તા. ૧ ઓક્ટોબર, ૨૦૧૮થી નાગરિકોના માથે કચરો એકઠો કરવાની કામગીરી પેટે ઘરદીઠ રોજના રૂ.૧નો યુઝર્સ ચાર્જ વસૂલનાર મ્યુનિ. સોલિડ વેસ્ટ મેનેજમેન્ટ વિભાગના આ નવા તઘલગી ફરમાનને રદ કરવા માટે શાસક ભાજપ પણ બેચેન બન્યો છે. ચૂંટણી હોય કે ના હોય, પરંતુ આવા મનઘડંત નિર્ણયથી સોસાયટીઓમાં ઝઘડાનાં બીજ રોપાશે તેવી ભીતિ ફેલાઈ હોઈ હવે ટૂંક સમયમાં સોસાયટીઓને કચરાનાે ઘરઆંગણે નિકાલ કરવાની જવાબદારીમાંથી રાહત અપાય તેવો નિર્ણય રાજ્ય સરકાર દ્વારા જાહેર કરાય તેવી શક્યતા છે.
આમ તો સોલિડ વેસ્ટ મેનેજમેન્ટ વિભાગ તેના પીરાણાના કચરાના ડુંગરને હટાવવાને લઈ થતાં કૌભાંડ કહો કે કચરામાંથી કંચન પેદા કરવાના કીમિયાથી સતત ગાજતો રહ્યો છે, તેમાં પણ સ્વચ્છ સર્વેક્ષણના બહાના હેઠળ મનસ્વીપણે નિર્ણય લઈ અવારનવાર વિવાદમાં આવતા આ વિભાગ દ્વારા જો સોસાયટી-ફ્લેટ વિસ્તારમાં દૈનિક ૫૦ કિલોથી વધુ કચરાનું ઉત્પાદન થતું હશે તો તંત્રમાં ફરજિયાત સેલ્ફ ડેકલેરેશન કરાવવું પડશે તેમજ તેમના પરિસરમાં કચરાના નિકાલની વ્યવસ્થા કરવી પડશે તેવું ફરમાન સ્વચ્છ સર્વેક્ષણ-૨૦૨૧ની આડમાં કરાતાં લોકોમાં તંત્ર વિરુદ્ધ ભારે રોષ ફેલાયો છે.
૧૦ જાન્યુઆરી, ૨૦૨૧ પહેલાં તેમના ત્યાં ૫૦ કિલોથી ઓછો કચરો ઉત્પન્ન થાય
રહેણાક વિસ્તારમાં તા. ૧૦ જાન્યુઆરી, ૨૦૨૧ પહેલાં તેમના ત્યાં ૫૦ કિલોથી ઓછો કચરો ઉત્પન્ન થાય છે તેવું સેલ્ફ ડેકલેરેશન સોલિડ વેસ્ટ મેનેજમેન્ટને આપવું પડશે અને ખોટી માહિતી આપનારને પેનલ્ટી કરાશે તેવી જાહેરાતથી પણ અનેક લોકો ગુસ્સાથી લાલચોળ થયા છે.
પાર્કિંગ માટે પૂરતી જગ્યા મળતી નથી
શાસક ભાજપના સિનિયર કોર્પોરેટરોએ પણ લોકોના ઉગ્ર મિજાજને તરત પારખી જઈ આવા ફતવાને રદ કરવાની ગાંધીનગર સ્તરે રજૂઆત કરી છે. અત્યારે સોસાયટી વિસ્તારમાં ૧૫૦-૨૦૦ રૂપિયાના મેન્ટેનન્સને સમયસર ભરવામાં અનેક ડખા ચાલે છે ત્યારે મશીન ખરીદવાનો ખર્ચ, તેને પરિસરમાં ક્યાં મૂકવું તેની માથાકૂટ વગેરે બાબતોને લીધે સોસાયટીમાં વારંવાર ઘર્ષણ થતું રહેશે. અત્યારે પણ સોસાયટી-ફ્લેટમાં સભ્યોને અંગત વાહનો વધવાથી પાર્કિંગ માટે પૂરતી જગ્યા મળતી નથી. કોમન પ્લોટના ડખા છે.
