પ્રભાવિત / કર્ણાટકનાં આ ખેડૂતની ટેક્નિક જોઇને આનંદ મહિન્દ્રા કહી ઉઠ્યાં, ‘સુપર્બ ડિઝાઇન’

મુંબઇઃ મહિન્દ્રા એન્ડ મહિન્દ્રા ગ્રૂપના ચેરમેન આનંદ મહિન્દ્રા (Anand Mahindra) એ કર્ણાટક (karnataka) નાં ખેડૂત ગણપતિ ભટ્ટ (Ganpati Bhatt) ના બાઇક ઇનોવેશનનાં વખાણ કર્યાં છે. આ બાઇકની મદદથી નારિયેળી અને સોપારીના ઝાડ પર થોડી જ સેકન્ડમાં ચઢી શકાય છે. આનંદે ટ્વિટમાં કહ્યું કે આ કેટલું કૂલ છે. આ ડિવાઇસ અસરકારક હોવાની સાથે-સાથે ઉત્કૃષ્ટ રીતે ડિઝાઇન પણ કરાયું છે. ગણપતિનાં ઇનોવેટિવ બાઇકનું વજન માત્ર ર૮ કિલો છે. દાવો છે કે બાઇક ૬૦થી ૮૦ પ્રતિકલાકની ગતિથી ઝાડ પર ચઢી શકે છે. સરેરાશ એક લિટર પેટ્રોલમાં આ બાઇક ૮૦ ઝાડ પર ચઢી જાય છે.

How cool is this? The device not only seems effective & does the job, but also looks elegantly designed with a minimum of weight. @rajesh664 can your team look at this more closely & see whether we can market Mr. Bhat’s device as part of our Farm solutions portfolio? https://t.co/4O0y2DmBzh

— anand mahindra (@anandmahindra) June 18, 2019

આનંદ મહિન્દ્રાએ પોતાની કંપનીના એક અધિકારીને ટેગ કરતાં કહ્યું કે આ ડિવાઇસની તપાસ કરો અને જુઓ કે શું આપણે તેને ફાર્મ સોલ્યુશન પોર્ટફોલિયો હેઠળ વેચી શકીએ છીએ. આ મશીન ૮૦ કિલો વજન લઇને ઝાડ પર ચઢી શકે છે. વરસાદનાં દિવસોમાં સોપારી અને નાળિયેરી પર કીડા લાગવાની આશંકા વધી જાય છે. આવા સંજોગોમાં કિટનાશકોનો છંટકાવ કરવો પડે છે.

આવાં સંજોગોમાં આ ઝાડ પર ચઢવું ખૂબ જ અઘરું અને મહેનત માગી લે તેવું કામ હોય છે. તેથી ખેડૂતો સોપારી અને નાળિયેરની ખેતી કરવાથી બચે છે. ખેડૂત ગણપતિએ આ વાતને એક પડકારના રૂપમાં લીધી અને બાઇક બનાવી. આ બાઇક પર બેસીને માત્ર ૩૦ સેકન્ડમાં સીધા ઝાડ પર પહોંચી શકાય છે. અત્યાર સુધી ખેડૂતોને ઝાડ પર ચઢવામાં ર૦થી ૩૦ મિનિટ લાગતી હતી. ગણપતિએ કહ્યું કે જેમ જેમ ખેડૂતોને તેની જાણકારી મળી રહી છે તેમ તેમ તેઓ મારો સંપર્ક કરીને તેને ખરીદવાની કોશિશ કરી રહ્યાં છે.