ગુજરાતમાં કોની લહેર? / ગુજરાતના ઈતિહાસના સૌથી મોટા ઉલટફેર: કોંગ્રેસને 1990 કરતાં પણ મોટો ઝટકો

• ગુજરાતમાં સતત સાતમી વખત ભાજપ સરકાર બનાવવા તરફ આગળ વધી રહ્યું
• કોંગ્રેસના ઇતિહાસમાં અત્યાર સુધીનું સૌથી ખરાબ પ્રદર્શન 
• ગુજરાતમાં 27 વર્ષથી ભાજપ સત્તા પર

ગુજરાત વિધાનસભાની ચૂંટણીના પરિણામો હાલ જાહેર થઈ રહ્યા છે અને ગુજરાતમાં સતત સાતમી વખત ભાજપ સરકાર બનાવવા તરફ આગળ વધી રહ્યું છે. ગુજરાત વિધાનસભા ચૂંટણીના પરિણામોમાં હાલ ભાજપ આગળ ચાલી રહ્યું છે. જણાવી દઈએ કે વિધાનસભાની ચૂંટણીના 182 બેઠકોના વલણ સામે આવ્યા છે.  જેમાં ભાજપ 153, કોંગ્રેસ 20, AAP 6 અને 3 બેઠકો પર અન્ય આગળ ચાલી રહ્યું છે.  ગુજરાતની અનેક બેઠક પર અણધાર્યા પરિણામો આવી રહ્યા છે અને હાલનું વલણ જોતાં લાગી રહ્યું છે છે ભાજપ જંગી બહુમતી સાથે સરકાર બનાવશે. આ સાથે જ કોંગ્રેસ માટે અનેક સીટ પરથી માઠા સમાચાર આવી રહ્યા છે. 

કોંગ્રેસના ઇતિહાસમાં અત્યાર સુધીનું સૌથી ખરાબ પ્રદર્શન 
ગુજરાતમાં 1960થી વિધાનસભાની ચૂંટણીઓ યોજાઈ રહી છે પણ અત્યાર સુધીના ચૂંટણી ઈતિહાસમાં કોંગ્રેસે આટલું ખરાબ પ્રદર્શન આજ સુધી નથી કર્યું. હાલનું વલણ જોતાં લાગી રહ્યું છે કે રાજ્યની 182 બેઠકોમાંથી ભાજપ 150થી વધુ બેઠકો પર આગળ છે, જ્યારે કોંગ્રેસ માત્ર 18થી 20બેઠકો આવી શકે છે. દેશની સૌથી જૂની પાર્ટી કોંગ્રેસ ક્યારેય ગુજરાત પર તેની પકડ જમાવી શકી નથી પણ એક વિપક્ષ તરીકે હંમેશા ભાજપને ટક્કર આપતા આવી છે. 

કોંગ્રેસને પડ્યો મોટો ફટકો 
અત્યાર સુધીના ગુજરાત પર કોંગ્રેસના ઇતિહાસની વાત કરીએ તો વર્ષ 1990માં કોંગ્રેસનું સૌથી ખરાબ પ્રદર્શન જોવા મળ્યું હતું એ સમયની ચૂંટણીમાં કોંગ્રેસ માત્ર 33 સીટો જીતવામાં સફળ રહી હતી. એ બાદ કોંગ્રેસને 2002માં 50 બેઠકો મળી હતી તો વર્ષ 2007માં તેને 59 બેઠકો મળી હતી. વર્ષ 2017ની ચૂંટણીની વાત કરી તો પાર્ટીએ 77 બેઠકો જીતીને ભાજપને ટક્કર આપી. પણ હાલની વિધાનસભાની ચૂંટણીમાં આ વખતે કોંગ્રેસને મોટો ફટકો પડ્યો છે. જણાવી દઈએ કે કોંગ્રેસનું સર્વશ્રેષ્ઠ પ્રદર્શન 1985માં ગુજરાતમાં હતું અને એ સમયે પાર્ટીને 149 સીટો મળી હતી. 

27 વર્ષથી ભાજપ સત્તા પર
ગુજરાતના ઇતિહાસની વાત કરી તો 27 વર્ષથી ભાજપ ગુજરાત પર સત્તામાં આવે છે અને આ વખતેના આંકડા જોઈને પણ લાગી રહ્યું છે કે ભાજપ રેકોર્ડ જીત સાથે સરકાર બનાવશે. 2002ની ચૂંટણીમાં ભાજપે ગુજરાતમાં 127 બેઠકો જીતી હતી અને આ વખતે ટ્રેન્ડમાં આ આંકડો 150 ની નજીક પહોંચી ગયો છે. જણાવી દઈએ કે વર્ષ 2002માં નરેન્દ્ર મોદીએ બીજી વખત ગુજરાતના મુખ્યમંત્રી તરીકે શપથ લીધા હતા.