રેડ / સુરત: હાઈપ્રોફાઈલ જુગારધામનો પર્દાફાશ, સ્ટેટ મોનિટરિંગ સેલ અને પોલીસે શટર તોડી 99 લોકોને ઝડપ્યાં, અંદરની હાલત ચોંકાવનારી

• સુરતમાં હાઈપ્રોફાઈલ જુગારધામ પર મોટો દરોડો
• બેગમપુરામાં તુલસી ફળીયામાં જુગાર રમતા 99 લોકો ઝડપાયા
• રેડ દરમિયાન આસિફ ગાંડા સહિત બે લોકો ફરાર થયા

હાલ કોરોના સંકટ વચ્ચે સુરતમાં સ્ટેટ મોનિટરિંગ સેલ અને પોલીસને મોટી સફળતા મળી છે. સુરતના બેગમપુરામાં તુલસી ફળિયામાં એક મકાનમાં ચાલી રહેલા જુગારધામ પર સ્ટેટ મોનિટરિંગ સેલ અને પોલીસે બાતમીના આધારે મોટી રેડી પાડી હતી. મહત્વનું છે કે, સેન્સિટીવ વિસ્તાર હોવાથી સ્ટેટની ટીમે સ્થાનિક પોલીસની પણ મદદ માંગી હતી. પોલીસે શટર તોડી રેડ કરી હતી.

બેગમપુરા વિસ્તારમાં તુલસી ફળિયામાં સિલાય મશીનના કામની આડમાં ચાલતાં જુગારધામ પર સ્ટેટ મોનિટરિંગ સેલ દ્વારા દરોડા પાડવામાં આવ્યા હતા. આ દરમિયાન 99 શકુનીઓને તો રંગેહાથ ઝડપી પાડવામાં આવ્યા હતા. આ સાથે મોબાઇલ, લાખો રૂપિયાના મુદ્દામાલ સહિત તમામને ઝડપી પાડવામાં આવ્યા છે. પરંતુ આ જુગારધામ નામચીન આસિફ ગાંડા દ્વારા ચલાવવામાં આવતું હોવાની પ્રાથમિક માહિતી મળી છે. ત્યારે આ આસિફ ગાંડા સહિત અન્ય બે લોકો ફરાર થયા હોવાનું સામે આવ્યું છે. હાલ પોલીસે 99 આરોપીઓને ઝડપી આગળની કાર્યવાહી હાથ ધરી છે.

મહત્વનું છે કે, હાલ કોરોનાનો કહેર ચાલી રહ્યો છે તેવામાં સાવચેત રહેવા અને સંક્રમણ અટકાવવાના બદલે જુગારીઓ કોરોના ડર વિના જ મોટી સંખ્યામાં જુગાર રમવા ભેગા થતા હતા. આ એર કન્ડિશનર બિલ્ડિંગમાં બન્ને માળમાં અલગ અલગ પ્રકારના જુગાર રમાડવામાં આવતા હતા.

ત્યારે અનેક સવાલ થાય છે કે, શું આ જુગારધામ અત્યાર સુધી કોની રહેમનજર નીચે ચાલતું હતું. અત્યાર સુધી કેમ કોઇ કાર્યવાહી ન થઇ. શું આ જુગારધામ સાંઠગાંઠથી ચાલતું હતું. શું જુગારીઓને મહામારી નથી નડતી? કોરોના કાળમાં કેમ ધમધમે છે ક્લબ?