જો તમે ક્રિકેટર મહેન્દ્ર સિંહ ધોનીના ફેન છો અને શંભુ બોસની રેસ્ટોરામાં એન્ટ્રી કરશો તો તમારું પેટ એકપણ રૂપિયા વગર ભરી શકો છો.
ધોનીના ફેન શંભુ પ્રશ્ચિમ બંગાળના અલીપુદ્વાર જિલ્લામાં એક રેસ્ટોરાં ચલાવે છે. જેનું નામ ‘MSધોની રેસ્ટોરાં’ છે. આ રેસ્ટોરાની ખાસ વાત છે કે 32 વર્ષના શંભુ ધોનીના ફેન્સને મફતનું જમવાનું આપે છે.
\
શંભુએ વાતચીતમાં જણાવ્યું કે,’આ દુર્ગા પૂજામાં અમે બે વર્ષ પૂરા કરીશું. અહીં દરેક લોકો આ જગ્યાને જાણે છે. લોકો અહીં જમવા માટે આવે છે. તમે કોઈને પણ ધોની હોટલ વિશે પૂછી શકો છો. તમે અહીં જ આવશો.’
શંભુને જ્યારે ધોનીના લગાવ વિશે પૂછવામાં આવ્યુ તો તેણે કહ્યુ કે, '' તેના જેવુ કોઇ જ નથી. હું જ્યારે બાળક હતો ત્યારથી તેમને પસંદ કરતો આવ્યુ છું. તે જેવા છે, તેવી જ રીતે ક્રિકેટ રમે છે. તેનાથી ખબર પડી જાય છે કે લિજેન્ડ કેવી રીતે બની શકાય છે તે મારા માટે પ્રેરણા છે.''
શંભુની આ રેસ્ટોરાંમાં મોટેભાગે બંગાળી ખાવાનું મળે છે. રેસ્ટોરામાં દરેક ખૂણામાં ધોનીના પોસ્ટર છે. જ્યાં જુઓ ત્યાં એકપણ દિવાલ ખાલી હોય તેવું જરાપણ નથી.
તેણે આગળ કહ્યુ કે, ''આવું જ મારા ઘરે પણ છે. તેને જોઇને મેં ખૂબ જ શીખ્યું છે. હું એક દિવસ તેને મળવા માંગુ છુ, પરંતુ મારી પાસે સ્ટેડિયમમાં જઇને મેચ જોવાના રૂપિયા નથી.''
શંભુએ કહ્યું કે,’હું જાણું છું કે મારુ સપનું ક્યારેય પૂરું નહી થાય. જોકે, હું તેને કોઈ દિવસ પણ મળી શકું તો એ જરુર કહીશ કે મારા રેસ્ટોરામાં આવે. મને ખબર છે કે તેને ભાત-મચ્છી ખૂબ જ ભાવે છે.''
શંભુએ બે એપ્રિલ 2011 (વર્લ્ડ કપ ફાઈનલ)ને યાદ કરતાં કહ્યું કે, હું તે સમયે ચાની દુકાન ચલાવતો હતો. તેનું કોઇ નામ ન હતુ પરંતુ ધોનીનું પોસ્ટર લગાવતો. મને તેના લાંબા વાળ પસંદ હતા. મને યાદ છે કે વર્લ્ડ કપ 2011ની ફાઇનલ મેચ મારા મિત્રો સાથે ચાની દુકાન પર જોઇ હતી. હું તે રાત ક્યારેય નહી ભૂલી શકુ. હું ત્યારે ખૂબ જ રોયો હતો (ખુશીના આંસુ). નોંધનીય છે કે, ભારતે 2 એપ્રિલ 2011ના રોજ 28 વર્ષ પછી વર્લ્ડકપ જીત્યો હતો.