મતસંગ્રામ / 2002માં અમિત શાહ, 2017માં ભૂપેન્દ્ર પટેલે જંગી લીડથી રચ્યો ઈતિહાસ: પણ આજ સુધી કોઈ તોડી નથી શક્યું નરોત્તમ પટેલનો રેકૉર્ડ

• વિધાનસભામાં ભાજપના નરોત્તમ પટેલના નામે સૌથી વધારે મતની લીડનો વિક્રમ
• નરોત્તમ પટેલ બાદ સૌથી વધુ મતની લીડ સાથે વિજેતા થવાનો રેકોર્ડ અમિત શાહના નામે
• 2017માં CM ભૂપેન્દ્ર પટેલના ફાળે 1.17 લાખની લીડ, 2012માં આનંદીબેનને 1.10 લાખની લીડ

ગુજરાતની 15મી વિધાનસભા ચૂંટણીની તારીખો જાહેર થઇ ગઇ છે. તારીખ 1 અને 5 ડિસેમ્બરના રોજ મતદાન અને 8મીએ મતગણતરી એટલે કે પરિણામ જાહેર થઇ જશે. ત્યારે શું તમે જાણો છો કે, રાજ્યમાં અત્યાર સુધીમાં સૌથી વધુ મતની લીડનો વિક્રમ કોના નામે લખાયો છે. નહીં  ને તો આજે અમે તમને અહીં તેની વિગતવાર માહિતી આપીશું.

સૌથી વધારે 3,46,940 મતની લીડનો વિક્રમ ભાજપના નરોત્તમ પટેલના નામે

તમને જણાવી દઇએ કે, વર્ષ 1962થી લઇને વર્ષ 2017 સુધીની કુલ 13 ચૂંટણીમાં સૌથી વધારે 3,46,940 મતની લીડનો વિક્રમ ભાજપના નરોત્તમ પટેલના નામે છે. ગુજરાત વિધાનસભાની ચૂંટણીમાં છેલ્લા કેટલાક સમયથી સૌથી વધારે મતની લીડ અમદાવાદમાં જોવા મળે છે. 2007ની ચૂંટણીમાં ચોર્યાસી બેઠક પરથી નરોત્તમ પટેલે આ રેકોર્ડ સર્જ્યો હતો. 1995 અને 1998માં પણ તેઓએ અનુક્રમે 1,31,000 અને 1,47,000ની લીડ મેળવી હતી. છેલ્લી બે ચૂંટણી પર જો નજર કરીએ તો 2017માં ઘાટલોડિયા બેઠક પર CM ભૂપેન્દ્ર પટેલને 1,17,750 મતની લીડ પ્રાપ્ત થઇ હતી. જ્યારે આ જ બેઠક (ઘાટલોડિયા) પર 2012માં આનંદીબેન પટેલને સૌથી મોટી 1,10,395 મતની લીડ પ્રાપ્ત થઇ હતી.

અત્યાર સુધીના બીજા ક્રમાંકની સૌથી મોટી લીડ અમિત શાહના નામે

વધુમાં તમને જણાવી દઇએ કે, નરોત્તમ પટેલ બાદ સૌથી વધારે મતની લીડ સાથે વિજેતા થવાનો જો રેકોર્ડ કોઇના નામે હોય તો તે છે કેન્દ્રીય ગૃહમંત્રી અમિત શાહ. કારણ કે અમિત શાહે પણ વર્ષ 2002ની ચૂંટણીમાં અમદાવાદની સરખેજ બેઠક પરથી 1,58,036 મતની લીડ પ્રાપ્ત કરી હતી. જ્યારે 2007ની ચૂંટણીમાં પણ સરખેજ બેઠકેથી અમિત શાહે 2,35,823 મતની લીડ સાથે વિજય હાંસલ કર્યો હતો. જેને અત્યાર સુધીના બીજા ક્રમાંકની સૌથી મોટી લીડ કહી શકાય.

વિશેષમાં વર્ષ 1980 સુધીની ચૂંટણીમાં જીતનું માર્જિન એકપણ બેઠક પર 50 હજાર સુધી પહોંચતું ન હોતું. જોકે 1990માં હાર-જીતના માર્જિનમાં ઉછાળો આવ્યો હતો. આ ચૂંટણીમાં ઊંઝા બેઠક પરથી જનતાદળના ચીમનભાઇ પટેલે 70,345 મતની લીડ મેળવી હતી. ત્યાર બાદ 1995માં ચોર્યાસી બેઠક પરથી ભાજપના નરોત્તમ પટેલે 1,31,149 મતની લીડ હાંસલ કરી હતી.

2012ની ચૂંટણી નવા સીમાંકન પ્રમાણે ગુજરાતમાં ફરીથી જીતનું માર્જિન ઘટવા લાગ્યું

1998ની ચૂંટણીમાં પણ ચોર્યાસી બેઠક પરથી જ નરોત્તમ પટેલે 1,47,142 મતની લીડ મેળવી હતી. જ્યારે 2012ની ચૂંટણી નવા સીમાંકન પ્રમાણે ગુજરાતમાં ફરીથી જીતનું માર્જિન ઘટવા લાગ્યું હતું.