BIG BREAKING / 'સ્કૂલમાં બોમ્બ છે'નો મેઇલ આવતા જ બેંગલુરૂમાં પોલીસ દોડતી થઈ ગઇ, 6 શાળામાં સર્ચ ઓપરેશન

• 6 શાળાઓને મળી બોમ્બથી ઉડાવી દેવાની ધમકી
• શાળાઓમાં સર્ચ ઓપરેશન શરૂ
• કોઈ પણ શાળામાંથી વિસ્ફોટકો નથી મળ્યા

બેંગલુરુની છ શાળાઓમાં બોમ્બની ધમકીનો ઈ-મેઈલ આવતા ભારે અફરાતફરીનો માહોલ ફેલાઇ ગયો હતો. મળતી માહિતી અનુસાર, હાલ તમામ છ શાળાઓમાં પરીક્ષાઓ ચાલી રહી છે. દરમિયાન, સવારે 11 વાગ્યે એક ઈ-મેઈલ આવ્યો હતો કે શાળાના પરિસરમાં બોમ્બ મૂકવામાં આવ્યો છે. ત્યાર બાદ તુરંત પોલીસ તાત્કાલિક ઘટનાસ્થળે પહોંચી ગઈ હતી.

જો કે, સર્ચ ઓપરેશનમાં કોઇ પણ જગ્યાએથી વિસ્ફોટક સામગ્રી નથી મળી આવી. આ મામલે પોલીસનું કહેવું છે કે, અત્યાર સુધી તો તે એક ખોટો મેસેજ એટલે કે ફર્જી મેસેજ હોવાનું લાગી રહ્યું છે. પોલીસે જણાવ્યું કે, કોરોના સંક્રમણ ઓછો થવાના કારણે હવે તમામ શાળાઓ ખુલી ગઇ છે અને છ શાળાઓમાં પરીક્ષાઓ શરૂ હતી એ દરમ્યાન આ ઈ-મેઈલ આવ્યો હતો.

જાણો બેંગલુરુની કઇ 6 શાળાઓને બોમ્બની ધમકીના ઈ-મેઈલ મળ્યા હતા?

1. ડીપીએસ વર્થુર
2. ગોપાલન ઇન્ટરનેશનલ સ્કૂલ
3. ન્યુ એકેડમી સ્કૂલ
4. સેન્ટ. વિન્સેન્ટ પૌલ સ્કૂલ
5. ઈન્ડિયન પબ્લિક સ્કૂલ ગોવિંદપુરા
6.Ebenezer ઇન્ટરનેશનલ સ્કૂલ, ઇલેક્ટ્રોનિક સિટી

પોલીસે જણાવ્યું કે, ઈ-મેઈલ મળતાની સાથે જ પોલીસ અને બોમ્બ ડિસ્પોઝલ સ્ક્વોડને તમામ શાળાઓમાં મોકલી દેવાઇ હતી. તમામ શાળાઓ ખાલી કરાવ્યા બાદ તુરંત ત્યાં ચેકિંગ હાથ ધરવામાં આવી રહ્યું છે.