બનાસડેરીના 16 ડિરેક્ટરો માટે આગામી 19 ઓક્ટોબરે ચૂંટણી યોજાશે. ત્યારે બનાસડેરીની ચૂંટણીને લઈને રાજકારણ ગરમાયુ છે. બનાસડેરીની ચૂંટણીને લઇ અલ્પેશ ઠાકોરે ફેસબુક પર કહ્યું કે બનાસડેરીમાં ઠાકોર સમાજના ડિરેક્ટર આવશે. ટુંક સમયમાં ઠાકોર સમાજના ડિરેક્ટર મજબૂતાઇથી આવશે. ત્યારે આ નિવેદન પર બનાસ ડેરીના ચેરમેન શંકર ચૌધરી અને કરસનજી ઠાકોરે નિવેદન આપ્યું હતું.
બનાસડેરીમાં ટુંક સમયમાં ઠાકોર સમાજના ડિરેક્ટર મજબૂતાઇથી આવશે: અલ્પેશ ઠાકોર
શંકર ચૌધરીએ પણ અલ્પેશ ઠાકોરના નિવેદન સામે પ્રતિક્રિયા આપી
આજે ઠાકોર સેનાના અધ્યક્ષ અલ્પેશ ઠાકોરે બનાસડેરી મામલે નિવેદન કર્યું હતું. અલ્પેશ ઠાકોરે નિવેદન આપ્યું હતું કે, બનાસ ડેરીમાં એક પણ ક્ષત્રિય ઠાકોર ડિરેક્ટર નથી. હું એક વાત કહું કે, ક્ષત્રિય ડિરેક્ટર આવશે અને આજે બધા સાંભળે છે તે મારા શબ્દો યાદ રાખજો કે, આવનારા સમયમાં બે મહિનામાં બનાસ ડેરીની અંદર વિશેષ અધિકાર સાથે ઠાકોર ડિરેક્ટર મુકાશે. એટલે જે લોકો એમ કહેતા હતા કે, આ લિસ્ટમાં ઠાકોર ડિરેક્ટર નથી એટલે કહું છું કે બનાસ ડેરીમાં ઠાકોર ડિરેક્ટર આવવાનો છે અને પૂરી તાકાતથી આવવાનો છે. મને સંપૂર્ણ શ્રદ્ધા અને ભરોસો છે કે, ઠાકોર ડિરેક્ટર બનાસ ડેરીમાં 100 ટકા આવશે.
ત્યારે બનાસડેરીના ચેરમેન શંકર ચૌધરી અને ઠાકોર સમાજના ડિરેક્ટર કરસનજી ઠાકોરે અલ્પેશ ઠાકોરના નિવેદન પર નિવેદન આપ્યું હતું. બનાસડેરીમાં ઠાકોર સમાજને પ્રતિનિધિત્વ આપ્યું છે તેવી વાત કરી હતી.
અલ્પેશ ઠાકોરના નિવેદન પર બનાસડેરીના ચેરમેન શંકર ચૌધરીએ પ્રતિક્રિયા આપી હતી. શંકર ચૌધરીએ કહ્યું હતું કે, કરશનજી ઠાકોર ચૂંટણી લડ્યા ન હતા. છતાં પણ બનાસડેરીના નિયામક મંડળ બનાસ ડેરીમાં ઠાકોર સમાજને પ્રતિનિધિત્વ આપ્યું છે.
શંકર ચૌધરીએ કહ્યું કે, છેલ્લા 5 વર્ષથી ઠાકોર સમાજ ડિરેકટર બનાસડેરીમાં છે. કરશનજી ઠાકોર બનાસ ડેરીના બોર્ડ ઓફ ડિરેકટરમાં છે. અત્યારે પણ બોર્ડ ઓફ ડિરેક્ટરમાં હોદ્દા પર યથાવત્ છે. આવનાર સમયમાં પણ ઠાકોર સમાજનું પ્રતિનિધિત્વ રહેશે. દરેક સમાજને સાથે લઈને ચાલવાની ભાવના છે. કરશનજી ઠાકોર ભાભર તાલુકા ઠાકોર સમાજના તાલુકા પ્રમુખ છે. હજુ પણ બોર્ડ ઓફ ડિરેકટરમાં પ્રતિનિધિત્વ કરી રહ્યા છે.
અલ્પેશને ખબર નથી કે છેલ્લા 5 વર્ષથી ઠાકોર સમાજ ડિરેકટર બનાસ ડેરીમાં છેઃ કરશનજી ઠાકોર
અલ્પેશ ઠાકોરના નિવેદન પર બનાસડેરીના ડિરેક્ટર કરસનજી ઠાકોરે કહ્યું કે બનાસ ડેરીમાં ઠાકોર સમાજના પ્રતિનિધિ હોવા જોઈએ પરંતુ અલ્પેશ ઠાકોરને એ ખબર ન હતી કે છેલ્લા 5 વર્ષથી બનાસ ડેરીમાં ઠાકોર સમાજનો પ્રતિનિધિ બોર્ડ ઓફ ડિરેક્ટર્સમાં પ્રતિનિધિત્વ કરી રહ્યા છે. ઠાકોર સમાજના ડિરેક્ટર બનાસડેરીમાં છે.