પોતાની માંગણીઓને સમર્થન આપે તે હેતુસર આજે ભારતીય કિસાન સંઘ ગાંધીનગર ધારાસભ્યોના નિવાસસ્થાને પહોંચ્યો. જ્યાં આગેવાનોની અટકાયત કરાઇ.
ભારતીય કિસાન સંઘ દ્વારા કરાયો અનોખો વિરોધ
ધારાસભ્યોના નિવાસસ્થાને જઈ સમર્થન માંગ્યું
સમર્થન માંગવા આવેલા આગેવાનોની અટકાયત
ભારતીય કિસાન સંઘ દ્વારા આજે ગાંધીનગર ખાતે અનોખો વિરોધ કરવામાં આવ્યો. કિસાન સંઘ આજે ગાંધીનગરમાં ધારાસભ્યોના નિવાસસ્થાને પહોંચ્યો હતો. જ્યાં તેઓએ ધારાસભ્યોનું સમર્થન માંગ્યુ હતું. કિસાન સંઘના આગેવાનો પોતાની માંગો લઇને પહોંચ્યા હતા.
કિસાન સંઘ દ્વારા પોતાની માંગણીઓમાં ધારાસભ્યો પણ સાથ આપે તે માટે સમર્થન માંગવામાં આવ્યું. જોકે, ધારાસભ્યોનું સમર્થન માંગવા આવેલા કિસાન સંઘના આગેવાનોની અટકાયત કરી લેવાઇ હતી.
કિસાન સંઘના આગેવાનો ધારાસભ્યોને મળ્યા હતા
ઉલ્લેખનીય છે કે, અગાઉ પણ કિસાન સંઘના આગેવાનો દ્વારા સરકારે બનાવેલી કમિટીના સભ્યો એવા મંત્રીઓના નિવાસસ્થાનને ઘેરવાનો કાર્યક્રમ કરવામાં આવ્યો હતો. નોંધનીય છે કે, વિધાનસભા સત્રનો આજે છેલ્લો દિવસ છે. ત્યારે કિસાન સંઘના આગેવાનો આજે ધારાસભ્યોને મળ્યા હતા અને વિધાનસભામાં તેઓની માંગણી ઉઠાવવાની માંગ કરી હતી.
સત્યાગ્રહ છાવણી ખાતે રાજ્યભરના 500થી વધુ લોકોનું શ્રમિક સંમેલન
મહત્વનું છે કે, છેલ્લા કેટલાય દિવસથી ગાંધીનગરમાં વિવિધ કર્મચારીઓ દ્વારા આંદોલન કરવામાં આવી રહ્યાં છે. ત્યારે બીજી બાજુ આજે ગાંધીનગરમાં સત્યાગ્રહ છાવણી ખાતે રાજ્યભરના 500થી વધુ લોકોનું શ્રમિક સંમેલન પણ યોજાયું છે. 18 જેટલી માંગણીઓ લઈને આ સંમેલનનું આયોજન કરવામાં આવ્યું છે. સરકાર સમક્ષ શ્રમિકો માટે આવાસ અને ટોયલેટ જેવી સુવિધાની તેઓ માંગ કરી રહ્યાં છે. વારંવાર થતા અકસ્માત અંગે સરકાર પોલિસી બનાવે તેવી તેઓ માંગ કરી રહ્યાં છે.
VCE કર્મીઓ અને આરોગ્ય કર્મીઓ હજુ યથાવત
આ સાથે આજે VCE કર્મીઓની હડતાળનો પણ 14મો દિવસ છે. ત્યારે VCE કર્મીઓ પણ આજે સત્યાગ્રહ છાવણી ખાતે ધરણાં પર બેસશે. ગાંધીનગરમાં VCE કર્મીઓ પણ હડતાળ કરી રહ્યાં છે. બીજી બાજુ જિલ્લા પંચાયત હસ્તકના આરોગ્ય કર્મીઓની હડતાળ હજુ આજે પણ યથાવત જ છે. આરોગ્ય કર્મીઓની સતત બીજા દિવસે ભૂખ હડતાળ યથાવત જોવા મળી રહી છે.
એટલે કે આજે સ્વર્ણિમ પાર્ક ખાતે આરોગ્ય કર્મીઓ એકત્ર થશે. મહત્વનું છે કે, તેઓની પગાર વિસંગતતાની મુખ્ય માંગણી પર સરકાર સાથેની વાટાઘાટ નિષ્ફળ રહી છે. તેઓ ગ્રેડ પે, કોરોના રજા પગાર તથા ટ્રાવેલ અલાઉન્સ મુદ્દે હડતાળ ઉપર ઉતરેલા છે.