંગ બદલ કડક દંડ વસૂલવામાં આવી રહ્યો છે. ત્યારે એમાંય પાછું હવે નંબર પ્લેટ વિનાના વાહનચાલકો વિરૂદ્ધ કડક કાર્યવાહી કરવાનો નિર્ણય લેવાયો છે.