IPL / BCCIએ પ્લેઓફના કાર્યક્રમની જાહેરાત કરીઃ ફાઇનલ યોજાશે આ સ્થળે

આની સાથે BCCIએ વુમન્સ T-20 ચેલેન્જ એટલે કે વુમન્સ IPLના કાર્યક્રમની પણ જાહેરાત કરી છે.

BCCIના જણાવ્યા અનુસાર તા. 5 નવેમ્બરે પ્રથમ ક્વોલિફાયર દુબઈમાં ભારતીય સમય અનુસાર સાંજના 7:30 વાગ્યે રમાશે. આ મુકાબલો IPL 2020ના પોઇન્ટ ટેબલમાં પ્રથમ અને બીજા સ્થાન પર રહેલી ટીમ વચ્ચે રમાશે. આ મુકાબલામાં જે ટીમ જીતશે તે સીધી IPLની ફાઇનલમાં પહોંચી જશે.

એલિમિનેટર મેચ હારનારી ટીમની સફર સમાપ્ત થઈ જશે

તા. 6 નવેમ્બરે અબુધાબીમાં એલિમિનેટર મેચ ભારતીય સમય અનુસાર 7:30 વાગ્યાથી રમાશે. આ મેચ પોઇન્ટ ટેબલમાં ત્રીજા અને ચોથા સ્થાને રહેલી બે ટીમ વચ્ચે રમાશે. આ મેચ જીતનારી ટીમ બીજા ક્વોલિફાયરમાં પ્રથમ ક્વોલિફાયરમાં હારનારી ટીમ સામે ટકરાશે, જ્યારે એલિમિનેટર મેચ હારનારી ટીમની સફર સમાપ્ત થઈ જશે.

બીજી ક્વોલિફાયર મેચ પહેલાં ક્વોલિફાયર હારનારી ટીમ અને એલિમિનેટર મેચને જીતનારી ટીમ વચ્ચે 8 નવેમ્બરે અબુધાબીમાં ભારતીય સમય પ્રમાણે 7:30 વાગ્યે રમાશે. ફાઇનલ મુકાબલો ક્વોલિફાયર-1ની વિજેતા અને ક્વોલિફાયર-2ની વિજેતા ટીમ વચ્ચે દુબઈ ખાતે 10 નવેમ્બરે ભારતીય સમય પ્રમાણે 7:30 વાગ્યાથી શરૂ થશે.

બધી સ્ટેટ બોડીના એક સભ્યને IPL ફાઇનલમાં આમંત્રિત

BCCIએ બધી સ્ટેટ બોડીના એક સભ્યને IPL ફાઇનલમાં આમંત્રિત કર્યા છે. તેમણે ઓછામાં ઓછા ત્રણ કોવિડ ટેસ્ટથી પસાર થવું પડશે. બે ટેસ્ટ ભારતમાં થશે અને છેલ્લો ટેસ્ટ દુબઈમાં થશે. રિપોર્ટ નેગેટિવ આવ્યા બાદ જ ફાઈનલ મેચની મજા માણી શકશે.

આ સિઝનમાં અત્યાર સુધીમાં 45 મેચ રમાઈ ચૂકી છે અને 14 મેચ બાકી છે. હાલ પોઈન્ટ્સ ટેબલમાં ટોપ-થ્રીમાં મુંબઈ ઇન્ડિયન્સ, દિલ્હી કેપિટલ્સ અને રોયલ ચેલેન્જર્સ બેંગલુરુ છે. તેમનું પ્લેઓફમાં પહોંચવું લગભગ નક્કી છે, જોકે પ્લેઓફમાં ચોથા સ્થાન માટે અન્ય ચાર ટીમ વચ્ચે જંગ જામશે.

વુમન્સ T-20 ચેલેન્જનો કાર્યક્રમ

આની સાથે-સાથે બોર્ડ દ્વારા વુમન્સ T-20 ચેલેન્જ એટલે કે મહિલાઓની IPLનો કાર્યક્રમ પણ જાહેર કરવામાં આવ્યો હતો. ટૂર્નામેન્ટમાં ત્રણ ટીમ-સુપરનોવાસ, વેલોસિટી અને ટ્રેલબ્લેઝર્સ વચ્ચે ફાઇનલ સહિત કુલ ચાર મેચ શારજાહ ખાતે રમાશે. ફાઇનલ 9 નવેમ્બરે રમાશે. 

હરમનપ્રીત સુપર નોવાસ, મિતાલી રાજ વેલોસિટી અને સ્મૃતિ મંધાના ટ્રેલબ્લેઝર્સ ટીમનું નેતૃત્વ કરશે. પહેલી મેચ ડિફેન્ડિંગ ચેમ્પિયન સુપરનોવાસ અને રનર-અપ વેલોસિટી વચ્ચે તા. 4 નવેમ્બરે સાંજના 7:00 વાગ્યે રમાશે. પાંચ નવેમ્બરે વેલોસિટી-ટેલબ્લેઝર્સ વચ્ચે બપોરના 3:30 વાગ્યે, 7 નવેમ્બરે ટેલબ્લેઝર્સ-સુપરનોવાસ વચ્ચે સાંજના 7:30 વાગ્યે અને ફાઇનલ મેચ તા. 9 નવેમ્બરે સાંજના 7:30 વાગ્યે રમાશે.