મહામારી / લંચ પછી કરી લઈશું, અત્યારે દેશ માટે ઑક્સિજન બનાવવો છે - દેશના આ શ્રમિકોને સો સલામ

• બોકારો અને ભિલાઈ પ્લાન્ટમાંથી સૌથી વધારે ઓક્સિજન સપ્લાય
• પ્લાન્ટના શ્રમિકો દિવસ-રાત એક કરીને ઓક્સિજન બનાવી રહ્યાં છે
• શ્રમિકોની એક જ ભાવના-બને તેટલા વધારે લોકોના જીવ બચાવી લેવા છે

દેશમાં સોથી વધારે ઓક્સિજન સપ્લાય બોકારો સેલ અને ભિલાઈથી થઈ રહ્યો છે. 

બોકારો સેલમાં કામ કરતા મજૂરો અને અધિકારીઓ દેશ માટે ઓક્સિજન બનાવવા દિવસ-રાતનું ભાન ભૂલી ગયા છે. આ પ્લાન્ટમાંથી દરરોજ 150 ટન ઓક્સિજનનું ઉત્પાદન થઈ રહ્યું છે. મધ્યપ્રદેશથી માંડીને યુપી સુધી આ પ્લાન્ટમાંથી ઓક્સિજન સપ્લાય થઈ રહ્યો છે. મજૂરો પોતાની ચિંતા છોડીને લોકોની જાન બચાવવાના કામમાં લાગ્યાં છે. 

ટિફિનની સામે પણ જોતા નથી કર્મચારીઓ
ઝારખંડના બોકોરા સેલમાં ઓક્સિજન બનાવવા માટે બે પ્લાન્ટ કાર્યરત છે. આ બન્ને પ્લાન્ટમાં હાલમાં ત્રણ પાળીમાં કામ ચાલી રહ્યું છે. એક પાળી આઠ કલાકની હોય છે. આઠ કલાકની પાળીમાં કર્મચારીઓ સતત કામ કરે છે. સ્થિતિ તો એવી છે કે કર્મચારીઓ ટિકિન સામે પણ જોતા નથી અને સતત ઓક્સિજન બનાવી રહ્યાં છે. જ્યારે અધિકારીઓ ખાવાનું કહે છે ત્યારે મજૂરો બોલે છે કે હજુ તો ઘણું કામ છે. 

કોરોનાના દર્દીઓના જીવન બચાવવા છે-શ્રમિક 

મીડિયા સાથેની વાતચીતમાં એક શ્રમિકે જણાવ્યું કે આજે અમને કોરોનાથી પીડિત લોકોના જીવન બચાવવા માટે યોગદાન આપવાની તક મળી છે. તેથી અમે શું કામ આ સમય ગુમાવવીએ. અમને લોકોની સેવા કરવાની તક મળી છે. કામ પૂરુ થયા બાદ જ અમને ટિફિન ખાવા બેસીએ છીએ. 

બોકારો સેલ પ્લાન્ટમાંથી લખનઉ માટે ઓક્સિજન સપ્લાય થઈ રહ્યો છે. રવિવારે લખનઉથી ફરી એક વાર ઓક્સિજન એક્સપ્રેક્સ પહોંચી હતી. તેથી કર્મચારીઓ ઝડપથી કામ કરી રહ્યાં છે. કર્મચારીઓ પોતાની જાતની પણ પરવાહ કરતા નથી.

લિક્વીડ ઓક્સિજન તૈયાર થઈ રહ્યો છે
બોકારો સેલના આઈનોક્સ પ્લાન્ટમાં લિક્વીડ ઓક્સિજન તૈયાર થાય છે. મશીનો ચોવીસ કલાક ધમધમી રહ્યાં છે. સેલમાં 25 અધિકારી અને 145 મજૂરો દિવસરાત ઓક્સિજન બનાવવાનું કામ કરી રહ્યાં છે. અહીંથી 150 ટન ઓક્સિજનનું ઉત્પાદન થઈ રહ્યું છે.