સર્ચ ઓપરેશન / કચ્છના હરામીનાળામાંથી 5 પાકિસ્તાની ફિશિંગ બોટ ઝડપાઇ, BSFએ હાથ ધર્યું પેટ્રોલિંગ

• કચ્છમાંથી વધુ એક વખત પાકિસ્તાની બોટ ઝડપાઈ
• હરામીનાળા વિસ્તારમાંથી 5 બોટ ઝડપાઈ
• BSFએ પેટ્રોલિંગ દરમિયાન ઝડપી પાડી બોટ

કચ્છના હરામીનાળાના ક્રિક વિસ્તારમાંથી 5 જેટલી બિનવારસી પાકિસ્તાની ફિશિંગ બોટ ઝડપાઇ જતા સુરક્ષા એજન્સીઓ સતર્ક બની છે. ગત મોડી રાત્રે બોર્ડર સિક્યોરિટી ફોર્સના જવાનો પેટ્રોલીંગમાં હતા તે દરમ્યાન પાકિસ્તાની ફિશિંગ બોટ મળી આવી હતી એકસાથે પાંચ પાકિસ્તાની બોટ મળી આવતા સુરક્ષા એજન્સીઓને એલર્ટ કરવામાં આવી છે.

મળતી માહિતી અનુસાર, BSFના જવાનોને પાકિસ્તાની બોટમાંથી ફક્ત માછીમારીનો સામાન જ મળી આવ્યો હતો. પાકિસ્તાની બોટમાંથી BSFને કોઈ પણ સંદિગ્ધ ચીજવસ્તુ મળી નથી પરંતુ હાલ હરામીનાળા વિસ્તારમાં BSFનું મેગા સર્ચ ઓપરેશન ચાલુ છે.

પાકિસ્તાની બોટ મળી આવી છે એટલે સંભવ પાકિસ્તાની માછીમારો કે ઘૂસણખોરો પણ આ વિસ્તારમાં છુપાયા હોવાનું માનવામાં આવી રહ્યું છે.

કચ્છની સંવેદનશીલ જળસીમાની સામેપાર પાકિસ્તાને 4 સબમરીન તૈનાત કરવાની કવાયત હાથ ધરતાં ભારતીય સુરક્ષા એજન્સીઓ વધુ સતર્ક બની છે અને ઇન્ડિયન મેરીટાઇમ બોર્ડર લાઈન પાસે પેટ્રોલીંગ વધારવામાં આવ્યું છે. હાલ સિરક્રિકમાં BSF દ્વારા સર્ચ ઓપરેશન શરૂ કરાયું છે. આ બોટમાંથી પાકિસ્તાની ચીજવસ્તુઓ મળી આવી છે.

અત્રે ઉલ્લેખનીય છે કે, થોડા દિવસો અગાઉ પણ સિરક્રિકમાંથી બે બિનવારસી પાકિસ્તાની બોટ ઝડપાઇ હતી. BSFના પેટ્રોલિંગ દરમિયાન પાકિસ્તાની બોટ ઝડપાઇ હતી. ત્યારે બોટમાં સવાર માછીમારો બોટ મૂકી અને ફરાર થઇ ગયા હતા.