ભૂપેન્દ્રસિંહ ચુડાસમાની જીતને પડકારતી અરજીનો મામલે આજે હાઈકોર્ટમાં તમામ પક્ષે રજૂઆતો પૂર્ણ થઇ છે. હાલ હાઇકોર્ટે ચુકાદો અનામત રાખ્યો છે. 10 ફેબ્રુઆરી બાદ કોર્ટ મહત્ત્વનો ચુકાદો આપશે.
જીતને પડકારતી પિટિશન પર ગુજરાત હાઇકોર્ટ સુનાવણી
હાઇકોર્ટમાં તમામ પક્ષે આજે રજૂઆતો પૂર્ણ થઇ
હાઇકોર્ટે ચૂકાદો અનામત રાખ્યો
ધોળકા વિધાનસભા બેઠક પરથી શિક્ષણ મંત્રી ભૂપેન્દ્રસિંહે જીત મેળવી હતી. તેમની જીતને પડકારતી પિટિશન પર ગુજરાત હાઇકોર્ટમાં સુનાવણી ચાલી રહી છે. ત્યારે શુક્રવારે હાઇકોર્ટે રજૂઆતો પૂર્ણ કરીને ચુકાદો અનામત રાખ્યો છે. 10 ફેબ્રુઆરી બાદ કોર્ટ મહત્વનો ચુકાદો આપશે. 10 ફેબ્રુઆરી સુધી બંને પક્ષો લેખિત રજૂઆતો કોર્ટ સમક્ષ મુકશે.
શું હતો મામલો?
ગુજરાત વિધાનસભાની 2017માં યોજાયેલી ચૂંટણીમાં ભાજપના ઉમેદવાર ભૂપેન્દ્રસિંહ ચુડાસમા ધોળકા બેઠક પરથી માત્ર 327 મતે જીત્યા હતા. આ મત ગણતરીમાં બેલેટ પેપરની ગણતરી કરવામાં ના આવતા સમગ્ર વિવાદ ઉદ્ભવ્યો હતો. આ મામલે કોંગ્રેસના ઉમેદવાર અશ્વિન રાઠોડે ફરિયાદ કરી હતી કે બેલેટ પેપરના 429 જેટલા મત તેમના તરફી હતા તેને ધ્યાને લેવામાં આવ્યા ન હતા.
ચૂંટણી પંચના નિયમ અનુસાર EVMની મત ગણતરી પહેલા બેલેટ પેપરની ગણતરી કરવાની જોગવાઇ છે. જોકે, આ નિયમને બાજુમાં મુકી EVMની સીધી મત ગણતરી કરવામાં આવી હતી. આચારસંહિતા હતી ત્યારે ભૂપેન્દ્ર ચુડાસમાને લાભ કરાવવાના હેતુથી ડેપ્યુટી કલેક્ટર તરીકે ગૌરાંગ પ્રજાપતિના સ્થાને ધવલ જાનીની નિમણૂંક કરાઇ હતી.