વિશ્લેષણ / BJPએ થોડી હજુ મહેનત કરી હોત તો જુદું આવ્યું હોત પરિણામ! 42 બેઠકો પર 5 હજાર વોટથી હાર્યા, આંકડા ચોંકાવનારા

• કર્ણાટક વિધાનસભાની ચૂંટણીના પરિણામનું વિશ્લેષણ
• કોંગ્રેસે 135 સીટો પર જબરદસ્ત જીત હાંસલ કરી
• અનેક બેઠકો પર ઓછા મતના અંતરે હારજીત

કર્ણાટક વિધાનસભાની ચૂંટણીમાં કોંગ્રેસે 224 માંથી 135 સીટો પર જબરદસ્ત જીત હાંસલ કરી છે. જેને લઇને પાર્ટીને 43% વોટ શેર પણ મળ્યા છે ત્યારે કોંગ્રેસની આ જ શાનદાર જીતને લઈને વિશ્લેષણ કરતા ચોંકાવનારા આંકડા સામે આવ્યા છે. જેમાં કોંગ્રેસે 2018 ની ચૂંટણીની  સરખામણીએ આ વર્ષે ઘણી સીટો પર આરામથી જીત હાંસલ કરી હતી. બીજી તરફ એવી પણ અનેક બેઠકો છે જ્યાં ખૂબ ઓછા અંતરે જીત મેળવી છે. જેમાં ભાજપની થોડી ઘણી મહેનતથી કોંગ્રેસના ઉમેદવારની હાર નિશ્ચિત થઈ શકી હોત!

2018 ની સરખામણીએ આ ચૂંટણીમાં 12 બેઠકો એવી હતી જેમાં ખરાખરીનો ખેલ સર્જાયો હતો અને જીતવા વાળા ઉમેદવાર તથા બીજા નંબરે રહેલો ઉમેદવાર વચ્ચે માત્ર 5 હજારથી પણ ઓછા મતનો જ ગાળો રહ્યો હતો. 42 સીટો એવી હતી જેમાં થોડાક હજાર મત આડાઅવળા થઈ ગયા હોત તો જીતનું પરિણામ કંઈક અલગ જ હોત આવી સીટોમાં કોંગ્રેસને 22 ભાજપના 17 અને બાકી જનતા દળને મળી છે. ટુંકા અંતરે જીત બાદ બીજા નંબર પર પણ ભાજપના જ ઉમેદવાર રહ્યા હતા. બેંગ્લોર ક્ષેત્રની જયનગર સીટ પર ખરાખરીનો મુકાબલો જોવા મળ્યો હતો જેમાં ભાજપ તરફી મેદાનમાં ઊતરેલા સીકે રામમૂર્તિને  કોંગ્રેસના સૌમ્યા રેડીએ માત્ર 16 મતથી હરાવ્યા હતા. જે સૌથી ઓછા અંતરે જીતવાળી બેઠક સાબીત થઈ હતી.

વધુમાં મધ્ય કર્ણાટકની બે અને બેંગ્લોરની બે સીટ મળી કુલ 8 બેઠક એવી હતી જેમાં જીતનું અંતર 1000 થી પણ ઓછા મતે રહ્યું હતું. 2018 ની ચૂંટણી કરતા કોંગ્રેસે 2023 ની ચૂંટણી નિર્ણાયક જનાદેશ સાથે જીત મેળવી છે. તો પાર્ટીએ 20,000 થી વધુ મત સાથે 63 બેઠકો પર જીત મેળવી હતી અને 2018માં આવી સીટ માત્ર 20 જ હતી. આ જીત પરથી એ નિશ્ચિત થઈ રહ્યું છે કે કોંગ્રેસે ગ્રામીણ સીટ ઉપર પોતાનું પ્રભુત્વ જમાવી રાખ્યું હતું 97 માંથી 74 બેઠકો પર કોંગ્રેસે દસ હજારથી વધુ મતો સાથે જીત મેળવી હતી.

શિવકુમારે 1.2 લાખથી વધુ મત સાથે ચૂંટણી જીતી

વધુમાં આંકડાનું વિશ્લેષણ કરતા સામે આવ્યું છે કે કોંગ્રેસે સૌથી વધુ જીત પોતાના પ્રદેશ અધ્યક્ષ ડીકે શિવકુમારની સીટ પરથી મેળવી છે અને ડી કે શિવકુમાર મુખ્યમંત્રી પદના સંભવિત ઉમેદવાર પણ છે. કનકપુરા ક્ષેત્રમાંથી મેદાનમાં ઉતરેલા શિવકુમારે 1.2 લાખથી વધુ મત સાથે ચૂંટણી જીતી હતી. જે 2018 માં માત્ર 79 હજાર વોટ સાથે જીત મેળવી હતી.ચૂંટણીના વિશ્લેષણ દરમિયાન એ પણ સામે આવ્યું કે ભાજપ 111 સીટ પર બીજા સ્થાને રહી હતી જેમાં 103 સીટો પર કોંગ્રેસને જીત મેળવી છે તો 73 સીટો પર જીતનું અંતર 10,000 થી વધુ છે આમ રાજ્યમાં 95 સીટો એવી છે. જેમાં 20,000 થી વધુ મતનું અંતર છે. 8 બેઠકો એવી છે. જેમાં જીતનું માર્જિન NOTA દ્વારા મળેલા મતો કરતાં ઓછું છે. જેમાંથી પાંચ બેઠક કોંગ્રેસના ખાતામાં ગઈ છે. જ્યારે ભાજપે ત્રણ બેઠકો જીતી છે.