- ભાજપમાં ઉમેદવારની પસંદગીને લઈને મહત્વના સમાચાર
- પ્રધાનમંત્રીના ગુજરાત પ્રવાસ બાદ મળશે પ્રદેશ પાર્લામેન્ટરી બોર્ડની બેઠક
- પ્રદેશ કક્ષાએથી નક્કી થયેલા નામને કેન્દ્રીય પાર્લામેન્ટરી બોર્ડ સમક્ષ મુકાશે
ગુજરાતમાં ચૂંટણીનો માહોલ બરાબરનો જામ્યો છે, હાલમાં ભાજપ અને કોંગ્રેસની અંદર ઉમેદવારી માટે વિવિધ નેતાઓ દ્વારા દાવેદારી કરવામાં આવી રહી છે. ગતરોજ આમ આદમી પાર્ટી દ્વારા ઉમેદવારોની સાતમી યાદી જાહેર કરી દેવામાં આવી છે. એવામાં ભાજપમાં ઉમેદવારોની પંસદગીને લઇને મહત્વના સમાચાર સામે આવ્યા છે. વડાપ્રધાન નરેન્દ્ર મોદીના ગુજરાતના પ્રવાસ બાદ પ્રદેશ પાર્લામેન્ટરી બોર્ડની બેઠક યોજાશે.
પ્રદેશ કક્ષાએથી નક્કી થયેલા નામને કેન્દ્રીય પાર્લામેન્ટરી બોર્ડ સમક્ષ મુકાશે
આગામી 2થી 5 નવેમ્બરની વચ્ચે પ્રદેશ પાર્લામેન્ટરી બોર્ડની બેઠક મળી શકે છે. આ બેઠકમાં નિરીક્ષકે તૈયાર કરેલા નામ અંગે ચર્ચા કરવામાં આવશે. પ્રદેશ કક્ષાએથી નક્કી થયેલા નામને કેન્દ્રીય પાર્લામેન્ટરી બોર્ડ સમક્ષ મુકવામાં આવશે. પ્રદેશ કક્ષાએથી નામની યાદી ફાઈનલ થશે. જે કેન્દ્રીય પાર્લામેન્ટરી બોર્ડને મોકલવામાં આવશે. દિલ્હીથી મંજૂરીની મહોર લાગ્યા બાદ ઉમેદવારોની યાદી જાહેર કરી દેવામાં આવશે. આપને જણાવી દઈએ કે, ભાજપ અને કોંગ્રેસ દ્વારા હજુ સુધી ઉમેદવારોના નામની જાહેરાત કરવામાં આવી નથી. જ્યારે આમ આદમી પાર્ટીએ અત્યાર સુધીમાં 86 ઉમેદવારો પણ જાહેર કરી દીધા છે.
1 નવેમ્બરે થઈ શકે છે ચૂંટણીની તારીખો જાહેરઃ રિપોર્ટ્સ
ગુજરાત વિધાનસભા ચૂંટણીનું બ્યૂગલ ફૂંકવા હવે ઘડીઓ ગણાઈ રહી છે. રાજકારણની શતરંજમાં તમામ પક્ષોએ એકબીજાને મ્હાત આપવા બાજી બિછાવી દીધી છે, જેમાં 25 વર્ષથી ગુજરાતમાં સત્તામાં રહેલી બીજેપીએ નવો જ દાવ ખેલ્યો છે. ગુજરાતની ચૂંટણીને લઈને ભારતીય જનતા પાર્ટી એક્શન મોડમાં આવી ગઈ છે. 31 ઓક્ટોબરના રોજ પીએમ મોદી ગુજરાતના પ્રવાસે આવી રહ્યા છે. આ દિવસે પીએમ સરદાર પટેલની જન્મજયંતિ પર રાષ્ટ્રીય એકતા દિવસ પર સ્ટેચ્યુ ઓફ યુનિટી પર યોજાનારી તમામ રાજ્યોની પરેડમાં ભાગ લેશે. સાથે જ પીએમ મોદી જાંબુઘોડામાં આદિવાસીઓને પણ સંબોધિત કરશે. આ ઉપરાંત બનાસકાંઠામાં પાણી વિભાગના કાર્યક્રમમાં તેઓ હાજર રહેશે. આવી સ્થિતિમાં કેટલાક મીડિયા રિપોર્ટ્સમાં રાજકીય નિષ્ણાતોને ટાંકીને એવો દાવો કરવામાં આવી રહ્યો છે કે, પીએમ મોદીના આ કાર્યક્રમ બાદ એટલે કે 1 નવેમ્બરે ગુજરાતમાં ચૂંટણીની તારીખોની જાહેરાત થઈ શકે છે.
2 તબક્કામાં યોજાઈ શકે છે ચૂંટણી
ચૂંટણી પંચ 1 નવેમ્બરે ગુજરાત ચૂંટણીની જાહેરાત કરી શકે છે. મીડિયા રિપોર્ટ્સનું માનીએ તો આ ચૂંટણી બે તબક્કામાં યોજાઈ શકે છે. ડિસેમ્બરના પ્રથમ સપ્તાહમાં મતદાન થઈ શકે છે. અત્યાર સુધી બહાર આવેલી માહિતી અનુસાર પ્રથમ તબક્કાનું મતદાન 1થી 2 ડિસેમ્બર અને બીજા તબક્કાનું મતદાન 4થી 5 ડિસેમ્બરે થઈ શકે છે. તો હિમાચલ પ્રદેશની સાથે ગુજરાતની ચૂંટણીના પરિણામ પણ 8 ડિસેમ્બરે જાહેર થઈ શકે છે.
