મહામારી / એક તરફ ઈન્જેક્શન માટે લાઇનો અને આ હોસ્પિટલમાંથી 800 રેમડેસિવિરની ચોરી થતાં હડકંપ, પોલીસ થઇ દોડતી

• ભોપાલની હોસ્પિટલમાં ચોરી
• 800થી વધારે રેમડેસિવિર ઈન્જેકશનની ચોરી
• થોડા સમય પહેલા જ નવો સ્ટોક આવ્યો હતો

મળતી માહિતી અનુસાર, રાજધાની ભોપાલની હમીદિયા હોસ્પિટલના મેડિકલ સ્ટોરમાંથી 800 થી વધુ રેમેડિસિવિરના ઇન્જેક્શન ચોરાઈ ગયા છે. આ તમામ ઇન્જેક્શન શનિવારે કોરોનાથી સંક્રમિત ગંભીર દર્દીઓમાં આપવાના હતા. હોસ્પિટલ વહીવટી તંત્ર અને પોલીસે આ કેસની તપાસ શરૂ કરી દીધી છે.

 આશરે 816 નંગ રેમેડિસિવિર ઇન્જેક્શનની ચોરી 

ઉલ્લેખનીય છે કે, આ મેડિકલ સ્ટોરમાંથી આશરે 816 નંગ રેમેડિસિવિર ઇન્જેક્શનની ચોરી થઇ હોવાનો અંદેશો છે. આ ઇન્જેક્શનનો સ્ટોક થોડા દિવસ પહેલા જ ભોપાલ આવ્યો હતો. બના અંગેની જાણ થતાં જ પોલીસ કાફલો ઘટના સ્થળે પહોંચ્યો છે અને પ્રાથમિક તપાસ હાથ ધરી હતી. 

મંત્રીએ ગણાવી ગંભીર ઘટના 

આ અંગે શિવરાજ સરકારના મંત્રી વિશ્વાસ સારંગે જણાવ્યું હતું કે, ઇન્જેક્શન ચોરીની આ પ્રથમ ઘટના છે અને ખૂબ જ ગંભીર બાબત છે. આ ઘટના ફરી રિપીટ ન થાય તે માટે તપાસ જરૂરી છે. 

પૂર્વ મુખ્યમંત્રીએ સરકાર પર કર્યા આકરા પ્રહાર 

भोपाल के हमीदिया अस्पताल से,
—800 से अधिक रेमडेसिविर इंजेक्शन चोरी।

“शिवराज का जंगलराज”

— MP Congress (@INCMP) April 17, 2021

આ ઘટનાને પગલે પૂર્વ મુખ્યમંત્રી કમલનાથે મધ્યપ્રદેશ સરકાર પર નિશાન સાધ્યું હતું. કમલનાથે કહ્યું કે મધ્યપ્રદેશમાં કોરોના સંક્રમિતોના આંકડા સતત વધી રહ્યા છે, સંક્રમણ દર દરરોજ વધી રહ્યો છે, એક્ટિવ દર્દીઓની સંખ્યા સતત વધી રહી છે. શું આજની પરિસ્થિતિમાં, હોસ્પિટલોમાં પથારી નથી, ઓક્સિજન નથી, ઇન્જેક્શન નથી?

24 કલાકમાં નવા 2,34,692 નવા કેસ નોંધાયા

દેશમાં કોરોનાનો કહેર વધી રહ્યો છે. રોજના આંકડામાં સતત વધારો થઇ રહ્યો છે. ત્યારે છેલ્લા 24 કલાકમાં નવા 2,34,692 નવા કેસ નોંધાયા છે અને 1341 લોકોના મોત થયા છે. જ્યારે નવા 1,23,354 દર્દીઓ સાજા થયા છે.આમ, દેશમાં કુલ કેસ 1,45,26,609 પર પહોંચ્યા છે. અત્યાર સુધીમાં દેશમાં કુલ 1,26,71,220 દર્દીઓ સાજા થઇ ચૂક્યા છે. હાલ 16,79,740  એક્ટિવ કેસ છે અને 1,75,649 દર્દીઓના મોત થઇ ચૂક્યા છે. જ્યારે કુલ 11,99,37,641 વેક્સિનના ડોઝ અપાઇ ચૂક્યા છે.

આ 5 રાજ્યોમાં સૌથી વધુ કેસ નોંધાયા

મહારાષ્ટ્રમાં સૌથી વધુ 63,729 નવા કેસ નોંધાયા છે અને ઉત્તરપ્રદેશમાં 27,360 નવા કેસ. દિલ્હીમાં 19,486 નવા કેસ નોંધાયા છે. જ્યારે છત્તીસગઢમાં 14,912 નવા કેસ અને કર્ણાટકમાં 14,859 નવા કેસ નોંધાયા છે. આ પાંચ રાજ્યોમાં સૌથી વધુ કેસ નોંધાઇ રહ્યા છે. તો ગુજરાતમાં 8920 નવા કેસ નોંધાયા અને 94 દર્દીઓના મોત થયા છે.