ધન્યતા / સુરતમાં અલગ અલગ પંડાલમાં બાપ્પાના દર્શન કરી આશીર્વાદ મેળવતા મુખ્યમંત્રી, સી.આર.પાટીલ સહીતના રહ્યા હાજર

• સુરતમાં CMએ  ગણપતિ પંડાલે કર્યા દર્શન 
• શહેરના અલગ-અલગ વિસ્તારોમાં પંડાલોમાં કર્યા દર્શન
• ભાજપ પ્રમુખ સી.આર.પાટીલ પણ રહ્યાં ઉપસ્થિત

ગણેશોત્સવ 31મી ઓગસ્ટ 2022ના રોજ ગણેશ ચતુર્થીથી શરૂ થયો હતો. જે  9મી સપ્ટેમ્બર 2022ના રોજ અનંત ચતુર્દશીના રોજ સમાપ્ત થશે. ત્યારે સુરતમાં અનેક સ્થળોએ ગણેશ મહોત્સવનું આયોજન કરવામાં આવ્યું છે. તેવામાં અગાઉ અમદાવાદ ત્યારબાદ ગઈકાલે વડોદરા અને આજે રાજ્યના મુખ્યમંત્રી ભૂપેન્દ્ર પટેલે સુરત ખાતે દુંદાળા દેવના દર્શન કરી ધન્યતા અનુભવી હતી. આજે CM ભૂપેન્દ્ર પટેલ સુરતમાં ગણપતિના દર્શને પહોંચ્યા હતા. જ્યાં ગણપતિ પંડાલમાં આરતી કરી અને દર્શનનો લાભ લીધો હતો.ઉપરાંત સ્થાનીક નેતાઑ સાથે મુખ્યમંત્રી ભૂપેન્દ્ર પટેલે શહેરના અલગ-અલગ વિસ્તારોમાં પંડાલોમાં દર્શન કર્યા હતા. આ તકે મુખ્યમંત્રીનું સાલ ઓઢાડી સન્માન કરવામાં આવ્યું હતુ. આ અવસરે પ્રદેશ ભાજપ પ્રમુખ સી.આર.પાટીલ સહીતના આગેવાનો જોડાયા હતા.

ગઈકાલે વડોદરામાં મુખ્યમંત્રીએ ગણેશજીના દર્શનનો લાભ લીધો
વડોદરામાં લગભગ 500 થી વધુ સ્થળોએ અલગ અલગ સાર્વજનિક પંડાલ લાગ્યા છે.  ત્યારે ગઇકાલે મુખ્યમંત્રી ભૂપેન્દ્ર પટેલ વડોદરામાં દુંદાળા દેવની આરતી ઉતારી હતી. આ ઉપરાંત શહેરના 10 જેટલા સ્થળોએ ગરવા ગણેશજીના દર્શનનો લાભ લીધો હતો. આ દરમિયાન મુખ્યમંત્રીનો કાફલો અચાનક આવી પહોંચતા ભાવિકો પણ ખુશ થયા હતા . ઠેર ઠેર પંડાલમાં સીએમને કુમકુમ તિલક કરી સ્વાગત કરવામાં આવ્યું હતું. આમ ખુદ રાજ્યના સીએમ ગણેશ મોત્સવમાં સહભાગી થતા મંડળોમાં પણ ઉત્સાહ જોવા મળ્યો હતો. 

ગણેશ વિસર્જનની તૈયારીઓને આખરી ઓપ આપતું સુરત મનપા
ગણેશ વિસર્જનને લઈ સુરત મહાનગર પાલિકા દ્વારા તૈયારીઓને આખરી ઓપ આપી દેવામાં આવ્યો છે. તાપી નદીમાં તેમજ દરિયામાં બોટ તૈયાર રહેશે. કૃત્રિમ તળાવ પર CCTV કેમેરા લગાવાશે અને સંવેદનશીલ વિસ્તારોમાં 15 ડ્રોનથી નજર રાખવામાં આવશે. વધુમાં 978 પોલીસકર્મી બોડી વોર્ન કેમેરા સાથે સુરક્ષામાં ગોઠવાશે. હજીરા ખાતે 22 ક્રેન પણ વિસર્જન માટે ઊભી કરી દેવામાં આવી છે.80 જેટલા પોલીસ બાઈક સતત પેટ્રોલિંગ કરશે. માટીની નાની મૂર્તિઓનું વિસર્જન તાપી નદીમાં કરાશે. 5 ફૂટતી વધુ ઉંચાઈવાળી મૂર્તિના વિસર્જન માટે અલગથી વ્યવસ્થા કરવામાં આવી છે. 2 એડિશનલ CP, 16 DCP, 28 ACP, 95 PIનો બંદોબસ્તમાં રહેશે. 237 PSI, 5000 કોન્સ્ટેબલ, 16 SRP, 1 RAF, 5600 હોમગાર્ડ, 1350 TRB જવાન ખડેપગે રહેશે.