સુરક્ષા / હવે સશસ્ત્ર સુરક્ષાદળોના જવાનોની રક્ષા કરશે ‘ભાભા કવચ’, આખરે શું છે તેની વિશેષતા?

જુલાઈ મહિનામાં રાજધાની નવી દિલ્હીમાં આતરરાષ્ટ્રીય પોલીસ પ્રદર્શન-2019માં ઑર્ડિનન્સ ફેક્ટરીઓ દ્વારા નિર્મિત હથિયારો અને ઉપકરણો પણ પ્રદર્શિત કરવામાં આવ્યા હતા. જેની નોડલ એજન્સી ઓઈએફ કાનપુરને બનાવવામાં આવી હતી. આ પ્રદર્શનમાં ઓઈએફમાં બનેલા ખુબ હળવા અને સુરક્ષિત બુલેટપ્રૂફ જેકેટ ‘ભાભા કવચ’ (Bhabha Kavach) સશસ્ત્રદળોથી લઈને પોલીસ અધિકારીઓને પણ બહુ પસંદ પડ્યા હતા.

સશસ્ત્રદળોની સાથે સાથે પંજાબ, હિમાચલપ્રદેશ, ગુજરાત, રાજસ્થાન, છત્તીસગઢ, પશ્ચિમ બંગાળ, કર્ણાટક, ઝારખંડ અને ઓડિશાના પોલીસ અધિકારીઓએ પણ આ બુલેટપ્રૂફ જેકેટ માટે ઓઈએફનો સંપર્ક સાધ્યો છે. ઓઈએફના જનરલ મેનેજર વી.કે. ચૌધરીએ જણાવ્યું કે, પંજાબ પોલીસ બહુ જલ્દી અમને 500 બુલેટપ્રૂફ જેકેટ (bulletproof jacket) નો ઓર્ડર આપવાની છે. સુરક્ષાદળોથી લઈને અન્ય રાજ્યોની પોલીસ સાથે પણ હાલ અમારી વાતચીત ચાલી રહી છે.

તમામ લોકોને અમે પ્રોફાર્મા ઈનવૉઈસ અને ટેસ્ટ રિપોર્ટ મોકલી આપ્યા છે. ‘ભાભા કવચ’ વિશ્વના સર્વશ્રેષ્ઠ બુલેટપ્રૂફ જેકેટ છે. વિયેટનામ, મલેશિયા, ઈન્ડોનેશિયા અને આફ્રિકી દેશોમાં પણ આ જેકેટની નિકાસ ટૂંક સમયમાં ચાલુ કરવામાં આવશે તેવું ચૌધરીએ જણાવ્યું હતું.

બુલેટપ્રૂફ જેકેટને કઈ રીતે મળ્યું ‘ભાભા’નું નામ?

આ બુલેટપ્રૂફ જેકેટને ‘ભાભા કવચ’નું નામ આપવામાં આવ્યું તેની પાછળ પણ રસપ્રદ વાત છે. હકીકતમાં ભાભા એટૉમિક રિસર્ચ સેન્ટર (BARC)એ આ બુલેટપ્રૂફ જેકેટ બનાવવા માટે કાર્બન નેનો ટેક્નોલોજી પૂરી પાડી છે. જેકેટના નિર્માણમાં અદ્યતન ટેક્નિક ઉપરાંત હાઈડેન્સિટી અને હાઈટેન્સિટી (વધુ મજબૂત અને એકદમ અસરકારક) ફેબ્રિકનો ઉપયોગ કરવામાં આવ્યો છે.

‘ભાભા કવચ’ની આ છે અનોખી વિશેષતાઓ:

- છાતીથી લઈને પીઠ સુધીના ભાગની 360 ડિગ્રી સુરક્ષા કરે છે.
- 7.62 મિલીમીટર હાર્ડ સ્ટીલ કોર બલેટવાળી એકે-47, 5.56 મિલીમીટરની ઈન્સાસ અને 7.65 મિલીમીટરની એસએલઆર માટે પણ આ અભેદ્ય છે.
- પારંપરિક 17 કિલો વજન ધરાવતા જેકેટની સરખામણીએ લગભગ અડધું એટલે કે ફક્ત 9.2 કિલોગ્રામ વજન ધરાવે છે.
- કેન્દ્રિય ગૃહ મંત્રાલય દ્વારા નિર્ધારિત કરવામાં આવેલા વજનથી પણ અડધો કિલો ઓછું વજન છે.
- વૈશ્વિક બજારમાં તેના સેગમેન્ટના આ સૌથી સસ્તા દરના જેકેટ છે.
- અમેરિકા, ઈઝરાયલ અને જર્મનીમાં બનેલા જેકેટ જ આ જેકેટને ટક્કર આપી શકે તેમ છે.