ઓસ્ટ્રેલિયાના વડાપ્રધાન સ્કોટ મોરિસને ઇન્સ્ટાગ્રામ પર ગુજરાતી કઢી-ખીચડી બનાવતી તસવીર શેર કરીને કહ્યું, 'તે મારા પ્રિય મિત્ર PM મોદીની મનપસંદ છે.'
ઓસ્ટ્રેલિયાના વડાપ્રધાન સ્કોટ મોરિસને ઇન્સ્ટા પર શેર કરી એક તસવીર
ગુજરાતી કઢી-ખીચડી બનાવતી તસવીર શેર કરી
તસવીર શેર કરીને PM મોદીને યાદ કર્યા
ભારત સાથે નવા વેપાર કરારની ઉજવણી કરવા ઓસ્ટ્રેલિયાના વડાપ્રધાન સ્કોટ મોરિસન (Scott Morrison) એ શનિવારના રોજ ઇન્સ્ટાગ્રામ પર એક તસવીર શેર કરી હતી. જેમાં તેઓ ખીચડી બનાવતા જોવા મળી રહ્યાં છે. જે નરેન્દ્ર મોદીની મનપસંદ વાનગી છે.
બંને દેશો વચ્ચે વેપાર કરાર
જણાવી દઇએ કે, ભારત અને ઓસ્ટ્રેલિયાએ 2જી એપ્રિલના રોજ એક આર્થિક સહયોગ અને વેપાર કરાર પર હસ્તાક્ષર કર્યા હતાં. જે અંતર્ગત કેનબેરા, કાપડ, ચામડું, ઘરેણાં અને રમત સંબંધિત ઉત્પાદનો જેવાં કે 95 ટકાથી વધારે ભારતીય સામાનને તેમના બજારમાં ટેક્સ ફ્રી (Tax Free Entry) પ્રવેશ સુનિશ્ચિત કરશે.
પોતાના ઇન્સ્ટાગ્રામ પર ખીચડી બનાવતી તસવીર શેર કરી
મોરિસને શનિવારના રોજ પોતાના સત્તાવાર ઇન્સ્ટાગ્રામ એકાઉન્ટ પર ખીચડી બનાવતી તસવીર શેર કરીને લખ્યું હતું કે, 'ભારત સાથે અમારા નવા વેપાર સોદાની ઉજવણી કરવા માટે આજે રાત્રે મે રાંધવા માટે જે કઢીની પસંદગી કરી છે તે મારા પ્રિય મિત્ર પ્રધાનમંત્રી નરેન્દ્ર મોદીના ગુજરાત વિસ્તારની છે. જેમાં તેમની મનપસંદ ખીચડી પણ સામેલ છે.'
તેઓએ તેમના પરિવારનો ઉલ્લેખ કરતા કહ્યું કે - 'જેન, દીકરીઓ અને માતા બધાએ તેને મંજૂરી આપી.' તસવીર સાથે શેર કરવામાં આવેલી પોસ્ટને 12 હજારથી વધુ લાઇક્સ અને 900થી પણ વધારે કોમેન્ટ્સ મળી ચૂકી છે. પ્રધાનમંત્રી નરેન્દ્ર મોદીએ અનેક ઇન્ટરવ્યુમાં ખીચડી પ્રત્યે પોતાની રૂચિને વ્યક્ત કરી છે.