મોટા ઉલટફેરની શક્યતા / પેટાચૂંટણીમાં હાર બાદ પ્રદેશ કોંગ્રેસમાં હડકંપ: પ્રદેશ પ્રમુખ, વિપક્ષના નેતા, પ્રભારીનું પદ જોખમમાં

• ગુજરાતની પેટાચૂંટણીમાં કોંગ્રેસની કારમી હાર બાદ હડકંપ
• હાઈકમાન્ડે પ્રદેશ કોંગ્રેસ પાસે માંગ્યો રિપોર્ટ
• પ્રદેશ પ્રમુખ, વિપક્ષના નેતા, પ્રભારીનું પદ જોખમમાં 

ગુજરાતની પેટાચૂંટણીમાં કોંગ્રેસની કારમી હાર બાદ આગામી દિવસોમાં પ્રદેશ કોંગ્રેસમાં મોટા ઉલટફેર જોવા મળે તેવી શક્યતા છે. પેટાચૂંટણીમાં પક્ષની હાર બાદ હાઇકમાન્ડ એકશન મોડમાં જોવા મળી રહ્યું છે. 

રાજ્યની પેટાચૂંટણીમાં કોંગ્રેસની હાર બાદ હાઇકમાન્ડે પ્રદેશ કોંગ્રેસ પાસે રિપોર્ટ માંગ્યો છે. ત્યારે અટકળો લગાવામાં આવી રહી છે કે રાજ્યમાં પ્રદેશ પ્રમુખ, વિપક્ષના નેતા સહિત રાજ્યના પ્રભારીનું પદ જોખમમાં જોવા મળી રહ્યું છે. 
 

ઉલ્લેખનીય છે કે ગુજરાત વિધાનસભા પેટાચૂંટણીમાં કોંગ્રેસના રકાસ બાદ નેતાગીરી પર સવાલ ઉઠ્યા હતા. જેને લઇને પ્રદેશ પ્રમુખ અમિત ચાવડા અને પરેશ ધાનાણીએ રાજીનામું આપવાની તૈયારી દર્શાવી હોવાના અહેવાલ પ્રાપ્ત થયા હતા.

હાર્દિક પટેલનો જાદુ નહીં ચાલતા કાર્યકારી અધ્યક્ષ બનાવવા પર સવાલ ઉઠ્યા હતા. કોંગ્રેસ નેૃતૃત્વના નિર્ણયોથી રાજ્યમાં સિનિયર નેતાઓમાં નારાજગી જોવા મળી હતી. રાજ્યના સિનિયર નેતાઓને સાઇડલાઇન કરવાનું પક્ષને ભારે પડ્યું હોવાને લઇને ચર્ચાએ જોર પક્ડયું હતું.