ઈન્ડિયન પ્રીમિયર લીગ (IPL) ની 17મી આવૃત્તિ 22 માર્ચથી શરૂ થઈ રહી છે. આ સિઝનમાં ઘણા મોટા અને દિગ્ગજ ખેલાડીઓ રમશે, જે તેમની છેલ્લી સિઝન હોવાનું અનુમાન લગાવવામાં આવી રહ્યું છે. ગુરુવાર સવારથી એક અહેવાલની ચર્ચા થઈ રહી છે જેમાં આઈપીએલ 2024 પછી એક સ્ટાર ખેલાડીના નિવૃત્તિના સમાચાર સામે આવ્યા છે. તમને જણાવી દઈએ કે આ ખેલાડી 2008ની પ્રથમ સિઝનથી આગામી IPL 17માં કોઈને કોઈ ટીમનો ભાગ છે. તેનું નામ છે દિનેશ કાર્તિક જે લાંબા સમયથી ટીમ ઈન્ડિયાની બહાર છે અને હવે આઈપીએલ 2024 તેની છેલ્લી સીઝન પણ હોઈ શકે છે.
છેલ્લી 16 સીઝનમાં માત્ર 2 મેચ ચૂકી
એક અહેવાલમાં જણાવ્યું છે કે ભારતીય વિકેટકીપર બેટ્સમેન દિનેશ કાર્તિક તેની છેલ્લી IPL સિઝન રમવા માટે તૈયાર છે. કાર્તિક જૂનમાં 39 વર્ષનો થશે. રિપોર્ટમાં એવું પણ કહેવામાં આવ્યું છે કે, IPL બાદ કાર્તિક પોતાની ઈન્ટરનેશનલ કરિયર વિશે પણ નિર્ણય લઈ શકે છે. દિનેશ કાર્તિક એ સાત ખેલાડીઓમાંથી એક છે જેણે સતત પ્રથમ સિઝનથી IPLમાં ભાગ લીધો છે. ખાસ વાત એ છે કે કાર્તિક છેલ્લી 16 સિઝનમાં માત્ર બે મેચ જ મિસ કરી શક્યો છે. દિનેશ કાર્તિક આઈપીએલના ઈતિહાસમાં માત્ર અનુભવી અને સૌથી વૃદ્ધ ખેલાડી નથી, તે સૌથી નિયમિત ખેલાડી પણ છે. 2008માં તેની પ્રથમ સિઝનમાં તે એક મેચ ચૂકી ગયો હતો. તે સમયે તે દિલ્હી ડેરડેવિલ્સ (હવે દિલ્હી કેપિટલ્સ) નો ભાગ હતો. તે પછી કાર્તિક 2023 માં ગ્રુપ સ્ટેજની બીજી મેચ ચૂકી ગયો જ્યારે તે સનરાઈઝર્સ હૈદરાબાદ સામે આરસીબી તરફથી રમ્યો ન હતો.
છેલ્લી સિઝન સારી રહી ન હતી
દિનેશ કાર્તિકે 2023ની IPL સિઝનમાં કંઈ ખાસ પ્રદર્શન કર્યું ન હતું. તે આખી સિઝનમાં માત્ર 140 રન જ બનાવી શક્યો હતો. તેની શાનદાર રમત 2022માં જોવા મળી હતી. તેણે 55ની એવરેજથી 330 રન બનાવ્યા હતા. આ જ કારણ હતું કે તેને T20 વર્લ્ડ કપ 2022 માટે ટીમમાં જગ્યા મળી. જોકે, તે ટુર્નામેન્ટમાં કાર્તિક 3 ઇનિંગ્સમાં માત્ર 14 રન જ બનાવી શક્યો હતો. ત્યારથી તે ટીમ ઈન્ડિયાની બહાર છે.
વધુ વાંચો : રાજનીતિમાં 'દાદા'ની એન્ટ્રી! બંગાળથી ચૂંટણી લડવાની તૈયારીમાં સૌરવ ગાંગુલી, જાણો કઈ પાર્ટી આપી શકે છે ટિકિટ
દિનેશ કાર્તિકનો આઈપીએલ રેકોર્ડ
દિનેશ કાર્તિક આઈપીએલ ઈતિહાસમાં સૌથી વધુ રન બનાવનાર અને સર્વશ્રેષ્ઠ વિકેટકીપર છે. તેણે 242 મેચમાં 4516 રન બનાવ્યા હતા. IPLમાં તેના નામે 20 અડધી સદી છે. આ સિવાય દિનેશ કાર્તિકે વિકેટ પાછળ અદ્ભુત પ્રદર્શન કર્યું અને અત્યાર સુધીમાં આ ટૂર્નામેન્ટમાં કુલ 133 કેચ અને 36 સ્ટમ્પિંગ કર્યા છે. કાર્તિક 2018 થી 20 સુધી IPLમાં KKRનો કેપ્ટન હતો. આ પહેલા પણ તેણે છ મેચમાં કેપ્ટનશિપ કરી હતી. તેની પાસે કેપ્ટનશિપનો રેકોર્ડ છે. 43 મેચમાંથી 21 જીત અને 21 હાર. જ્યારે એક મેચ ટાઈ રહી હતી.
VTV Gujarati Newsની તમામ અપડેટ સૌથી પહેલા મેળવવા માટે અમારી WhatsApp ચેનલ ફોલો કરો