કચરાપેટી મૂકવાની જગ્યાથી દુર્ગંધ ફેલાવાનો કકળા
ઉપરાંત મોટી કચરાપેટી મૂકવાની જગ્યાથી દુર્ગંધ ફેલાવાનો કકળાટ પણ રોજનો થયો છે. આ બધા ઝઘડાના મૂળમાં જાતે કચરાનો નિકાલ કરવાની વ્યવસ્થા ગોઠવવી આફતરૂપ જ બનવાની હોઈ આનાથી રહેણાક વિસ્તારને બાકાત રાખવાની માગણી ભાજપના સિનિયર કોર્પોરેટરો દ્વારા ગાંધીનગરમાં કરાઈ હોઈ ટૂંક સમયમાં સોસાયટી-ફ્લેટ વિસ્તારને કચરાના નિકાલની જવાબદારીમાંથી મુક્તિ અપાશે તેવી ચર્ચા ઊઠી છે.
પ્રોપર્ટી ટેક્સના બિલમાં સિફતપૂર્વક યુઝર્સ ચાર્જ ઘુસાડીને લોકોની નારાજગી વહોરી
આમ પણ મ્યુનિ. સોલિડ વેસ્ટ મેનેજમેન્ટ વિભાગ દ્વારા પ્રોપર્ટી ટેક્સના બિલમાં સિફતપૂર્વક યુઝર્સ ચાર્જ ઘુસાડીને લોકોની નારાજગી વહોરી લેવાઇ છે. તા. ૧ ઓક્ટોબર, ૨૦૧૮થી અમલમાં મુકાયેલો યુઝર્સ ચાર્જ ૨૦૧૯-૨૦ના પ્રોપર્ટી ટેક્સના બિલથી લોકોને ભરવો પડી રહ્યો છે. તે વખતે પાછલી અસરથી યુઝર્સ ચાર્જ ભરવો પડ્યો હતો. ચાલુ નાણાકીય વર્ષ ૨૦૨૦-૨૧માં સોસાયટી-ફ્લેટ વિસ્તારમાં વર્ષે રૂ. ૩૬૫ અને ચાલી-ઝૂંપડાંવાસીઓ દિવસના ૫૦ પૈસા મુજબ રૂ. ૧૮૦ ભરી રહ્યા છે. ખરેખર તો સોલિડ વેસ્ટ મેનેજમેન્ટ વિભાગે અલગથી યુઝર્સ ચાર્જનું બિલ બતાવીને તેનું વિતરણ કરવું જોઈએ, પરંતુ કૌભાંડપ્રિય આ વિભાગે પ્રોપર્ટી ટેક્સ બિલની સાથે આ ગતકડું ઘુસાડી દીધું છે, જોકે કચરાના નવા વિવાદમાં પક્ષાપક્ષીનો ભેદભાવ ભુલાયો છે.
મ્યુનિ. કોંગ્રેસના પૂર્વ નેતા સુરેન્દ્ર બક્ષી કહે છે, ''અત્યાર સુધી તંત્રે યુઝર્સ ચાર્જ પેટે રૂ. ૨૦૦ કરોડ વસૂલ્યા હોઈ તંત્રનું આ નવું ગતકડું પ્રજાની હેરાનગતિમાં વધારો કરનારું છે. સોલિડ વેસ્ટ મેનેજમેન્ટ વિભાગ લોકોની હાડમારી દૂર કરવાના બદલે કોન્ટ્રાક્ટરની ફેવર કરે તેવા નિર્ણય કેમ લે છે તેની ખબર પડતી નથી. આવો મનસ્વી આદેશ તાત્કાલિક દૂર કરવો જોઈએ.