- મંદિરની દિવાલો પર ફરી લખવામાં આવ્યા ભારત વિરોધી સૂત્રો
- 1 વર્ષમાં ચોથી ઘટના, દૂતાવાસ દ્વારા કાર્યવાહીની માંગ
- ભારતીય સમુદાયમાં આક્રોશ ફેલાયો
કેનેડામાં ફરી એકવાર હિન્દુ મંદિરને નિશાન બનાવવામાં આવ્યું છે. આ વખતે મિસિસોગામાં રામ મંદિરની દિવાલો પર ભારત વિરોધી સૂત્રો લખવાનો મામલો સામે આવ્યો છે. જેની તસવીરો પણ સોશિયલ મીડિયા પર વાયરલ થઈ રહી છે. જ્યારે આ મામલો ધ્યાન પર આવ્યો ત્યારે ટોરોન્ટોમાં ભારતીય દૂતાવાસે તેની નિંદા કરી છે. કેનેડાના અધિકારીઓને આ ઘટનાની તપાસ કરવા અને દોષિતો સામે પગલાં લેવા વિનંતી કરી છે.
ભારતીય દૂતાવાસે કરી નિંદા
ટોરોન્ટોમાં ભારતના કોન્સ્યુલેટ જનરલે મંગળવારે મિસિસોગામાં ભારત વિરોધી લખાણો (Anti-India-Graffiti)ની સાથે રામ મંદિરને બદનામ કરવાની નિંદા કરી. ભારતીય દૂતાવાસે કેનેડાના અધિકારીઓને આ ઘટનાની તપાસ કરવા અને ગુનેગારો સામે તાત્કાલિક પગલાં ભરવા વિનંતી કરી છે. ભારતના કોન્સ્યુલેટ જનરલે ટ્વીટ કરીને આ અંગે માહિતી આપી. આ પહેલીવાર નથી કે કેનેડામાં કોઈ હિન્દુ મંદિરને ભારત વિરોધી સૂત્રો અને તસવીરોથી બદનામ કરવામાં આવ્યું હોય. આ પહેલા જાન્યુઆરીમાં બ્રેમ્પટનમાં એક હિન્દુ મંદિર પર ભારત વિરોધી ચિત્રો દોરવામાં આવ્યા હતા, જેનાથી ભારતીય સમુદાયમાં આક્રોશ ફેલાયો હતો.
ગૌરી શંકર મંદિરમાં તોડફોડ
ટોરોન્ટોમાં ભારતના કોન્સ્યુલેટ જનરલે ગૌરી શંકર મંદિરમાં તોડફોડની નિંદા કરતા કહ્યું હતું કે આવા કૃત્ય કેનેડામાં ભારતીય સમુદાયની ભાવનાઓને ઠેસ પહોંચાડે છે. વાણિજ્ય દૂતાવાસ કાર્યાલયે એક નિવેદનમાં જણાવ્યું હતું કે, 'અમે બ્રેમ્પટનમાં ભારતીય વિરાસતના પ્રતિક ગૌરી શંકર મંદિરને ભારત વિરોધી સૂત્રો સાથે બદનામ કરવાની સખત નિંદા કરીએ છીએ. અમે કેનેડાના અધિકારીઓ સાથે આ બાબતે અમારી ચિંતા વ્યક્ત કરી છે.'
અધિકારીઓ કરી રહ્યા છે તપાસઃ મેયર પેટ્રિક બ્રાઉન
બ્રેમ્પટનના મેયર પેટ્રિક બ્રાઉને પણ તોડફોડની નિંદા કરી હતી અને કહ્યું હતું કે કેનેડાના અધિકારીઓ આ ઘટનાની તપાસ કરી રહ્યા છે. પેટ્રિકે ટ્વીટ કર્યું હતું કે, 'આ ઘૃણાસ્પદ અને શરમજનક કૃત્યનું અમારા શહેર કે દેશમાં કોઈ સ્થાન નથી. મેં પીલ પ્રાદેશિક પોલીસ વડા નિશાન દુરૈયપ્પા સાથે આ જઘન્ય અપરાધ અંગે મારી ચિંતા વ્યક્ત કરી છે.'
સપ્ટેમ્બર 2022માં પણ થયો હતો હુમલો
બ્રેમ્પટનના મેયર પેટ્રિક બ્રાઉને જણાવ્યું હતું કે, 'દરેક વ્યક્તિ તેમના પૂજા સ્થાનમાં સલામતી અનુભવવાને પાત્ર છે.' અગાઉ સપ્ટેમ્બર 2022માં કેનેડામાં BAPS સ્વામિનારાયણ મંદિરની દિવાલો પર 'કેનેડિયન ખાલિસ્તાની ઉગ્રવાદીઓ' દ્વારા ભારત વિરોધી સૂત્રો લખવામાં આવ્યા હતા.
