સુવિધા / દિલ્હીમાં ખેડૂત આંદોલન વચ્ચે નવસારીના ખેડૂતો માટે આવ્યા ખુશીના સમાચાર

• નવસારી જિલ્લાના ખેડુતો માટે ખુશીનો માહોલ
• ચીકુ નિકાસ માટે અમલસાડથી દિલ્હી સુધી સ્પેશ્યલ ટ્રેન શરૂ કરાઇ
• ચીકુના નિકાસ માટે ટ્રેનના નુર ભાડામાં 50 ટકા સબસીડી આપી

બાગાયાતી પાકોના સારા ભાવો ખેડુતોને સધ્ધરતા બક્ષતા હોય છે. જેમાં બાગાયાતનો બગીચો ગણાતા નવસારી જિલ્લા ગણદેવી પંથકમા ચીકુના પોષણક્ષમ ભાવો ન મળવાના કારણે ખેડુતોની સ્થિતિ કથળી હતી. ત્યારે હવે ચીકુ નિકાસ માટે અમલસાડથી દિલ્હીના આદર્શનગર સુધી ટ્રેનની શરુઆત કરાતા ખેડુતોમા ખુશીની લાગણી જન્મી છે.
 
ચીકુ નિકાસ માટે અમલસાડથી દિલ્હી સુધી સ્પેશ્યલ ટ્રેન શરૂ કરાઇ

નવસારી જિલ્લાના અમલસાડી ચીકુની દિલ્હી અને ઉત્તર ભારતના અન્ય રાજ્યોમાં ખુબ માંગ છે. 2006-07માં સ્પેશ્યલ ટ્રેન મારફતે ચીકુ મોકલવામાં આવતા હતા. જેના કારણે ખેડુતોને સારા એવા ભાવો મળતા હતા. પરંતુ સમયાંતરે ટ્રેન કેન્દ્ર સરકાર દ્વારા બંધ કરવામા આવી હતી. ત્યારબાદ ખેડુતો વાહનમાર્ગે ચીકુ ઉત્તર ભારતના રાજ્યોમાં મોકલતા હતા. ત્યારે હવે ફરીથી ખેડુતોની માંગને ધ્યાને રાખી કેન્દ્ર સરકાર દ્વારા અમલસાડથી દિલ્હી સુધી ટ્રેન મારફતે ચીકુ મોકલવાની વ્યવસ્થા કરવામાં આવી છે.

સરકાર દ્વારા સબસીડી પણ આપવામા આવી

નવસારી જિલ્લાની અમલસાડ મંડળીની આગેવાનીમાં મંડળીઓ તથા ખાનગી વેપારીઓના ચીકુ ટ્રેન મારફતે મોકલવાની વ્યવસ્થા કરવામા આવી છે. ટ્રેનમાં એક સાથે 2000 બોક્ષ એટલે કે 20 ટન ચીકુથી શરુઆત કરવામા આવી રહી છે. સરકાર દ્વારા સબસીડી પણ આપવામા આવી છે, જેના કારણે ખેડુતોને સારો એવો ફાયદો થાય તેવી સ્થિતિના કારણે મંડળીઓ અને ખેડુતોમા આનંદો છવાયો છે.

13 વર્ષ પહેલા બંધ થઈ ગયેલી ટ્રેનને ફરીથી પાટા પર લાવવા માટે કેન્દ્ર સરકારે શરુઆત કરી

ચીકુના નિકાસ માટે ટ્રેનના નુર ભાડામાં 50 ટકા સબસીડી આપી, નવસારીથી દિલ્હી સુધી નિકાસ કરવા માટેની વ્યવસ્થા કરી આપી છે. 13 વર્ષ પહેલા બંધ થઈ ગયેલી ટ્રેનને ફરીથી પાટા પર લાવવા માટે કેન્દ્ર સરકારે શરુઆત કરી છે. સૌથી વહેલા પાકતા ફળોમાં આવતા ચીકુના ખેડુતો સારો એવો ફાયદો થવાનો છે. જિલ્લાના 3 હજાર જેટલા ખેડુતો ચીકુ પકવે છે, જેમાં દર વર્ષે કરોડોનો ટર્ન ઓવર કરે છે, એમને સારો એવો ફાયદો થવાનો છે. કેન્દ્ર સરકારની ભાડામાં 50 ટકા સબસીડી બાદ કરીને 2 લાખ 62 હજારમાં દિલ્હી સુધી ચીકુ પહોંચાડવાની શરુઆત કરી છે, જે ખેડુતો માટે ફાયદાનો સોદો સાબિત થવા જઈ રહ્યો છે.