અમદાવાદ / બ્લૂ લગૂન પાર્ટી પ્લોટનો આટલા કરોડનો પ્રોપર્ટી ટેક્સ નથી ભર્યો, જાણો AMCના ચોપડે કોનો ટેક્સ બોલે છે બાકી

• બ્લૂ લગૂન પાર્ટી પ્લોટનો રૂ. ૪.૭૯ કરોડથી વધુનો પ્રોપર્ટી ટેક્સ બાકી
• મ્યુનિસિપલ તિજોરીને ટેક્સ રિબેટ યોજનાથી રૂ. 35 કરોડની આવક થઈ
• ટેક્સ ડિફોલ્ટર્સની યાદીમાં બ્લૂ લગૂન પાર્ટી પ્લોટ પહેલા ક્રમાંકે

મ્યુનિ.  કોર્પોરેશનના દક્ષિણ-પશ્ચિમ ઝોનમાં આવેલા એસજી હાઈવે મકરબા પાસેના બ્લૂ લગૂન પાર્ટી પ્લોટનો આશરે રૂ. ૪.૭૯ કરોડથી વધુનો પ્રોપર્ટી ટેક્સ તંત્રના ચોપડે બાકી બોલી રહ્યો છે. આ ઝોનના ટેક્સ ડિફોલ્ટર્સની યાદીમાં આ પાર્ટી પ્લોટ પહેલા ક્રમાંકે છે.

જાણો તંત્રના ચોપડે કોના કોના લાખોના ટેક્સ બાકી 

બે દિવસ પહેલાંની તંત્ર પાસેથી મળેલી વિગત મુજબ બ્લૂ લગૂન પાર્ટી પ્લોટનાં બે ટેનામેન્ટ નંબર મુજબ પહેલામાં રૂ. ૪.૦૨ કરોડથી વધુનો અને બીજામાં રૂ. ૭૭.૪૮ લાખનો ટેક્સ હજુ ભરાયો નથી. ત્યાર બાદ આનંદનગર રોડ પરના કેમ્પસ કોર્નરની ઓફિસ નંબર ૪૦૧ની ડીબી ટેલિકોમ પ્રાઇવેટ લિમિટેડનો રૂ. ૭૬.૧૨ લાખ, વાયએમસીએ ક્લબ સામેના સર્વે નંબર ૫૯૧/૧+૨નો રૂ. ૭૪.૦૬ લાખ, એસજી હાઈવેના કર્ણાવતી ક્લબ પાસેના સેલિબ્રેશન પાર્ટી પ્લોટનો રૂ. ૬૫.૩૭ લાખ, મકરબાના સંગમ થિયેટર પાસેના પિન્કો પ્લાસ્ટિકનો રૂ. ૫૩.૩૭ લાખ, ઘેલજીપુરા એલજે કોલેજ સામેના ગુજરાત સ્ટીલ એન્ડ પાઇપ્સના રૂ. ૫૦.૨૪ લાખ, મકરબાની ટીપી ૨૦૪ અને સરવે નંબર ૫૬૯/૨ પરની આર. એચ. કાપડિયા સ્પોર્ટ્સ એકેડેમીના રૂ. ૪૮.૪૩ લાખ, સરખેજ-બાવળા રોડ પર ઉજાલા ચોકડી પાસેના પંજાબ હાઉસના રૂ. ૪૬.૦૭ લાખ, સાણંદ રોડ પરના આઇબીપી પેટ્રોલ પંપના રૂ.૪૪.૬૧ લાખ, મુમતપુરા રોડ પરના ફનફૂડ બટાલિયનના રૂ. ૩૮.૮૧ લાખ અને એસજી હાઈવે પરના ઇસ્કોન ક્રોસ રોડના એસેમ રિક્રિએશનના રૂ. ૩૭.૫૫ લાખનો ટેક્સ  તંત્રના ચોપડે બાકી બોલે છે.

