મહારાષ્ટ્ર / ગર્લફ્રેન્ડનાં ગર્ભવતી થવા મુદ્દે બેદરકારી રાખવી એ આત્મહત્યા માટેનું કારણ ન કહેવાય, બોમ્બે હાઇકોર્ટે યુવકને આપ્યા જામીન

• બોમ્બે હાઈકોર્ટે આરોપીને જમીન આપતા મહત્વપૂર્ણ અવલોકન કર્યું
• ગર્લફ્રેન્ડનાં ગર્ભવતી થવા મુદ્દે બેદરકારી રાખવી એ આપઘાતનું કારણ ન કહેવાય
• પૂણેમાં એક છોકરીએ પોતે ગર્ભવતી હોવાની આશંકાએ બોયફ્રેન્ડને જાણ કરી હતી 
• બોયફ્રેન્ડે કથિત રીતે બેદરકારી રાખતા યુવતી આપઘાત કરી લીધો હતો

બોમ્બે હાઈકોર્ટે એક આરોપી યુવકને જમીન આપતા મહત્વપૂર્ણ અવલોકન કર્યું છે. બોમ્બે હાઈકોર્ટે કહ્યું હતું કે, જો ગર્લફ્રેન્ડ કહે કે તે ગર્ભવતી છે અને બોયફ્રેન્ડ તેને લઈ ઉદાસીનતા બતાવે તો તેને આત્મહત્યા માટે ઉશ્કેરણી ન કહી શકાય. વાત જાણે એમ હતી કે, આ છોકરાની 16 વર્ષની ગર્લફ્રેન્ડે આત્મહત્યા કરી લીધી હતી. જે બાદમાં યુવકની ધરપકડ પણ કરાઇ હતી. જોકે પોસ્ટમોર્ટમ રિપોર્ટમાં ખબર પડી કે તે ગર્ભવતી પણ નથી. 

શું હતી સમગ્ર ઘટના ? 

મહારાષ્ટ્રના થાણે જિલ્લામાં ગત 3 માર્ચ 2021ના રોજ એક યુવતીએ પોતાના રૂમમાં ફાંસી લગાવી આત્મહત્યા કરી લીધી હતી. જેમાં પ્રાથમિક તપાસમાં સામે આવ્યું હતું કે, યુવતીને શંકા હતા કે તે ગર્ભવતી છે તેથી તેને પોતાના બોયફ્રેન્ડને વાત કરી હતી. જોકે તેના બોયફ્રેન્ડે કથિત રીતે બેદરકારી રાખતા યુવતી આપઘાત કરી લીધો હતો. જેથી યુવતીની માતાએ મૃતકના બોયફ્રેન્ડ વિરુદ્ધ ફરિયાદ નોંધાવી હતી. જેમાં તેમણી પુત્રી અને છોકરાની વોટ્સએપ ચેટ પણ રજૂ કરી હતી. 

આ તરફ પોલીસ દ્વારા પણ માર્ચ 2021માં આરોપીની ધરપકડ કરી હતી. આ સાથે તેની સામે આત્મહત્યા માટે ઉશ્કેરણી અને પોક્સોની વિવિધ કલમો હેઠળ કેસ નોંધવામાં આવ્યો હતો. જોકે આ બધામાં એક નોંધનીય બાબત એ રહી કે, છોકરીને તે પોતે ગર્ભવતી હોવાની શંકા હોઈ તેને બોયફ્રેન્ડને વોટ્સએપ પર જાણ કરી હતી. જોકે બોયફ્રેન્ડે ઉદાસીન પ્રતિક્રિયા આપી. આનાથી ગુસ્સે ભરાયેલી યુવતીએ પોતાના રૂમમાં ગળેફાંસો ખાઈ લીધો હતો. 

બોમ્બે હાઇકોર્ટે શું કહ્યું ? 

આ તરફ તાજેતરની સુનાવણી પછી જસ્ટિસ ભારતી ડાંગરેએ કહ્યું કે, છોકરી કદાચ ગર્ભવતી થવાની તેની આશંકાથી ચિંતિત હતી અને જ્યારે તેને છોકરા તરફથી ઉદાસીન જવાબ મળ્યો ત્યારે તેણે આત્મહત્યા કરી. આ કેસમાં આત્મહત્યા માટે ઉશ્કેરણી સાબિત કરવી જરૂરી છે, જે આરોપીની અચાનક ઉદાસીન પ્રતિક્રિયાથી સાબિત થતું નથી. છોકરો ઘણો નાનો હતો તેને જોતા તેને 25 હજારના બોન્ડ પર જામીન આપવામાં આવ્યા છે.