આવેદન / અધિકારીને પ્રોટોકોલ સમજાવવો જીગ્નેશ મેવાણીને પડ્યો ભારે, દલિત સમાજ બાદ બ્રાહ્મણ સમાજે કરી ઉગ્ર રજૂઆત, જાણો મામલો

• MLA જીગ્નેશ મેવાણી વિરુદ્ધ વધુ એક આવેદનપત્ર
• 6 દિવસ અગાઉ અધિક કલેક્ટરને આપ્યું હતું આવેદનપત્ર
• વીડિયો વાયરલ થતાં બ્રાહ્મણ સમાજમાં રોષની લાગણી

બનાસકાંઠામાં મહિલા અધિકારી સામે રોફ જમાવનાર ધારાસભ્ય જીગ્નેશ મેવાણી સામે બ્રાહ્મણ સમાજમાં રોષ જોવા મળી રહ્યો છે. કલેક્ટર કચેરી ખાતે અધિક નિવાસી કલેક્ટર સામે પ્રોટોકોલના નામે રોફ જમાવી એક ક્લાસવન મહિલા અધિકારીનું અપમાન કરતા બ્રહ્મ સમાજમાં રોષ ભભૂકી ઉઠ્યો છે.

બનાસકાંઠા ગુરુ બ્રાહ્મણ સમાજે આપ્યું આવેદન પત્ર
આજે વડગામ ધારસભ્ય જીગ્નેશ મેવાણી વિરુદ્ધ વધુ એક આવેદન પત્ર આપવામાં આવ્યું છે. આજે બનાસકાંઠા ગુરુ બ્રાહ્મણ સમાજ દ્વારા કલેક્ટરને આવેદન પત્ર આપ્યું છે. સાથે જ જીગ્નેશ મેવાણી મહિલા અધિક કલેક્ટરની માફી માંગે તેવી માંગ કરી છે. મહત્વનું છે કે તાજેતરમાં યોજાયેલી ચૂંટણીમાં જીગ્નેશ મેવાણી કોંગ્રેસની ટિકિટ પર લડ્યા હતા અને જીત્યા હતા.

મહિલા અધિકારીને સમજાવ્યો હતો પ્રોટોકોલ
ચૂંટણીના પરિણામ જાહેર થયા બાદ કોંગ્રેસના ધારાસભ્ય જીગ્નેશ મેવાણી કરમાવદ અને સરકારી કોલેજ માટેની માંગને લઈ પાલનપુર કલેક્ટર કચેરી ખાતે પહોંચ્યા હતા. જ્યાં અધિક નિવાસી કલેક્ટર ડો.રીટાબેન પંડ્યાની ચેમ્બરમાં પહોંચીને જીગ્નેશ મેવાણીએ કહ્યું હતું કે, હું કલેક્ટર કચેરી ખાતે આવું એટલે તમારે મને લેવા આવવું, તમારી ચેમ્બરમાં આવું ત્યારે હું ઊભો હોવ ત્યા સુધી તમારે ઉભા રહેવું, હું બેસું પછી જ તમારે બેસવું અને હું જાવ ત્યારે તમારે કલેક્ટર કચેરીના દરવાજા સુધી મુકવા આવવું જેવો પ્રોટોકોલ સમજાવ્યો હતો. જેનો વીડિયો સોશિયલ મીડિયામાં વાયરલ થયો હતો. 

મેવાણી સામે દલિત સમાજે આપ્યું હતું આવેદન
જે બાદ વડગામ કોંગ્રેસના ધારાસભ્ય જીગ્નેશ મેવાણીના નિવેદનને લીધે વડગામના સ્થાનિક આગેવામાં નારાજગી જોવા મળી રહી હતી. બે દિવસ પહેલા જિલ્લા ધાનધાર વણકર સમાજ દ્વારા પણ આ મામલે કલેક્ટરને આવેદનપત્ર પાઠવવામાં આવ્યું હતું. 

જીગ્નેશ મેવાણી પાસે કરી હતી માફીની માંગ 
ધાનધર વણકર સમાજ પાલનપુરે કલેક્ટરને અનુલક્ષી ચીટનીશ ટુ કલેક્ટર એમ.એમ.પિરજાદાને આવેદન પાઠવી લેખિત રજૂઆત કરી જણાવ્યું હતું કે "નિવાસી અધિક કલેકટરને આ રીતે ઉતારી પાડવા એ અપમાન બરાબર છે.'' આ સાથે જ તેમણે જીગ્નેશ મેવાણી પાસે માફીની માંગ કરી હતી.