જ્યારે નવા શાસકો દ્વારા પ્રોપર્ટી ટેક્સના કરદાતાઓ માટે જાહેર કરાયેલી ટેક્સ રિબેટ યોજના હેઠળ છેલ્લા દસ દિવસમાં મ્યુનિ. તિજોરીમાં આશરે રૂ. ૩૫ કરોડ ઠલવાયા છે. આ રિબેટ યોજનાનો લાભ લેવાના છેલ્લા સાત દિવસ બાકી રહ્યા છે. તા. ૩૧ માર્ચ યોજનાનો છેલ્લો દિવસ છે.

ચાલુ નાણાકીય વર્ષે વધુ આવક થશે તેવો અંદાજ

જોકે ગત તા. ૨ માર્ચથી તંત્ર દ્વારા શહેરભરમાં વ્યાપક સીલિંગ ઝુંબેશ હાથ ધરાઈ છે, જે અંતર્ગત શહેરમાં ૧૦,૦૧૨ કોમર્શિયલ મિલકતને તંત્રનાં સીલ વાગી ચૂક્યાં છે. જ્યારે ગઈ કાલે મ્યુનિ. તિજોરીમાં ટેક્સ આવક પેટે રૂ. ૪.૯૨ કરોડ ઠલવાતાં આ માર્ચ મહિનામાં તંત્રને રૂ. ૮૧.૨૫ કરોડની આવક થઈ છે. ચાલુ નાણાકીય વર્ષ ૨૦૨૦-૨૧માં ગત તા. ૧ એપ્રિલ-૨૦૨૦થી તા. ૨૩ માર્ચ-૨૦૨૧ સુધીમાં પ્રોપર્ટી ટેક્સ વિભાગને રૂ. ૧૦૪૬.૭૮ કરોડની આવક થઈ છે. જોકે હજુ પણ ગત નાણાકીય વર્ષની સરખામણીમાં રૂ. ૨૨.૯૭ કરોડની આવક ઓછી છે. જોકે નાણાકીય વર્ષ ૨૦૧૯-૨૦માં ટેક્સ વિભાગને કુલ રૂ. ૧૦૭૨.૫૭ કરોડની આવક થઈ હતી. ચાલુ નાણાકીય વર્ષે આ આવક કરતા વધુ આવક થશે તેમ લાગે છે.

એપ્રિલ-મે મહિનો લોકડાઉનને કારણે ટેક્સ આવકના ઇતિહાસમાં સૌથી નબળા મહિના

પ્રોપર્ટી ટેક્સ વિભાગને ચાલુ વર્ષે આવકની દૃષ્ટિએ જૂનમાં રૂ. ૨૩૯.૦૩ કરોડની આવક અને જુલાઈમાં રૂ. ૨૨૬.૭૮ કરોડની આવક મળતાં શાનદાર મહિના પુરવાર થયા હતા, જ્યારે એપ્રિલ-૨૦૨૦ અને મે-૨૦૨૦ એમ આખા બે મહિના લોકડાઉનને કારણે આવકની દૃષ્ટિએ અત્યાર સુધીના ટેક્સ આવકના ઇતિહાસમાં સૌથી નબળા મહિના બન્યા હતા. એપ્રિલ-૨૦૨૦માં માત્ર રૂ. ૮૭ લાખ અને મે-૨૦૨૦માં માત્ર રૂ. ૨.૨૫ કરોડની આવક થઈ હતી, જ્યારે ગત નાણાકીય વર્ષ ૨૦૧૯-૨૦માં એપ્રિલ-૨૦૧૯માં રૂ. ૨૬૫.૨૪ કરોડ અને મે-૨૦૧૯માં રૂ. ૧૬૧.૬૮ કરોડની આવક થઈ હતી.

દરમિયાન, પ્રોપર્ટી ટેક્સ વિભાગ દ્વારા આજે શહેરમાં ઉત્તર-પશ્ચિમ ઝોનમાં સપાટો બોલાવાયો હતો અને ૨૦૦થી વધુ કોમર્શિયલ મિલકતને તાળાં મરાયાં હતાં. બાકી ટેક્સ વસૂલાત ઝુંબેશ હેઠળ કરાયેલા સીલિંગ હેઠળ ગોતાના એસજી બિઝનેસ હબની સૌથી વધુ મિલકતને તાળાં મરાતાં ટેક્સ ડિફોલ્ટર્સમાં ફફડાટ પેસી ગયો હતો.