ચિંતા / હરિયાણામાં એક લાખ મરઘીના મોતથી હડકંપ, ઉત્તરથી લઈને દક્ષિણ સુધી આટલા રાજ્યોમાં બર્ડ ફ્લૂનો ખૌફ

• ભારતમાં વિવિધ રાજ્યોમાં બર્ડ ફ્લૂની પુષ્ટિ 
• હરિયાણામાં એક લાખથી વધારે મરઘીઓના મોત 
• કેરળમાં એક સ્પેશિયલ ટીમ તૈનાત કરવામાં આવી 

કોરોના વાયરસની રસીને ભારતમાં મંજૂરી મળી ગયા બાદ હવે નવી મુસીબત દેશમાં માથું ઊંચકી રહી હોય તેવું દેખાઈ રહ્યું છે. દેશમાં કેટલાય રાજ્યોમાં બર્ડ ફ્લૂ ફેલાઈ રહ્યો છે. રાજસ્થાન, મધ્ય પ્રદેશ બાદ હિમાચલ અને કેરળમાં પણ બર્ડ ફ્લૂની દહેશત જોવા મળી છે જેના કારણે અલર્ટ જાહેર કરવામાં આવ્યું છે. 

મધ્ય પ્રદેશમાં ચિંતા વધી 

મધ્યપ્રદેશમાં ટપોટપ કાગડાઓની મોત થઈ રહી જે બાદ મીડિયા સાથે વાતચીતમાં મધ્ય પ્રદેશનાઆ પશુપાલન મંત્રીએ કહ્યું કે કાગડાઓના સેમ્પલને ભોપાલની ટેસ્ટ લેબમાં આપવામાં આવ્યા છે. ઈન્દોર અને મંદસોરમાં બર્ડ ફ્લૂની પુષ્ટિ થઈ ગઈ છે. બર્ડ ફ્લૂને ધ્યાનમાં રાખીને પોલ્ટ્રી ફાર્મમાં ખાસ નજર રાખવાના આદેશ આપી દેવામાં આવ્યા છે. 

હિમાચલમાં બર્ડ ફ્લૂની પુષ્ટિ 

નોંધનીય છે કે હિમાચલ પ્રદેશના પોન્ગ ડેમમાં હજારોની સંખ્યામાં પક્ષીઓની મોત થઈ છે જેમાં રીપોર્ટ પણ પોઝિટિવ આવ્યો છે. આ પક્ષીઓના રિપોર્ટમાં બર્ડ ફ્લૂ સામે આવ્યો છે અને આ ડેમની આસપાસ માંસ અને ઈંડાના વેચાણ પર પ્રતિબંધ કરી દેવામાં આવ્યો છે. 

હરિયાણામાં એક લાખથી વધુ મરઘીઓના મોત 

હરિયાણામાં બરવાલામાં રહસ્યમય રીતે મરઘીઓ મરી રહી છે અને તેના કારણે એવિયન ફ્લૂનો ડર સતાવી રહ્યો છે. એક લાખથી વધારે મરઘીઓના મોત થાય છે. પાંચ ડિસેમ્બરથી સતત મરઘીઓના મોત સામે આવી રહ્યા છે અને 110 મરઘી ફાર્મમાં રહસ્યમય મોત સામે આવી છે. તંત્ર આ મોતના કારણે અલર્ટ છે અને સેમ્પલ મોકલવામાં આવ્યા છે.     

રાજસ્થાનના જિલ્લાઓમાં બર્ડ ફ્લૂની પુષ્ટિ 

ગુજરાતના જૂનાગઢના માણાવદરમાં એક સાથે 53 જેટલા મૃત પક્ષીઓ મળી આવ્યા હોવાના અહેવાલ છે અને વન વિભાગની ટીમ ઘટનાસ્થળે પહોંચતા તપાસ કરવામાં આવી રહી છે. રાજસ્થાનના કેટલાય જિલ્લાઓમાં બર્ડ ફ્લૂના કેસ સામે આવ્યા છે કારણ કે એક સાથે સેંકડોની સંખ્યામાં કાગડાઓ મરેલા મળી આવ્યા હતા. સૌથી પહેલા ઝાલાવાડમાંથી આ ખબર બહાર આવી હતી અને તે બાદ સૂચનાઓ અનુસાર હવે કોટા, પાલી, જયપુરમાં પણ આવા કેસ સામે આવી રહ્યા છે. 

દક્ષિણ સુધી ફેલાયો આ બર્ડ ફ્લૂ 

ભારતમાં ઉત્તર જ નહીં દક્ષિણમાં પણ બર્ડ ફ્લૂ પગપેસારો કરી રહયો છે. કેરળના  અલાપપ્પુઝા અને કોટ્ટાયમમાં બર્ડ ફ્લૂ સામે આવ્યો છે અને તેના કારણે તંત્રની ચિંતામાં વધારો થયો છે. બંને જિલ્લામાં ક્વિક રીએક્શન ટીમ તૈનાત કરી દેવામાં આવી છે.