પંચમહાલના વેજલપુરની એક મહિલા સાથે પરપ્રાંતીય યુવાને ફેસબુક પર મિત્રતા કરી હતી. મૂળ રાજસ્થાનના જોધપુરના ધન્નારીકલા ગામના હર્ષવર્ધન બાબુલાલ સોની નામના યુવાને ફેસબુક મિત્રતાને અનૈતિક સંબંધો સુધી લઈ ગયો હતો. ઉંમરમાં પાકટ એવી મહિલા અને યુવાન વચ્ચે થયેલી ચેટિંગ અને ટેલિફોનિક વાતચીતના પ્રભાવમાં આવી મહિલાએ રાજસ્થાનમાં રહેતા યુવાનને વેજલપુર ખાતે પોતાના ઘરે મહેમાન ગતિ માણવા બોલાવ્યો હતો. યુવાન વેજલપુર આવી જતા મહિલા પોતાના પરિવાર સાથે યુવાનને લેવા ગઈ હતી. બે દિવસમાં યુવાન પરિવાર સાથે હળીમળી જતા વધુ 10 દિવસ રોકાયો હતો.
આ દિવસોમાં મહિલા અને યુવાન વચ્ચે શારીરિક સંબંધો બંધાયા હતા. આ દરમ્યાન યુવાને બંને વચ્ચેની અંગત પળોના ફોટા મોબાઈલથી પાડી લીધા હતા. વેજલપુરમાં આનંદ માણ્યા બાદ યુવક પોતાના વતન રાજસ્થાન જતો રહ્યો હતો. આ સમગ્ર મામલાથી યુવતીનો આખો પરિવાર અજાણ હતો. યુવાન રાજસ્થાન પહોંચ્યા બાદ ફેસબુક પર રાજા રાની સોની અને વ્હોટ્સએપ પર ફ્રેન્ડ્સ ગ્રુપ બનાવી વેજલપુર અને આસપાસના લોકોને ફ્રેન્ડ રિકવેસ્ટ મોકલી પોતાના ગ્રુપમાં એડ કરી મહિલાના પોતાની સાથેના ફોટો વાયરલ કર્યા હતા અને અંગત પળોના અશ્લીલ ફોટો વાયરલ કરવાની ધમકી આપી એક કરોડ રૂપિયાની માંગણી કરી હતી. આ બાબતે મહિલાએ સ્થાનિક વેજલપુર પોલીસ મથકે ફરિયાદ કરતા પોલીસે ફેસબુકના યુવકના રાજા રાની એકાઉન્ટના આઈ.પી એડ્રેસના આધારે યુવકને રાજસ્થાનથી ઝડપી પાડ્યો હતો.
આ સમગ્ર ઘટનામાં આરોપી યુવકે ટેક્નોલોજીનો બખૂબી ઉપયોગ કર્યો હતો. ફેસબુક પર ફેક એકાઉન્ટ બનાવી તેના દ્વારા ફોટો વાયરલ કરવાની ધમકી આપી અને તે ધમકી આપવા માટે પણ પોતાના ટેક્નિકલ જ્ઞાનનો ઉપયોગ કરી અલગ-અલગ સીમકાર્ડ વસાવી તેના પરથી મહિલાને ધમકી આપી પૈસાની માંગણી કરતો હતો. એટલે સુધી કે જે નંબરથી ફોન આવતા હતા તે નંબર ટ્રેસ પણ ન થઇ શકે તેવા હતાં. વેજલપુરની મહિલાની ફરિયાદના આધારે આરોપીને આઈ.ટી.એક્ટ મુજબ ગુનો નોંધ્યો છે અને વધુ પુરાવાઓ એકત્ર કરવાની કાર્યવાહી હાથ ધરી છે.