દાદાગીરી / મહિલા ડોક્ટરે દર્દીના સગાં સાથે ઝઘડો કરી આપી ગાળો, પછી બતાવ્યું શાણપણ, અમદાવાદ સિવિલની ઘટના

• અમદાવાદ સિવિલ હોસ્પિટલમાં મહિલા ડોક્ટરનું અશોભનીય વર્તન
• હોસ્પિટલમાં દર્દીનાં સગાં સાથે ઝઘડો કરીને ગાળો બોલી 
• ગાળ બોલવાનો વીડિયો વાયરલ થતાં હોબાળો મચ્યો 

અમદાવાદ સિવિલ હોસ્પિટલમાં એક પછી એક વધુ નવા વિવાદો સામે આવતાં હોય છે. જો કે, આ વિવાદોમાં વધુ એક વિવાદ સામેલ થવા પામ્યો છે. જેમાં એક મહિલા ડોક્ટરે હોસ્પિટલમાં સારવાર અર્થે આવેલા દર્દીના સગાં સાથે પહેલા બોલાચાલી કરી અને બાદમાં અભદ્ર ભાષાનો ઉપયોગ કર્યો હતો. આ સમગ્ર ઘટના એક વીડિયો સોશિયલ મીડિયામાં વાઈરલ થતાં ભારે હોબાળો મચી જવા પામ્યો હતો. 

મહિલા ડોક્ટરે આવેશમાં આવીને દર્દીના સગાને ગાળ બોલ્યા હતા

આ અંગે પ્રાપ્ત સુત્રોના જણાવ્યા અનુસાર, અમદાવાદ સિવિલ હોસ્પિટલમાં રવિવારે સાંજે સેન્ટરમાં બે દર્દીને લવાયા હતા. દર્દીની સાથે તેમના સગાં પણ ટ્રોમા સેન્ટરમાં ધસી આવ્યાં હતા, જેમાં બેમાંથી એક દર્દીનો કેસ કાઢવામાં વધુ સમય લાગ્યો હતો, જયારે બીજા દર્દીનો કેસ ઝડપથી નીકળી ગયો હતો, તેના મુદ્દે બોલાચાલી થઇ હતી. ત્યારબાદ બંને દર્દીને રિપોર્ટ કરાવાવા માટે મોકલ્યાં હતા, આ દર્દી રિપોર્ટ કરાવીને પરત આવ્યા તે સમયે ટ્રોમા સેન્ટરમાં હેડ ઇન્જરીના દર્દી આવ્યા હતા, જેથી ડોક્ટર તેમને તપાસતા હતા, જેને લઈને બંને દર્દીના સગાંએ દર્દીને કેમ ઝડપથી તપાસતા નથી તે મુદ્દે મહિલા ડોક્ટર સાથે વારંવાર માથાકૂટ કરતાં હતા. મહિલા ડોક્ટરે આવેશમાં આવીને દર્દીના સગાને ગાળ બોલ્યા હતા. જેનો એક વીડિયો વાયરલ થવા પામ્યો હતો.

હોસ્પિટલે મહિલા ડોક્ટર સામે તપાસ કરવાનો લેખિત આદેશ આપ્યો 

વીડિયો વાયરલ થતાં હોબાળો મચી ગયો છે. હોસ્પિટલ તંત્રે ઘટનાની ગંભીરતાથી નોંધ લઇને ઉચ્ચ અધિકારીની મીટિંગ બોલાવી હતી મહિલા ડોક્ટરે કામના ભારણને લીધે ભૂલથી ગાળ બોલાઈ ગયાની કબૂલાત કરીને માફી માંગી છે. અને જાહેરમાં પણ માફી માંગવાની તૈયારી દર્શાવી. જો કે, હોસ્પિટલે મહિલા ડોક્ટરને તાત્કાલિક અસરથી દર્દીને તપાસવાની કામગીરીથી અળગી કરીને વિભાગના વડા અને યુનિટના વડાને 7 દિવસમાં તપાસ કરવાનો લેખિત આદેશ આપ્યો છે.