ફાયદાકારક / શિયાળામાં રોજ ગાજર ખાઈ લેશો તો મળશે જબરદસ્ત ફાયદા, આટલા રોગો રહેશે દૂર

• ગાજરના ફાયદા જાણી રોજ ખાશો
• કેન્સર સામે રક્ષણ આપે છે ગાજર
• હાર્ટના રોગોથી દૂર રાખે છે ગાજર

ગાજરના ફાયદા  

આંખોનું તેજ વધારે છે

ગાજરમાં બીટા કેરોટીન ભરપૂર પ્રમાણમાં આવેલું છે, જે વિટામિન 'એ'માં પરિવર્તન પામે છે. ખાસ કરીને રાત્રે જોવામાં તકલીફ પડતી હોય (રતાંધળાપણું) તો રેગ્યુલર ગાજર ખાવાથી તે દૂર થાય છે. મેક્યુબર ડિજનરેશન અને મોતિયાને પણ બીટા કેરોટીનથી રક્ષણ મળે છે. 

કેન્સર સામે રક્ષણ

ગાજર ખાવાથી કેન્સર સામેનું રિસ્ક ઓછું થાય છે. ખાસ કરીને ફેફસાંનું કેન્સર, બ્રેસ્ટ કેન્સર, કોલોન કેન્સર સામે રક્ષણ આપે છે. ફાલ્કેરિનોલ (Falcarinol) નામનું તત્ત્વ જે ગાજરમાં આવેલું છે તે કેન્સરનું રિસ્ક ઓછું કરી દે છે અને એ રીતે રક્ષણ આપે છે. 

એન્ટિ એજિંગ

આપણા શરીરમાં આવેલા સેલ રોજ ઘસાય છે અને રોજ નવા બને છે. ગાજરમાં આવેલા એન્ટિઓક્સીડેન્ટ સેલના ડેમેજને થતું રોકે છે. તેથી સેલ્સનું એજિંગ ઓછું થાય છે અને જુવાની વધુ સમય ટકેલી રહે છે. 

ત્વચા ચમકદાર બનાવે છે

ગાજરમાં આવેલા એન્ટિઓક્સીડેન્ટ અને વિટામિન એ ત્વચાને સૂર્યથી થતા ડેમેજથી બચાવે છે. વિટામિન 'એ'ની ઊણપથી ત્વચા સૂકી થવા લાગે છે. વાળ અને નખ પણ બરછટ અને બરડ થઈ જાય છે. સારા પ્રમાણમાં લેવામાં આવતાં વિટામિન 'એ'ના કારણે ત્વચામાં કરચલી ઓછી થાય છે. ખીલ નથી થતાં. સૂકી ત્વચા, ત્વચા પર થતા ડાઘા વગેરે દૂર રહે છે. 

હાર્ટના રોગોથી દૂર રાખે છે

બીટા કેરોટીનથી ભરપૂર ખોરાકથી હાર્ટના રોગથી દૂર રહે છે. ગાજરમાં બીટા કેરોટીન ઉપરાંત, તેમાં એલ્ફા કેરોટીન અને લ્યુટીન પણ છે. ગાજરને રેગ્યુલર ખાવાથી કોલેસ્ટેરોલમાં ઘટાડો થાય છે, જેથી હાર્ટ સ્વસ્થ રહે છે. 

શરીરની સફાઈ કરે છે 

વિટામિન 'એ' લીવરમાં જઈને શરીરના ટોક્સિનને બહાર કાઢવાનું કામ કરે છે. તે લીવરમાંના બાઇલ અને ફેટને બહાર કાઢવાનું કામ કરે છે. ગાજરમાં આવેલાં ફાઇબર્સ કોલોનને સાફ કરી શરીરનો કચરો બહાર કાઢે છે. 

ગાજર ખાતાં પહેલાં આટલું ધ્યાન રાખો 

• તેને બરાબર સફાઈ કરીને સલાડની જેમ ખાવ. તેનો જ્યૂસ કાઢવાથી તેમાં રહેલા ફાઇબર્સનો નાશ થાય છે. 
• જો તમે વજન ઉતારવા માંગતાં હો તો દિવસના 1થી 2 નંગ ગાજર ખાવાં. વધુ પડતાં ગાજર ખાવાથી વજન ઉતારવામાં મુશ્કેલી થઈ શકે છે.